Қаржылық мониторинг агенттігі өзін маркетплейс ретінде таныстырған CVK жобасының қызметін тоқтатты. Қазір жобаға қатысты тергеу Қазақстанның 14 өңірінде жүргізіліп жатыр.
FBRK Қаржылық мониторинг агенттігіне сілтеме жасап хабарлағандай, қатысушыларға тұрақты табыс әкеледі деген әртүрлі пакеттегі «инвестициялық дүкендерді» сатып алу ұсынылған.
Нақты сауда жүріп жатқандай әсер қалыптастыру үшін пайдаланушылардың жеке кабинеттерінде орындалған тапсырыстар мен тауарлардың жөнелтілгені көрсетілген. ҚМА мәліметінше, бұл тауарлар шын мәнінде болмаған, ал қатысушыларға виртуалды пайыздар есептелген.
Схемада рефералдық жүйеге ерекше мән берілген. Жаңа салымшыларды тартқаны үшін қатысушыларға ақшалай бонус пен бағалы сыйлықтар уәде етілген.
ҚМА дерегінше, ауқымды жарнамалық науқан мен өңірлердегі белсенді насихаттың арқасында жобаға 1,5 мыңға жуық салымшы тартылған.
Жаңа қатысушыларды тарту үшін жабық үгіт кештері, кеңселердің салтанатты ашылуы және жаппай таныстырылымдар ұйымдастырылған. Бұл шаралар әлеуметтік желілерде белсенді жарияланып, жобаға деген сенімді арттыру үшін пайдаланылған.
Салымшылардың ақшасы криптовалюта платформасы арқылы шығарылып, кейін банктік шоттарға аударылған.
Жедел іс-шаралар барысында ҚМА 474 мың USDT көлеміндегі криптоактивті бұғаттады.
Тергеу жалғасып жатыр. Қылмыстық-процестік кодекстің 201-бабына сәйкес өзге ақпарат әзірге жарияланбайды.
ҚМА CVK жобасынан зардап шеккен азаматтарды тұрғылықты жері бойынша агенттіктің аумақтық департаменттеріне жүгінуге шақырды. Сондай-ақ 1458 call-орталығы жұмыс істейді.
