8 желтоқсан күні таңертең Ақтаудың 28-шағын ауданында болған өрт салдарынан кәмелетке толмаған бала көз жұмды. Маңғыстау облыстық ТЖД мәліметінше, өрт туралы хабар «112» пультіне сағат 09:04-те түскен, деп хабарлайды Sona.kz Halyqstan-ға сілтеме жасап.
Оқиға орнына жеткен өрт сөндірушілер пәтердің төртінші қабатында шыққан өртті шамамен 20 шаршы метр аумақта өшірді. Құтқарушылар ішкі бөлмелерді қарап шыққан кезде ес-түссіз жатқан баланы тауып, жедел жәрдем бригадасына тапсырған.
Дәрігерлердің барлық реанимациялық шараларына қарамастан, баланы аман алып қалу мүмкін болмады. Марқұм жедел жәрдем көлігінде жан тапсырған. Медициналық қызмет өкілдері оның жағдайы бастапқыда өте ауыр болғанын айтты.
ТЖД өкілдері өрттің шығу себебі мен мән-жайын анықтау жұмыстары жүргізіліп жатқанын хабарлады. Зертханалық сараптама мамандары өрт орнын қарап, қажетті материалдарды жинап жатыр.
Қаза тапқан баланың жасы мен жеке деректері ресми түрде нақтыланып жатыр. Қосымша ақпарат тексеру аяқталғаннан кейін беріледі.
