Sona.kz

Метка: Антикор

  • Жемқорларға қатаң жаза қолданылуы мүмкін

    Жемқорларға қатаң жаза қолданылуы мүмкін

    Енді жегі құрттай болған жемқорлардың елден шығуына тыйым салынуы ықтимал.

    – Айта кетейін, бұл бірінші рет көтеріліп жатқан сұрақ емес, бұл бізде баяғыдан бері талқылануда. Бұл бастама бұрыннан қарастырылуда. Бұл бағыттағы жұмыс жалғасуда, тиісті ұсыныстар бар, – деді Данияр Бигайдаров.

    Агенттік өкілінің сөзінше, парамен ұсталғандарды елден шығармау мәселесі басқа да құзырлы органдармен бірлесе қаралып жатыр.

    – Талқылау нәтижесі көрсетеді. Бұл бағыттағы жұмысты біз ғана қабылдай алмаймыз, мұны бүкіл мемлекеттік орган, аппарат қабылдауы тиіс. Депутаттар қолдаса, әрине, енгізілуі мүмкін, – деп сөзін қорытындылады ол. 

  • Бұрынғы мәдениет вице-министріне қатысты тергеу аяқталды

    Бұрынғы мәдениет вице-министріне қатысты тергеу аяқталды

    Сыбайлас жемқорлыққа қарсы қызмет қоғамда заңдылық пен тәртіп қағидатын қамтамасыз ету, сондай-ақ жоғары лауазымды тұлғалар арасындағы сыбайлас жемқорлықты жою бойынша жұмыстарын жалғастыруда. Осылайша, Агенттік Мәдениет және спорт министрлігінің бұрынғы вице-министрі Ерлан Қожағапановты және мердігер ұйым басшылығына қатысты ауыр қылмыс жасағаны бойынша тергеуді аяқтады.

    – Олар қызметтік өкілеттіктерін асыра пайдаланды және 1 млрд теңгеден астам қаражатты жымқырды деп айыпталуда. Өткен жылдың 13 желтоқсанында Бас Прокуратура күдіктілерді сотқа берді. Қылмыстық-процестік кодекстің 201-бабына сәйкес өзге ақпарат жария етуге жатпайды, – делінген Антикор таратқан ақпаратта.

    Айта кетейік, Конституцияның 77-бабы 3-тармағының 1-тармақшасына және Қылмыстық-процестік кодекстің 19-бабы 1-бөлігіне сәйкес, қылмыстық құқық бұзушылық жасаудағы кінәсі соттың заңды күшіне енген үкімімен белгіленгенге дейін әрбір адам кінәсіз деп есептеледі.

    Еске салсақ, былтыр наурыз айында Сыбайлас жемқорлыққа қарсы қызмет сотқа дейінгі тергеп-тексеру шеңберінде бұрынғы Мәдениет және спорт вице-министрі ауыр сыбайлас жемқорлық қылмыс жасады деген күдікпен ұсталғанын растады.

    Кейіннен оның 2 ай қамауда отыратыны хабарланды.

     

  • Алматыда кеден зертханасының басшысы сотталды

    Алматыда кеден зертханасының басшысы сотталды

    Алматы қаласының Алмалы аудандық соты Қалалық орталық кеден зертханасының басшысы А. Сатыбалдиев пен бас маман Әлібеков Б-ға қатысты үкім шығарды. 

    Антикор мәліметінше, олар қызметін пайдаланып, бірнеше рет пара алғаны үшін ұсталған. «Олар кәсіпкерлік субъектілерінің өкілдерінен кеден сарапшыларының қорытындыларын жеделдетіп бергені үшін бірнеше рет пара алғаны үшін кінәлі деп танылды. Сатыбалдиев пен Әлібековке мемлекеттік және квазимемлекеттік мекемелерде қызметте лауазымдарды атқару құқығынан өмір бойына айыра отырып, әрқайсысына 7 жыл бас бостандығынан айыру жазасы тағайындалды» делінген хабарламада.

    Сонымен қатар сот үкімі бойынша, кеден брокерлері Николас В., Казанцева С. және Гаруни С-ға пара бергені үшін айыппұл салынды. Сот актісі заңды күшіне енген жоқ.

