TikTok-стример Карим Асылбеков Қарағанды қаласында өзіне қатысты бопсалау және қоқан-лоққы көрсету фактілері болғанын мәлімдеді. Бұл туралы ол Instagram парақшасында айтып, әлеуметтік желілерде ұзақ уақыт бойы көрінбей кетуінің себебін түсіндірді, деп хабарлайды Sona.kz asylbekov_karim-тің инстаграм парақшасына сілтеме жасап.
Блогердің айтуынша, белгісіз адамдар одан ақша талап етіп, отбасына қауіп төндірген. Сондай-ақ олар үйінің маңында аңдып жүргенін де айтқан. Өз сөзін растау үшін Асылбеков физикалық күш қолдану туралы қоқан-лоққы жасалған аудиохабарламаларды жариялады.
Оның сөзінше, бастапқыда ол бұл жағдайды таныстарына көмек көрсету деп түсініп, 100 мың теңге беруге келіскен. Алайда кейін талап етілген сома бір миллион теңгеге дейін өскен. Осыдан кейін ол ұлттық қауіпсіздік органдарында жұмыс істейтін туысына жүгінгенін айтты.
Карим Асылбеков бопсалауға қатысты күдікті топты ұстау бойынша арнайы операция жүргізіліп жатқан кезеңде жұбайының түсік тастағанын да жеткізді. Оның айтуынша, отбасы қатты күйзеліске ұшырап, жұбайы уақытша үйден кетуге мәжбүр болған.
Сонымен қатар блогер тергеу басталғаннан кейін белгісіз адамдардың арызын қайтарып алуын сұрап, ірі көлемде ақша ұсынғанын мәлімдеді. Ол мемлекет тарапынан қорғалатынына және заң аясында әділ шешім қабылданатынына үміт білдірді.
Аталған жағдайға қатысты құқық қорғау органдарының ресми пікірі жарияланбады.
