Өскеменде дәмханалардың бірінде болған жанжалдан кейін 40 жастағы полиция қызметкері қаза тапты. Күдікті ұсталды.
Шығыс Қазақстан облысының Полиция департаменті хабарлағандай, оқиға 4 қазанға қараған түні болған.
Алдын ала мәлімет бойынша, 40 жастағы ер адам дәмханаға келушілердің біріне өзін дұрыс ұстамағаны үшін ескерту жасаған. Осыдан кейін келуші оған дене жарақатын салған.
Алған жарақаттарының салдарынан ер адам көз жұмды. Күдіктінің әрекетінен тағы бір келуші зардап шеккен.
Полиция департаменті қаза болған азаматтың полиция қызметкері екенін растады. Оқиға кезінде ол қызметте болмаған.
Аталған дерек бойынша қылмыстық іс қозғалды. Күдікті ұсталып, уақытша ұстау изоляторына қамалды.
Бұған дейін әлеуметтік желілерде Өскеменде автокөліктердің жаппай тексеріліп жатқаны туралы видеолар тараған. Осыдан кейін тұрғындар полиция күдіктіні іздеп жатыр деген болжам айтқан. Полиция бұл тексерулердің мән-жайын егжей-тегжейлі түсіндірген жоқ.
Тергеу жалғасып жатыр.