  • Талдықорғандағы жемқорлыққа қарсы шарадан жемқорлықтың иісі аңқып тұр

    Талдықорғандағы жемқорлыққа қарсы шарадан жемқорлықтың иісі аңқып тұр

    Оған өткен бейсенбіде Талдықорғаннан бір жігіт хабарласып, кездесу ұйымдастыру туралы ұсыныс айтқан. «Осы уақытқа дейін Талдықорғанда оқырманмен бес минуттық та кездесу өткізбеппін» деп, шақыртуды қабыл алғанын жазды.

    Алайда Талдықорғанға барған соң кездесу жиыны көзбояушылық екеніне көз жеткізген. Жазушы кездесуге барғанда алдынан «Сыбайлас жемқорлыққа қарсы еркін форматтағы» кездесу деген жазуды көреді. Өзін екі жас қыз қарсы алады. Жазушының «Менің жемқорлыққа қатысым не?» деген сұрағына, күмілжіп дұрыс жауап бере алмаған. «Ақыры келдім ғой» деген ол бір сағаттай отырса да, ешкім келмеген. Ұйымдастырушы – Қоғамдық даму басқармасы мен облыстық антикор екен.

    Ең сорақысы, қайтар кезінде жазушының шотына елу мың теңге түскен. Бір қыз қоңырау шалып, бұл ақшаның қаламақы екенін айтқан. Көзбояушылыққа ренжіген жазушы ақшаны кері салып жібергенін қоса кетті.  Бұған қатысты желідегі оқырмандар да «Жемқорлықтың өзі Антикордан бастала ма? Сыбайлас жемқорлық деген осы..» деген пікір қалдырды.

    Бүгін Жетісу облысының жастар ұйымы жазушы, журналист Қанат Тілеуханның ашына жазған постына қатысты жауап беріпті. Жетісу облысының жастар ұйымы 29 мамырда мемлекеттік сатып алу порталы арқылы аталған ұйым мен Жетісу облысының қоғамдық даму басқармасы (тапсырыс беруші) арасында қоғамда сыбайлас жемқорлыққа қарсы мәдениет пен парасаттылықты нығайтуға бағытталған жобаны ұйымдастыру бойынша көрсетілетін қызметтерді мемлекеттік сатып алу туралы шарт жасалғанын хабарлайды. Техникалық ерекшелікке сәйкес, ұйым жыл соңына дейін кемінде 21 іс-шара өткізуді және ұйымдастыруды жоспарлаған.

    – Өз кезегінде, 17 қазанда техникалық ерекшелікке сәйкес, басқармамен TEDx форматында іс-шараны, сондай-ақ оның шеңберінде спикер ретінде Қанат Тілеухан шақырылған бағдарламаны өткізу келісілді. Алайда, алдын ала келіссөздер барысында біз спикермен күн тәртібіне сай шараның «Сыбайлас жемқорлықсыз болашақ» тақырыбында өтетінің хабардар етпедік және келіспедік. Сондай-ақ, 21 қазанда іс-шараны өткізу күні біз қатысушылардың санын толық қамтамасыз етпедік (кемінде 100 адам), нәтижесінде оғаш себептер орын алды және спикер іс-шараны өткізу орнынан кетті. Жоғарыда айтылғандардың негізінде біз аталған іс-шараның шығындарын өз есебімізге аламыз. Сонымен қатар, іс-шара есептілікке енгізілмейді және қайта өткізіледі, – делінген ұйымның хабарламасында.

    Sona.kz тілшісі жазушы, журналист Қанат Тілеуханға хабарласып, бұл шараға шақырту қайдан түскенін сұрады.

