Алматыда Медеу мен Шымбұлақ шатқалындағы ерекше қорғалатын табиғи аумақтарға автокөлікпен кірудің жаңа тәртібі бекітілді. Шектеу іштен жану қозғалтқышы бар көліктерге де, белгілі күндері электромобильдерге де қатысты болады.
Шешімді 18 қыркүйекте Алматы қаласы мәслихатының депутаттары қолдады. Жаңа тәртіп көлік жүктемесін және табиғи аумаққа түсетін антропогендік әсерді азайту мақсатында енгізілмек.
Бензин, дизель және басқа да іштен жану қозғалтқышы бар автокөліктердің кіруіне шектеу қойылады.
Электромобильдер үшін бөлек тәртіп қарастырылған. Жұмыс күндері олардың өтуіне рұқсат беріледі. Ал демалыс және мереке күндері шектеу электромобильдерге де қолданылады.
Бұл талап жергілікті тұрғындарға, сондай-ақ шұғыл, жедел, коммуналдық және арнайы қызметтердің көліктеріне қолданылмайды.
Алматының Экология басқармасының мәліметінше, таулы аумақтағы көлік ағыны айтарлықтай өскен. 2026 жылдың сегіз айында бақылау-өткізу бекеті арқылы 179 024 көлік өткен. Ал 2022 жылдың бүкіл кезеңінде бұл көрсеткіш 76 606 болған. Қазір бекет арқылы тәулігіне орта есеппен 700-ге жуық көлік өтеді.
Жаңа тәртіп 2026 жылғы 12 маусымдағы Конституциялық сот шешімінен кейін әзірленді. Сот бұған дейін әкімдік қаулысымен енгізілген шектеуді Конституцияға сәйкес емес деп таныған. Себебі мұндай шектеулерді белгілеу құзыреті мәслихатқа тиесілі. Сонымен бірге Конституциялық сот ерекше қорғалатын табиғи аумақты қорғау мақсатында көлік қозғалысын шектеуге заң бойынша жол берілетінін атап өткен.
Шымбұлақ аумағында 48 жеке тұрғын үй, «Қазгидромет» пен «Қазселденқорғау» мекемелерінің қызметтік-тұрғын ғимараттары және Тұйықсу шатқалындағы нысандар орналасқан. Сондықтан жаңа тәртіпте жергілікті тұрғындардың үйлеріне кедергісіз жетуі де ескерілген.
