Қазақстандық жеңіл атлет Ясмина Тоқсанбаева 2026 жылғы Азия ойындарындағы марафондық спорттық жүрісте бірінші келгеннен кейін жарыстан шеттетілді.
Тоқсанбаева 42,195 шақырымдық қашықтықты 3 сағат 22 минут 20 секундта жүріп өтіп, мәреге бірінші жеткен.
Алайда жарыстан кейін оның нәтижесіне наразылық берілді. Наразылық қазақстандық спортшы киген кроссовканың талаптарға сәйкестігіне қатысты болды.
Қазақстан Ұлттық Олимпиада комитеті мәселе World Athletics талаптарына байланысты қаралып жатқанын растаған.
Кейін ресми хаттамада Тоқсанбаеваның аты-жөнінің тұсына DQ белгісі қойылды. Оның нәтижесі жойылып, алтын медаль Қытай спортшысы Даньчжэнь Гоцзунға өтті.
Жарыстан түсірілген фотоларға сүйенген редакция Тоқсанбаеваның ASICS Magic Speed 4 кроссовкасымен өнер көрсеткенін анықтады.
World Athletics жариялаған рұқсат етілген аяқ киімдер тізімінен редакция Magic Speed сериясының басқа нұсқаларын тапқанымен, төртінші нұсқасын анықтай алмады.
World Athletics ережесіне сәйкес спортшы қолданатын нақты аяқ киім моделі сол дисциплина үшін рұқсат етілген ресми тізімде болуы тиіс. Спортшыларға жарыс алдында модельдің талапқа сәйкестігін алдын ала тексеру міндеттеледі.
«Старт алдында кроссовкамды тексерген жоқ»
Ясмина Тоқсанбаева жарыс алдында оның аяқ киіміне жеке тексеру жүргізілмегенін айтты.
Спортшының сөзінше, әдетте жарыстарда кроссовка тексеріліп, табанының биіктігі өлшенеді. Алайда бұл жолы мұндай тексеру болмаған.
Тоқсанбаева кроссовканы көктемде сатып алғанын да айтты. Оның сөзінше, сол кезде бұл модель рұқсат етілген аяқ киімдер тізімінде болған. Бірақ шамамен бір айдан кейін тізім жаңартылып, аталған модель онда көрсетілмей қалған.
Редакция Қазақстан Ұлттық Олимпиада комитетіне сұрау жолдап, World Athletics талаптарына сай экипировканы тексеруге кім жауап беретінін және ұлттық құрама спортшыларының техникалық жабдықталуы жарыс алдында қалай бақыланатынын сұрады.
Медальдар қайта бөлінді
Тоқсанбаева жарыстан шеттетілгеннен кейін Қытай өкілі Даньчжэнь Гоцзун 3:26:09 нәтижесімен Азия ойындарының чемпионы атанды.
Күміс жүлде Қытай спортшысы Ма Лиге, қола медаль жапониялық Юкико Умэноға бұйырды.
Осылайша Қазақстан құрамасына тағы бір алтын медаль әкелуі мүмкін болған нәтиже ресми түрде жойылды.
