Sona.kz

Метка: Басты оқиғалар

  • Павлодарда терезеден лақтырылған баланың жағдайы тұрақты

    Павлодарда терезеден лақтырылған баланың жағдайы тұрақты

    Sona.kz Kazinform дерегіне сілтеме жасап хабарлайды, Павлодар облыстық балалар ауруханасы бесінші қабаттан құлап жарақат алған 7 жастағы баланың жағдайы туралы мәлімет берді.

    Дәрігерлердің айтуынша, бала травматология бөлімінде ем қабылдап жатыр. Оған жамбас сүйегінің сынуына байланысты қатаң төсектік режим тағайындалған. Жағдайы — орташа ауыр, бірақ тұрақты. Баланың қасында ауруханада жақын туыстарының бірі бар.

    Павлодар қалалық №1 ауруханасында оның анасының жағдайы туралы да мәлімет берілді. Әйел адам политравма бөліміне ауыстырылды. Жағдайы — орташа ауыр, тұрақты.

    ? Еске салайық, 30 шілде күні сағат 13:00 шамасында Павлодар қаласында әйел адам бесінші қабаттағы терезеден екі баласын лақтырып, кейін өзі де секіріп кеткен.

    Сол күні кіші баланың бүйрегі алынған, операция кезінде жүрегі тоқтаған, бірақ дәрігерлер баланы реанимациялаған.

    Алайда 1 тамыз күні кешке баланың жүрегі қайта тоқтап, қайтыс болды.

    Аталған дерек бойынша қылмыстық іс қозғалды, тергеу амалдары жүргізіліп жатыр.

  • Талғат Мұсабаевпен қоштасу рәсімі 6 тамызда Алматыда өтеді

    Талғат Мұсабаевпен қоштасу рәсімі 6 тамызда Алматыда өтеді

    Sona.kz Алматы қаласы әкімдігіне сілтеме жасап хабарлайды – Қазақстанның Халық қаһарманы, ғарышкер-ұшқыш Талғат Амангелдіұлы Мұсабаевпен қоштасу рәсімі 6 тамыз күні Алматы қаласында өтеді.

    Рәсім офицерлер үйінде (Зенков көшесі, 24) сағат 09:00-де басталады. Джаназа-намаз сағат 10:30-да 28 гвардияшы-панфиловшылар атындағы саябақтың ашық алаңында оқылады.

    Алматы қалалық Қорғаныс күштері ардагерлерінің республикалық қоғамдық бірлестігінің мәліметінше, ғарышкер Кенсай-1 зиратына жерленеді.

  • Қонаевта сенбілікке 400-ге жуық тұрғын қатысты

    Қонаевта сенбілікке 400-ге жуық тұрғын қатысты

    Қонаев қаласында 1-2 тамыз күндері «Таза Қазақстан» республикалық экологиялық акциясы аясында кең ауқымды сенбілік ұйымдастырылды. Оған қала мектептерінің ұжымдары, белсенді ата-аналар, мемлекеттік мекеме қызметкерлері, коммуналдық сала мамандары, қоғамдық ұйымдар мен тұрғындар атсалысты.

    Алғашқы күні қала мектептерінің аумағында санитарлық тазалау жұмыстары жүргізілді. 180-нен астам адам қатысқан сенбілікте 70 қап қоқыс жиналып, қураған шөптер шығарылды.

    2 тамызда сенбілік 7 саяжай аумағында жалғасты. Бұл шараға әкімдік пен коммуналдық қызметтердің 60 маманы, «Ана сәулесі» көпбалалы аналар ұйымы, Ардагерлер ұйымы және Аналар кеңесінің мүшелері белсенді қатысты. Сондай-ақ «Асем» пәтер иелері кооперативінің тұрғындары да өз үлесін қосты.

    Жалпы екі күндік сенбілікке 400-ге жуық адам қатысып, 100 тоннаға жуық қоқыс шығарылды. Жұмысқа 4 жүк көлігі тартылды.

    Аталған шара қала тұрғындарының экологиялық мәдениетін арттырып қана қоймай, қала тазалығын сақтауға әсер етеді. «Таза Қазақстан» акциясы аясында сенбіліктер алдағы уақытта да ұйымдастырылады.

  • Ғарышкер, Халық қаһарманы Талғат Мұсабаев өмірден өтті

    Ғарышкер, Халық қаһарманы Талғат Мұсабаев өмірден өтті

    Ғарышкер, авиация генерал-лейтенанты, Халық қаһарманы Талғат Мұсабаев 74 жасында өмірден өтті.

