Қазақстанның Қаржылық мониторинг агенттігі сотталған Перизат Қайраттың туыстарына тиесілі Дубайдағы пәтерлер туралы ақпаратқа түсініктеме берді. Ведомство жылжымайтын мүлік жымқырылған қайырымдылық қаражатына сатып алынған деген болжам расталмағанын мәлімдеді.
Бұл туралы ҚМА анонимді Telegram-арнада жарияланған ақпаратқа байланысты хабарлады.
Агенттік өкілдерінің айтуынша, аталған мүліктің Перизат Қайраттың қылмыстық жолмен алынған қаражатына қатысы болуы мүмкін деген нұсқа бұған дейін тергеу барысында тексерілген.
Тергеушілер қаржылық операцияларды зерттеп, жымқырылған қаражаттың қайда жұмсалғанын анықтаған.
ҚМА мәліметінше, Перизат Қайрат қайырымдылыққа жиналған ақшаны автокөліктер мен пәтерлер сатып алуға, оларды жөндеуге және жиһазбен жабдықтауға жұмсаған.
Сондай-ақ қымбат брендтердің киімдері мен аксессуарларын, зергерлік бұйымдарды сатып алған.
Қаражаттың бір бөлігі бизнес-класпен ұшуға, қымбат қонақүйлерде тұруға, мейрамханалар мен ойын-сауық орындарына жұмсалған.
Алайда тергеу Перизат Қайрат пен хабарламада А. отбасы деп көрсетілген туыстары арасында қаржылық есеп айырысу болмағанын анықтаған.
Сонымен қатар Дубайдағы аталған пәтерлер 2011–2019 жылдар аралығында сатып алынған.
Агенттік бұл кезеңнің «Biz Birgemiz Qazaqstan 2030» қоры құрылғанға және Перизат Қайраттың қылмыстық әрекеті басталғанға дейін болғанын атап өтті.
ҚМА мәліметінше, А. отбасы 20 жылдан астам уақыт бойы жылжымайтын мүлік сатып алу және қайта сатумен айналысады.
Олар Перизат Қайрат пен оның анасынан бөлек тұрып, кәсіпкерлік қызметін дербес жүргізген.
Ведомство Қылмыстық-процестік кодекстің 161-бабына сәйкес мүлікке тыйым салу және оны тәркілеу үшін оның қылмыстық жолмен алынғанын растайтын дәлелдер қажет екенін түсіндірді.
Күдіктімен немесе сотталған адаммен туыстық байланыста болу өздігінен қылмыстық қудалауға немесе мүлікті тәркілеуге негіз бола алмайды.
Осылайша, ҚМА жүргізген тексеру Перизат Қайраттың туыстарына тиесілі Дубайдағы пәтерлер мен жымқырылған қайырымдылық қаражаты арасында байланыс анықтамаған.
