Өскеменде жанармай құю бекетінде ер адамның отпен «ойыны» үлкен өртке айнала жаздады. Оқиға қарапайым бейқамдықтан басталды: көлігін жанармаймен толтырып тұрған жүргізуші сол сәтте қолындағы оттықты шертуді жөн көрген. Алайда бензобактың қасында ашық оттың неге апаратынын ол ескермеген сыңайлы.
Кенеттен от тұтанып, ер адам қолынан күйік алды. Одан ары қарайғысы — нағыз үрей. Ол шошып, жанармай шлангісін жұлып алған. Салдарынан бензин көліктің артына және жерге төгілді. Жанған от көліктің артқы бөлігі мен дөңгелегін шарпыды. Абырой болғанда, өрт дер кезінде сөндірілді.
Қалалық төтенше жағдайлар басқармасы мұндай жауапсыз әрекет қайғылы оқиғаға себеп болуы мүмкін екенін ескертті. Қазір бұл азамат ҚР Әкімшілік құқықбұзушылық кодексінің 410-бабы бойынша жауапқа тартылды.
Құтқарушылардың айтуынша, жанармай құю бекеттері — өрт қаупі өте жоғары аймақтар. Мұнда темекі тартуға, ашық от пайдалануға, қозғалтқышы жұмыс істеп тұрған көлікті жанармаймен толтыруға тыйым салынған. Сондай-ақ найзағай кезінде жанармай құю да – үлкен қауіп.
Бұл жағдай – қарапайым ереже мен сақтықты елемеудің салдары неге апаратынын анық көрсететін сабақ.