    Талғат Амангелдіұлы Мұсабаев ғарышқа үш рет ұшқан: 1994, 1998 және 2001 жылдары. Жалпы ғарышта 341 тәуліктен астам уақыт өткізіп, ашық ғарышқа 8 рет шыққан. Ашык кеңістікте өткізген уақыты — 43 сағат 46 минут.

    2007–2014 жылдары ол Қазақстанның Ұлттық ғарыш агенттігін басқарды. Кейін Президент кеңесшісі, Сенат депутаты қызметтерін атқарды. Ғылым мен мемлекетке сіңірген еңбегі үшін Халық қаһарманы атағы беріліп, бірнеше мемлекеттік марапаттарға ие болды.

  • Қазақстандықтардың зейнетақы төлемдері салықтан босатылады

    Қазақстандықтардың зейнетақы төлемдері салықтан босатылады

    2026 жылдан бастап зейнетақы төлемдеріне салық салынбайды

    Sona.kz Azattyq Rýhy-на сілтеме жасап хабарлайды

    2026 жылғы 1 қаңтардан бастап Бірыңғай жинақтаушы зейнетақы қорынан (БЖЗҚ) төленетін барлық зейнетақы төлемдері жеке табыс салығынан (ЖТС) босатылады. Бұл туралы Азаттық рухы БЖЗҚ-ның баспасөз қызметіне сілтеме жасап хабарлады.

    Жаңа Салық кодексіне сәйкес, 2026 жылдан бастап зейнетақы төлемдерінің барлық түрінен, оның ішінде тұрғын үй жағдайын жақсарту немесе емделу мақсатында пайдаланылатын біржолғы төлемдерден де салық ұсталмайды. Алайда бұл жеңілдік Қазақстан резиденті болып табылмайтын азаматтарға қолданылмайды.

    Қолданыстағы тәртіп бойынша, БЖЗҚ-дан алынатын зейнетақы төлемдерінен 10% мөлшерінде ЖТС ұсталады. Бұл салықты алушы бірден немесе зейнеткерлік жасқа жеткенде төлеуді таңдай алады. Аталған ереже 2025 жылдың соңына дейін сақталады.

    Сондай-ақ 2026 жылдан бастап азаматтардың өз пайдасына аударған ерікті зейнетақы жарналары бойынша салықтық шегерімдер жойылады. Бірақ жұмыс беруші тарапынан аударылған ерікті жарналарға салық салынбайды және бұл шығындар корпоративтік табыс салығын есептеу кезінде ескерілетін болады.

  • Майкл Джексонның бір ғана шұлығы $8 000-нан асты

    Майкл Джексонның бір ғана шұлығы $8 000-нан асты

    Майкл Джексонның 1997 жылғы Франциядағы концертінде киген шұлығы аукционда $8 822-ға сатылды.

    Бұл туралы Sona.kz Kazinform-ға сілтеме жасап хабарлайды.

    Әнші ақ түсті, страздармен көмкерілген спорттық шұлықты HIStory турының аясында Францияның Ним қаласында өнер көрсеткен кезінде киген. Аукцион ұйымдастырушысы Аврора Иллидің айтуынша, бұл шұлық концерттен кейін Джексонның грим бөлмесінің жанынан табылған.

    “Бұл Майкл Джексонның жанкүйерлері үшін шын мәнінде культке айналған ерекше зат”, – деді Илли.

    Шұлық бастапқыда 3000–4000 еуроға бағаланған. Алайда, нәтижесінде ол 7 688 еуроға (шамамен 8 822 доллар) сатылды.

    Айта кетейік, бұған дейін Джейн Биркинге тиесілі болған түпнұсқа Hermès сөмкесі Sotheby’s аукционында $10,1 млн-ға сатылып, сауда тарихындағы ең қымбат сөмке атанған.

  • Қонаевқа екі айда 1,5 миллион турист келген

    Қонаевқа екі айда 1,5 миллион турист келген

    Қапшағай су қоймасының жағалауында орналасқан екі негізгі рекреациялық аймақ – Алматы және солтүстік жағалауы – биылғы маусымда ең танымал демалыс орындарына айналды. Алматы жағалауы – ірі қонақ үй кешендері мен жеке жағажайлармен танымал болса, солтүстік жағалау – заманауи инфрақұрылымы бар қоғамдық демалыс аймағы ретінде дамып келеді.

