Оқу-ағарту министрі Жұлдыз Сүлейменова мектеп оқушыларына түсетін оқу жүктемесінің жоғары екенін, әсіресе тоқсан соңында айқын байқалатынын мәлімдеді. Министрдің айтуынша, бір тоқсан ішінде орындалуы тиіс оқу мақсаттарының көптігі оқыту үдерісін күрделендіріп отыр. деп хабарлайды Sona.kz Syrmedia.kz-ке сілтеме жасап.
Ол сенбі күні сабақ өткізілмейтініне қарамастан, мұғалімдер оқу бағдарламасындағы көптеген мақсаттарды тоқсан ішінде қамтуға мәжбүр екенін атап өтті. Бұл жағдай оқушылар мен педагогтер үшін қосымша салмақ түсіреді.
Министр қазіргі оқу жылының соңына дейін жиынтық бағалаулардың БЖБ мен ТЖБ форматтарының өзгермейтінін айтты.
Жаз мезгілінде Ұлттық білім академиясы өңірлік білім басқармаларымен бірлесіп оқу бағдарламаларын түзету бойынша ұсыныстар әзірлейді. Ықтимал шешімдер қатарында оқу сағаттарын көбейту немесе оқу мақсаттарының көлемін қысқарту қарастырылып отыр.
Министрдің сөзінше, түпкілікті шешімдер сарапшылар, ғалымдар және үлгілік оқу бағдарламаларын әзірлеушілердің қатысуымен қабылданады.
