NAVAI лақап атымен танымал ресейлік әнші Наваи Бакиров Қазақстан шекарасында ұсталды. Ол есірткі контрабандасына оқталды деген күдікке ілінген. Ал 14 қазанда Астанада өтуі тиіс концерті тоқтатылды.
Бұл туралы Ulysmedia.kz хабарлады. Басылымның мәліметінше, әншінің ұсталғанын полиция растаған.
Шекарада не болды?
13 қазанда Наваи Бакиров Жамбыл облысындағы «Қордай» шекара бекеті арқылы Қазақстанға кірмек болған.
Ол мінген автокөлікті полиция мен ҰҚК Шекара қызметінің өкілдері тексерген.
Тексеру барысында көліктен есірткі заты табылып, тәркіленген.
«Аталған дерек бойынша есірткі заттарының контрабандасына оқталу күдігімен қылмыстық іс қозғалды. Күдікті уақытша ұстау изоляторына қамалды. Сотқа дейінгі тергеу жүргізіліп жатыр», — деп хабарлады полиция.
Тәркіленген заттың түрі мен мөлшері әзірге нақтыланбады.
Астанадағы концерті тоқтатылды
14 қазанда NAVAI Астанадағы Жақсылық Үшкемпіров атындағы Жекпе-жек сарайында өнер көрсетуі тиіс болатын.
Алайда концерт өтпейтін болды.
Ұйымдастырушылар мұны техникалық себептермен түсіндіріп, көрермендерден кешірім сұрады.
Дегенмен концерттің тоқтатылуы әншінің ұсталуымен тікелей байланысты екені ресми түрде расталған жоқ.
NAVAI кім?
Наваи Бакиров — әзербайжан текті ресейлік әнші.
Ол HammAli & Navai дуэтінің құрамында кеңінен танылды. Дуэт поп, рэп және R&B бағыттарында ән орындайды.
Олардың танымал туындыларының қатарында «Птичка», «Прятки» және «Девочка-война» әндері бар.
Кейін Наваи Бакиров жеке шығармашылық жолын да дамыта бастады.
Қазіргі уақытта әншіге қатысты сотқа дейінгі тергеу жүргізіліп жатыр. Оның кінәсі сотта дәлелденген жоқ.