    «Мұндай жағдай менің басымда алғаш рет болып тұр. Көпшілік жұрт мені түсінбей жатыр. «Неге жетіп бардың?» деген сұрақтар қойыпты. Осыны түсіндіре кетейін. Өткен аптада маған «Халық шығармашылығы» орталығынан хабарласты. Бұл орталық Мәдениет басқармасына қарайды. Сосын мен мұны бір шығармашылық кездесу шығар деп ойладым. Алдын ала «Баннерлерің бар ма? Инстаграмдағы парақшама салып қояйын» дедім. Содан жоқ болып кетті, ешкім ештеңе жіберген жоқ. Талдықорғанға барсам, әлгіндей жағдайға тап болдым. Жиынды Қоғамдық даму департаментінің тапсырысымен өткізіп жатыр екен. Бұған «Халық шығармашылығы» орталығының не қатысы бар? Екеуі екі басқа» деп түсінбедім. Тағы бір ойым, түрлі тренинг, семинарлар өтіп жатады ғой. Мысалы, «Жемқорлық әрекетке жоласаң, соңы осындай баппен сотталасың» деген сияқты. Бәлкім, бұлар басқа форматта, шығармашылық тұрғыдан келіп, шақырып отырған шығар» деп бір сағаттай күттім. Сөйтсем, аяғы әлгіндей боп кетті ғой. Бірақ бұл жағдайға қатысты ешкім хабарласып, кешірім сұраған жоқ», – деп жауап берді Қанат Тілеухан.

    Расында, әр саладағы жемқорлықты әшкерелейтін Сыбайлас жемқорлыққа қарсы іс-қимыл агенттігі өз қолын өзі былғап отырған жоқ па? Мемлекеттік ұйым бюджеттің 50 мың теңгесін ешбір ресми құжатсыз банк картасына қалай салып жібереді? Егер бұл шараны өткізу туралы арнайы байқау ұйымдастырылса, қаламақы құжатпен берілуі керек емес пе?! Демек, мұның өзі сыбайлас жемқорлыққа қарсы өткен жиында жемқорлықтың иісі аңқып тұрғанын көрсетпей ме? Ал бұл тұрғыда Сыбайлас жемқорлыққа қарсы іс-қимыл агенттігі не дер екен? Біз бұл мәселе жөнінде тиісті мекемеге хабарласып едік, тек қана ресми түрдегі сауалға ғана жауап беретінін жеткізді.

  • Алматы облысында 100 мың теңге пара алған басшы 2 жылға бас бостандығынан айырылды

    Алматы облысында 100 мың теңге пара алған басшы 2 жылға бас бостандығынан айырылды

    Алматы облысында 100 мың теңге пара алған басшы 2 жылға бас бостандығынан айырылды. Бұл жөнінде Сыбайлас жемқорлыққа қарсы іс-қимыл агенттігінде өткен брифингте мәлім болды.

    «Алматы облысы Еңбекшіқазақ аудандық соты Ауыл шаруашалық министрлігі Ветеринариялық бақылау комитетінің аудандық аумақтық инспекциясының басшысы С.Б. Ермековке қатысты үкім шығарды.Ол жылқыларды Ресей Федерациясына әкетуге ветеринариялық сертификат бергені үшін кәсіпкерден 100 мың теңге сомасында пара алғаны үшін кінәлі деп танылды», — деді антикордың ресми өкілі Данияр Бигайдаров.

    Ведомство өкілінің мәліметінше, сот үкімімен Ермеков мемлекеттік қызметте және квазимемлекеттік сектор субъектілерінде қызмет атқару құқығынан өмір бойына айырылды. Оған 2 жылға бас бостандығынан айыру түріндегі жаза тағайындалды.

    Сот үкімі заңды күшіне енген жоқ.

     

  • Жемқорлықты хабарлағанғандар 15 млн теңгеге дейін сыйақы алады

    Жемқорлықты хабарлағанғандар 15 млн теңгеге дейін сыйақы алады

    Жемқорлық фактілері туралы хабарлаған қазақстандықтар 15 млн теңгеге дейін сыйақы ала алады.

    Антикордың хабарлауынша, сыйақы көлемі 10%-ға жетеді. Бірақ 4000 АЕК- тен (14 млн 768 мың) аспайды дейді.

    «Биыл 9 айда пара беру немесе пара алуы мүмкін фактісі туралы Антикорға хабарлаған 76 азаматқа 28,9 млн теңге көлемінде сыйақы берілді»,- деді  Сыбайлас жемқорлыққа қарсы іс-қимыл агенттігінің ресми өкілі Данияр Бигайдаров. 

     

  • Антикор спорттағы «жалған спортшылар» туралы айтты

    Антикор спорттағы «жалған спортшылар» туралы айтты

    Сондай-ақ, қызмет мәліметінше, Туризм және спорт министрлігі «жалған спортшыларды» бақылауды жоғалтқан.

