Алматы облысы Талғар ауданының тұрғындары су тапшылығынан зардап шегіп отыр. Тіпті, олар жиналып, наразылыққа шыққан. Аудан әкімі Танат Айдарбековке қояр талаптары біреу – нақты іске көшіп, мәселенің түйінін тарқату.
Ал әкім проблеманы шешу үшін жұмыс жасалып жатқанын алға тартты. Сөзінше, су тапшылығы «Тас-Құм Су» мекемесінің «Алматы суға» қарыз болуынан туындаған. «Алматы су» ауыз су жеткізуді тоқтатып, орнына «BAUYR LTD» ЖШС жұмыс істей бастаған.
«BAUYR LTD» ЖШС басшылығы ақпан айында су құбырларын ауыстырып, жазда мәселені шешемін деп уәде берген. Сөзінде тұрмады. Алайда, 4,6 млрд. теңгеге жоба жасалып, құрылыс жұмыстары басталған. Қазір арнайы техникамен жұртқа су тасымалдап жатырмыз. Таңертең және кешке 3-4 сағатқа су қосылады», – деді әкім.
Бұдан бөлек, Бесағаштағы су желілері 95% тозған. Қазір мұнда 25 мыңға жуық тұтынушы бар.
«BAUYR LTD» ЖШС желілерді күтіп ұстау жұмысын мойнына алғанмен, «Алматы судан» техникалық шарт ала алмады. Нәтижесінде Бесағашқа су беру мүлде тоқтатылды. Түйткілді шешу мақсатында «Талғар су» ШЖҚ МКК ауылдың оңтүстік жағына ауыз су жеткізуге келісімшарт жасалды», — деді Танат Айдарбеков.
«BAUYR LTD» жұмысы қашан жанданатыны белгісіз, ол меморандумда көрсетілген талаптарды орындамаған. Ал «Талғар су» ЖШС болса, тамыздың ортасына таман орталықтандырылған суға құбырларды жалғау жұмысын аяқтамақ.
