Қонаев қаласының құрылғанына биыл 55 жыл толды. Мерекені қала халқы сенбінің жаймашуақ күнінде бірге атап өтті.
Мерекені тойлату Мемлекет және қоғам қайраткері Д.А.Қонаевтың ескерткішіне гүл шоқтарын қоюмен басталды. Шаһар басшысы Асхат Бердіханов қоғам қайраткері, ҚХА мүшесі Асылы Осман апамызбен, қаланың қадірлі ақсақалдарымен, тұрғындармен бірге Димаш атамыздың рухына тағзым етті. 
Кейіннен ол шаһардың экономикалық дамуына ықпал етіп отырған кәсіпорындардың көрмесін тамашалады. Көрмеге жүгері таяқшаларын өндіретін «АЯМ» ЖШС, қазақстандық антифриз брендінің негізін қалаушы «Бағашар мекен» ЖШС, құтылар шығаратын «Юнипак Шымкент» ЖШС, Қосқұдық ауылындағы кірпіш зауыты, трансформаторлар шығаратын «ПФ Электросервис» ЖШС өнімдері қойылған. Аталған өндіріс ошақтары бірнеше жыл бұрын негізі қаланып, өз кәсібін дөңгелетуде. Сондай-ақ бұл күні танымал туристік демалыс орны «Del Mare» мен көпфункционалды ойын-сауықтық кешен «ASP ARENA» басшылығы да таныстырылым жасады.
Мерекеде балалар да назардан тыс қалған жоқ. Қала әкімі Б.Соқпақбаев атындағы орталық саябаққа барып, шеберлік сабақтарын, шоу бағдарламаны бүлдіршіндермен бірге көрді. Ол ТикТок аймаққа да ат басын бұрып, әлеуметтік желі қолданушыларына тікелей эфир арқылы сәлемдеме жолдады. Сонымен қатар жас суретшілер арт-аймақта Д.Қонаевтың портретін бояды.
Бұдан бөлек, орталық саябақтың спорт алаңында жарыстар ұйымдастырылды. Қала жұртшылығы асық ату, қол күрес, тоғызқұмалақ сынды қазақтың ұлттық ойындары мен волейбол, футбол, үстел ойындарынан өзара сынға түсті.
Ал орталық алаңда түрлі этномәдени орталықтардың тақырыптық шатырлары тігілді. Әртүрлі ұлт өкілдері 30 метрлік «алма бәлішін» пісіріп, халықтың бірлігі мен татулығын паш етті. Осылайыша, Қазақстан халқы Ассамблеясының мүшелері мейрамға ерекше көрік сыйлады.
Шараның ресми бөлімінде Асхат Бердіханов жиылған жұртты мерекемен құттықтады.
«Тарихы терең Қонаев қаласының 55 жылдық мерейтойы құтты болсын! 2022 жылдың 3 мамыр күні Мемлекет басшысы Қасым-Жомарт Кемелұлы Тоқаевтың Жарлығымен Қапшағай қаласы Алматы облысының орталығы болып бекітіліп, атауы ресми түрде Қонаев болып өзгертілгені баршаңызға белгілі. Сол уақыттан бері қаламыздың бет-бейнесі жаңаша сипатқа ие болып, инфрақұрылымы қарқын алып келеді», − деді ол.
Әкім қаланың жеткен жетістіктерімен де бөлісті.
«Қала халқының саны 3,7 пайызға өсіп, бүгінгі күні 66 200 адамды құрайды. Қаламыз облыс орталығы болған сәттен бастап 312 млрд. теңге инвестиция тартылса, өнеркәсіпте 418 млрд теңгеге өнім өндірілді, ауыл шаруашылығында 135 млрд теңгеге өнім алынды. Бүгінгі күнге 3 жыл аралығында 177 мың шаршы метр тұрғын үй пайдалануға берілді. Соның ішінде соңғы жылдары әлеуметтік осал топтағы азаматтарға 235 пәтер берілді. Бұл үрдіс әлі де жалғасын табатын болады», — деді шаһар басшысы.
Асхат Бердіхановтың сөзінше, бүгінде негізгі бағыт – қала инфрақұрылымын дамыту, туристік әлеуетке баса назар аударылған басты құжат – Қонаев қаласының 2027 жылға дейінгі бекітілген әлеуметтік-экономикалық дамуының кешенді жоспары.
«Кешенді жоспар аясында 187 іс-шараны іске асыру жоспарланған. Оның ішінде: электрмен жабдықтау – 12, газ жүйесі – 8, жылумен жабдықтау – 6, сумен қамту және кәріз – 41, көлік инфрақұрылымы бойынша 13 жобаны іске асыру жоспарланып отыр. Бүгінгі мерейтой еліміздің ортақ мақтанышы, облыс орталығындағы барлық саланың қарқынды дамуының нақты көрінісі деп білемін. Ортақ қуаныш құтты болсын! Еліміздің береке, бірлігі артып, рухани күшті елдердің қатарында болуға тілектеспін», — деді әкім.
Сонымен қатар шаһар басшысы Қонаевтың дамуына елеулі үлес қосып, қоғамдық өміріне белсене қатысып жүрген азаматтар мен ұжымдарды марапаттады.
Баспагер Вагиф Гаджиев болса, қалалық кітапханаға Дінмұхамед Қонаевтың өмір жолы туралы құнды кітапты тарту етті. Естеліктер мен деректер 2,5 жыл жинақталып, 8 келі етіп басылған. Әлемге тек 500 данамен таратылған.
Концерттік бағдарлама бойынша Қонаевтың тарихынан сыр шертетін қойылым қойылып, ән мен биден шашу шашылып, тұрғындарға ерекше көңіл-күй сыйлады. Әуе шары аспанда қалықтап, той-думанның шырайын кіргізді.
«Мереке кең көлемде аталып өтуде. Қуаныштымыз! Той-тойға ұлассын! 55 жылдық мерейтой құтты болсын! Қаламыз көркейіп, дами берсін!» — деді тұрғын Меруерт Сағитова.
Ал кешкі бағдарламада Мирас Жүгінісов пен бірнеше танымал қазақстандық топтар өнер көрсетеді. Конкурстар ойнатылып, сыйлықтар таратылады. Мереке отшашумен өз мәресіне жетеді.