    «Әлсіз спорттық инфрақұрылым. Қазіргі заманғы спорт нысандарының жетіспеушілігі спортшыларды сапалы даярлау мүмкіндігін шектейді. Бұл әсіресе спорттық нысандар жиі қол жетімді емес немесе қанағаттанарлықсыз жағдайда болатын аймақтарда байқалады», – делінген хабарламада.

    Сонымен қатар, Қазақстан Республикасының дене шынықтыру мен спортты дамытудың 2023-2029 жылдарға арналған тұжырымдамасы кәдімгі жаяу жүргіншілер жолдары мен велосипед жолдарының тапшылығына бағытталған. Ал еліміз бойынша 374,2 мың м2 жабық спорт ғимараттарының, 376,4 мың м2 бассейндердің тапшылығы байқалады (Алматы, Астана, Түркістан және Алматы облыстарындағы ең үлкен тапшылық).

    «Спорт кешендері мен футбол академияларын салудың орнына спорттық ұйымдар легионерлерді ұстауға көп ақша жұмсаған. Мысалы, ең қымбат «Астана» ФК (2018-2023 жылдары 50 миллиард теңге, құрылтайшысы – Спорт және дене шынықтыру істері комитетінің «Қазспортинвест» АҚ «Туризм және спорт индустриясын қолдау қоры» корпоративтік қоры және ҰОК) өзінің футбол академиясы мен инфрақұрылымына ие емес. 6 жыл ішінде (2018-2023 жж.) клуб футбол алаңдары мен үй-жайларды жалға алуға 1,4 миллиард теңге жұмсады», – делінген хабарламада.

    Халықаралық жарыстарға қатысу үшін спортшыларды ашық іріктеудің болмауы. Жоғары жетістіктер спорт саласында процестерді цифрландыру мүлдем жоқ.

    «Нәтижесінде бейінді министрлік қазақстандық спорттың жай-күйі туралы толық деректерді білмейді, жүлдегерлердің, спорт ғимараттарының, спорт секциялары мен жаттықтырушылардың бірыңғай есебін жүргізбейді. Цифрландырудың болмауы жалған спортшыларға спорттық атақтар беруге, жарыстарға қатысу үшін спортшыларды ашық емес және субъективті іріктеуге ықпал етеді».

  • Антикор қазақстандықтарды сақ болуға шақырды

    Антикор қазақстандықтарды сақ болуға шақырды

    Сыбайлас жемқорлыққа қарсы қызмет мессенджерлерде (WhatsApp, Telegram және т.б.) Қазақстан Республикасы Сыбайлас жемқорлыққа қарсы іс-қимыл агенттігінің басшылығы мен қызметкерлерінің атынан жалған аккаунттар құрған және жалған ақпарат тарататын алаяқтарға сенбеу керегін ескертті, деп хабарлайды агенттіктің баспасөз қызметі.

    «Алаяқтар Антикор символикасы бар жалған құжаттарды, хабарламаларды және файлдарды жасап, халыққа жолдап жатыр.  Жалған ақпараттық таратуларға сенбеу, күмәнді сілтемелерге өтпеуді, сондай-ақ қолма-қол ақша аудармауды сұраймыз», – делінген хабарламада.

    Осындай қоңыраулар мен таратуларды алған жағдайда, осы фактілер туралы Қазақстан Республикасының Құқық қорғау органдарына дереу хабарлауды сұрайтынын жазған.

  • Антикор білім беру саласындағы жемқорлықты анықтады

    Антикор білім беру саласындағы жемқорлықты анықтады

    Бұл туралы Сыбайлас жемқорлыққа қарсы іс-қимыл агенттігі төрағасының бірінші орынбасары Ұлан Сарқұлов айтты.

    2022-2023 жылдары саладағы жемқорлықтан мемлекетке 17 млрд теңге залал келген. Мысалы, Талдықорған қаласында білім беру бөлімінің меңгерушісі, бас бухгалтер, бірқатар мектеп директоры 4 млрд теңгеден астам қаржы ұрлаған. Тіпті, (күдіктілерді) ұстау барысында көліктен шамамен 1 млрд теңге табылды. Осыған ұқсас фактілерді өзге өңірлерде де анықтадық, — деді Ұлан Сарқұлов Мәжілістің жалпы отырысынан соң.

