Ұлытау облысында Қаражал қаласындағы «Восточный» карьерінде марганец кенін заңсыз өндірумен айналысты деген күдікке ілінген топтың әрекеті тоқтатылды.
Операцияны Ұлытау облысы бойынша Қаржылық мониторинг агенттігінің департаменті прокуратураның үйлестіруімен жүргізген.
Тергеу нұсқасы бойынша, күдіктілер кен өндіру үшін экскаваторлар, тиегіштер мен самосвалдар сияқты ауыр карьерлік техниканы пайдаланған. Карьер аумағында өндірістік база жабдықталып, өндірілген шикізат ұсақтау және жуу кешені арқылы өңделген.
Өңделген марганец кені кейін жүк көлігімен Қазақстаннан тыс жерлерге тиісті құжаттарды пайдалану арқылы шығарылған.
ҚМА мәліметінше, сатылған марганец кенінің жалпы көлемі 4 мың текше метрден асты. Оның құны 950 миллион теңгеден жоғары болған.
Ведомство күдіктілердің нақты санын, кеннің қай елдерге шығарылғанын және заңсыз өндірістің қанша уақыт жүргенін әзірге хабарлаған жоқ.
Сотқа дейінгі тергеу жалғасып жатыр. Қалған ақпарат ҚПК-нің 201-бабына сәйкес жария етілмейді.
