Алматы облысының Іле ауданына қарасты Көктерек ауылында тұрғындарға қолжетімді медициналық қызмет көрсететін жаңа фельдшерлік-акушерлік пункт ашылды.
Нысан Қазақстан Конституциясының 30 жылдығы қарсаңында пайдалануға берілді. Жаңа ФАП 2 мыңнан астам ауыл тұрғынын қамтиды. Жалпы ауданы 264 шаршы метрді құрайтын ғимаратта 15 кабинет бар, бір уақытта 40 адамға дейін қабылдау мүмкіндігі қарастырылған. Құрылысқа 263 млн теңге бөлінген. Бұл қаражат мемлекетке қайтарылған заңсыз активтер есебінен бағытталды.
Аудан әкімі Қайыржан Жақсылбековтың айтуынша, медициналық пункт ауыл халқына сапалы қызмет көрсетудің кепілі болады.
«Мұнда алғашқы қабылдау, жүкті әйелдерге арналған кабинет, процедуралық және екпе бөлмелері қарастырылған. Алдағы уақытта тағы екі осындай нысан салу жоспарда бар», – деді ол.
фото Amanat
«AMANAT» партиясы жобаның ауыл халқы үшін әлеуметтік маңызы зор екенін атап өтті.
Іле ауданының прокуроры Бауыржан Тулендинов те ерекше тоқталды:
«Қайтарылған активтердің әлеуметтік нысандар құрылысына бағытталуы – заң үстемдігі мен әділеттіліктің нақты көрінісі. Қазір облыста осындай 22 нысан салынып жатыр», – деді ол.
фото Amanat
Сонымен бірге, ауылға медициналық мамандарды тарту үшін 8,5 млн теңгеге дейін біржолғы төлем қарастырылған. Бұл қаражат алған дәрігерлер ауылдық жерде кемінде 5 жыл қызмет етуге міндетті.
Биыл Алматы облысында партия бастамасымен 15 дәрігерлік амбулатория, 12 ФАП және 11 медициналық пункт салу көзделіп отыр.
ТМД аумағында алғаш рет байланыс станцияларының жұмысына имитация жасайтын «SMS-бластер» құрылғысын пайдалану схемасы жойылды. Бұл жабдық операторлардың...