    Оның пікірінше, білім берудегі жемқорлықты жою үшін саланы цифрландыру керек.

    Адами факторды болдырмау үшін барлық процесті цифрландыру қажет. Іс-қағазды жүргізгенде манипуляция болмауы шарт. Қазір біз профилді министрліктер және әкімдіктермен түрлі ақпараттық жүйені енгізіп жатырмыз. Нәтижесінде мұндай деректердің айтарлықтай төмендегенін байқап отырмыз, — деді төрағаның орынбасары.

  • Антикор қызметкеріне пара берген имам қызметінен босатылды

    Антикор қызметкеріне пара берген имам қызметінен босатылды

    Оған қатысты іс ҚР Қылмыстық кодексінің 24-бабының 3-бөлігі, 367-бабының 2-бөлігімен (пара беру) қозғалды.

    «Жергілікті мешіттің бірінде қызмет атқарған Н.-ға туысы С. хабарласады. ҚР Сыбайлас жемқорлыққа қарсы іс-қимыл агенттігінің Қызылорда облысы бойынша департаментінің Ұйымдастыру-бақылау басқармасының аса маңызды істер жөніндегі офицері-жедел кезекшісі қызметін атқарған ол Н.-ға қатысты қызметтік хаттың бар екенін алға тартады. Сол мақсатта жалған жасалған қызметтік хатты көрсетеді. Онда сотталушы Н. діни теріс ағым өкілдерімен қарым-қатынаста және олардан ақша алып тұрады деген күдік бар екені мәліметтер бар. Оның екі әйелімен бірге тұратыны жазылып, бала-шағасын асырау үшін ақшаны қайдан алатыны және табыс көзі күмән тудыратыны жөнінде көрсетілген. Осындай мәтінмен жазылған хатта ҚР Сыбайлас жемқорлыққа қарсы іс-қимыл агенттігі төрағасы орынбасарының атынан қол қойылып, мөр басылғандығы көрсетілген», – деп атап өтті Қызылорда қаласының №2 сотынан.

    Ведомство мәліметінше, өз кезегінде туысы сотталушыға хатта көрсетілген тексеру амалдарын жүргізбеу үшін пара ретінде 2 млн теңге талап еткен. Сотталушы Н. өзінің ешқандай теріс ағым өкілдеріне қатысы жоқ екенін айтып, өз қызметі бойынша құқық қорғау органдары тарапынан тексеруді болдырмау үшін пара ретінде 1 000 000 теңге қолма-қол берген.

    «Алайда, ол өзінің және туысының әрекеті жөнсіз екенін ұғынып, өз еркімен осы қылмыс туралы арыз жазған. Туысы өзінің автокөлігі ішінде алған ақшасын кері қайтарып берген. Бұл жасырын тергеу әрекеттерінің нәтижесімен құжатталды. Сотталушы Н. ҚР Қылмыстық кодексінің 24-бабының 3-бөлігі, 367-бабының 2-бөлігімен кінәлі деп танылды. Ал 367 баптың ескертуінде көрсетілген талапқа сәйкес және ҚПК-нің 35-бабы 1-бөлігі 12)-тармағына сәйкес қылмыстық жауаптылықтан босатылды», – деп толықтырды соттан.

    Бұл жөнінде Қазақстан мұсылмандары діни басқармасы төмендегіше түсініктеме берді.

    «Сыбайлас жемқорлыққа қарсы қызмет қызметкеріне пара бергені үшін кінәлі деп танылған имам биылғы жылғы 12 қыркүйектен бастап жұмыс берушінің бастамасымен жұмыстан шығарылған. ҚМДБ өз қызметкерлерінің жеке өміріне араласпайды. Сондықтан имамның әйелінің саны туралы мәліметтер жоқ. Бұған байланысты ҚМДБ отбасын құру мәселелері бойынша ең алдымен ҚР Конституциясы мен қолданыстағы заңнаманы, сондай-ақ шариғат заңдарын басшылыққа алады. Бұрынғы имамның деструктивті діни ағымдардың өкілдерімен байланысы және олардан ақшасын алу туралы ақпарат жоқ», – деп көрсетілген хабарламада.