Қонаевта шомылу маусымында түрлі ойын-сауықпен қауіп-қатер қатар жүреді. Кей демалушылар қауіпсіздік ережелерін сақтамайды, кейде күтпеген жағдайлар орын алып, адамдар суға кетеді. Мұндайда құтқарушылар мен медицина қызметкерлері көмекке келеді.
Мамандардың осындай еңбегін елеп-ескеріп, 12 тамыз – Халықаралық жастар күніне орай, Қонаев қаласының әкімі Асхат Бердіханов бүгінгі күннің батырларын марапаттады.
«Жастарымыз әр салада жетістіктерге жетіп, туған қаламыздың дамуына лайықты үлес қосып келеді. Қала әкімдігі әрқашан белсенді, мақсатшыл жастарды демеп, олардың бастамаларына қолдау көрсетуге дайын. Сіздерді Халықаралық жастар күнімен құттықтаймын!» — деді әкім
Басқосуда Алматы облысының әкімі Марат Сұлтанғазиевтің Алғыс хаты су бетінде өнер көрсетіп, қаламыздың атын республикалық және халықаралық деңгейде танытып жүрген Флайбордтан спорт шебері Олеся Колесниченкоға табыс етілді.
Ал қала әкімінің Алғыс хатымен:
• 8 азаматты судан шығарған құтқарушы Бекзат Рахимжанов;
• 6 азаматты судан шығарған Бақдәулет Тұрсын;
* жансақтау бөлімінің дәрігері Рият Бакриев және кіші медицина қызметкерлері Бақжан Іскендір, Қанат Арынбаев;
• қаламыздағы коммуналдық қызметтердің тоқтаусыз жұмыс істеуіне үлес қосқан энергетик Бекзат Тәңірберген;
• «Қонаев Су Арнасы» МКК қызметкері Дәулет Ағайдаров;
• «Қонаев Жылу орталығы» МКК электрожөндеушісі Руслан Макатьев марапатталды.
Жиын соңында реанимотолог Рият Бакриев те жастарды мерекемен құттықтап, мамандығының қыр-сырымен бөлісті.
«Біздің бөлімге адамдар үнемі шұғыл жағдайларда түседі. Осы шомылу маусымында 30-ға жуық адамның өмірін құтқарып қалдық. Соның ішінде есімде қалғаны жасы үшке жетпеген баланың оқиғасы болды. Ол балада жансақтау бөліміне түспей тұрып, бір рет клиникалық өлім болған, кейіннен барлық дәрігерлер күш біріктіріп, жанын алып қалдық. Мұнда жедел жәрдем бригадаларының да еңбегін айта кету керек. Олар бізге дейін адамдарға алғашқы көмекті көрсетіп, дәрі-дәрмекті егіп, қажет болған жағдайда жасанды тыныс алу аппаратымен алып келеді. Ары қарай науқастарға күндіз-түні біз қараймыз», — деді дәрігер.
Айтуынша, суға батудың ең көп себебі – алкогольдік өнімдерді қабылдау.
«Суға бату диагнозымен түскен ересектердің 70-80 пайызында алкогольді мас күйде болу дерегі тіркелді. Бұл – адамдардың өз өміріне бей-жай қарайды деген сөз», — деді Рият Бакриев.
Сондай-ақ ол қазақстандық жастарды мерекесімен құттықтады.
«Барша Қазақстан жастары күні құтты болсын! Олар – ел болашағы, сондықтан жастар білімді, білікті болуын тілеймін», – деді ол.
Салтанатты жиын жастардың естелік суретке түсуімен өз мәресіне жетті.
