Қазақстандық боксшы Ангелина Лукас Біріккен Араб Әмірліктеріндегі Дубай қаласында өткен турнир аясында титулдық жекпе-жекте сенімді жеңіске қол жеткізді. Прелим-кардта Танзания өкілі Эгине Каянге қарсы шыққан спортшы қарсыласын төртінші раундта нокаутқа түсіріп, WBF нұсқасы бойынша екінші жеңіл салмақтағы (52,2 келіге дейін) чемпиондық белдікті жеңіп алды, деп хабарлайды Sona.kz Tengri.sport-қа сілтеме жасап.
Бұл жеңістен кейін Лукас кәсіби рингтегі жетістігін 16 жеңіспен (тоғызы мерзімінен бұрын) толықтырды. Оның еншісінде бір ғана жеңіліс бар.
Спортшының бұл титулдық жетістігі қараша айындағы даулы жағдайдан кейін орын алды. Сол кезде Лукас америкалық Кэтрин Ренеге сенсациялық түрде есе жіберген еді, алайда кейін жекпе-жектің нәтижесі күшін жойды. АҚШ боксшысы тапсырған допинг-тест оң нәтиже көрсеткен соң, жекпе-жек «болмаған» деп танылды.