    Абаттандырылған №5, №6 және №7 жағажайларға негізгі жүктеме түсті. Мұнда санитарлық және қауіпсіздік талаптары сақталған: 75 әжетхана, 170 қоқыс контейнері, құтқарушылар мен медицина қызметкерлері кезекшілік етеді. Мысалы, №5 жағажайда 20 адам жұмыс істеп, демалыс күндері 2,5 тоннаға дейін қоқыс шығарылады. №6 және №7 жағажайларында 30 қызметкер, оның ішінде 10 құтқарушы мен медицина қызметкері бар. Бұл жерлерде қоқыс көлемі 3 тоннаға дейін жетеді.

    Жағалаудағы қауіпсіздікті полиция, ТЖ қызметі мен жеке күзет ұйымдары бақылайды. Сонымен қатар, жасанды интеллектке негізделген бейнабақылау жүйелері орнатылған. Әкімдік жазатайым жағдайлардың көбісі рұқсат етілмеген жерлерде болатынын атап өтті, сондықтан тек ресми жағажайларда демалуға шақырды.

    Қалада бүгінде 140-қа жуық туристік нысан жұмыс істейді. Маусым аяқталған соң, №6 және №7 жағажайларын жаңғырту және №8 жағажайды абаттандыру жоспарланып отыр. Жалпы жағалау ұзындығы 6,1 шақырымды құрап, бірыңғай сәулеттік жоспарға сай дамиды.

    2028 жылға дейін қалада құны 300 миллиард теңгеден асатын 11 ірі туристік жоба іске асырылмақ. Олардың қатарында қонақ үй кешендері, ойын-сауық орталықтары, гольф-клубтар және отбасылық демалыс аймақтары бар.

    Қала әкімдігі Қонаевты заманауи, қауіпсіз әрі қолжетімді туристік орталық ретінде дамыту – басым бағыттардың бірі екенін мәлімдеді.

  • Алматылық ер адам “чеддер” ірімшігі үшін 16 жылға сотталды

    Алматылық ер адам “чеддер” ірімшігі үшін 16 жылға сотталды

    Алматы тұрғыны Таиландтан келген “чеддер” ірімшігінің ішіне жасырылған есірткі үшін 16 жылға сотталды.

    Бұл туралы Sona.kz Orda.kz-ке сілтеме жасап хабарлайды.

    Сот материалдарына сәйкес, ер адам Таиландтан халықаралық сәлемдеме алған. Ірімшік түрінде келген жүктің ішінен есірткі және психотроптық заттар табылған. Тергеу барысында ол бұл заттарды өзі пайдаланбақ емес, үшінші тұлғаларға бермек болғаны анықталған.

    «Құқық қорғау және кеден органдары бұл заңсыз әрекетті тарату сатысына жетпей-ақ тоқтатты. Мемлекеттік айыптаушы ауыр жаза тағайындауды сұрап, сот бұл талаппен келісті», — деді Бас көлік прокуратурасында.

    Сот оны аса ірі көлемдегі есірткі заттарын контрабандалық жолмен алып өтіп, таратпақ болды деп танып, орташа қауіпсіздік мекемесінде өтеуге тиіс 16 жылға бас бостандығынан айырды. Үкім заңды күшіне енген жоқ.

  • Сауд Арабиясында аттракцион екіге бөлініп кетті — 23 адам жарақат алды

    Сауд Арабиясында аттракцион екіге бөлініп кетті — 23 адам жарақат алды

    Сауд Арабиясының Таиф қаласында аттракцион апатқа ұшырап, кем дегенде 23 адам зардап шекті.

    Бұл туралы Sona.kz Nur.kz-ке сілтеме жасап хабарлайды.

    Жергілікті ақпарат көздерінің мәліметінше, аттракционның тірегі жоғары жылдамдықпен артқа серпіліп, қарама-қарсы тұрған адамдарға соғылған. Кейбірі ауыр жарақат алса, басқалары биіктіктен құлап, түрлі дене жарақатын алған.

    Куәгерлер жағдайды «қорқынышты және түсініксіз» деп сипаттады. Оқиға орнына жедел жәрдем мен полиция қызметкерлері дереу жетіп, тергеу басталды.

  • Дәрігерлерге жасалған шабуылдардан кейін күзет күшейтілді

    Дәрігерлерге жасалған шабуылдардан кейін күзет күшейтілді

    Астанадағы алты ауруханада медицина қызметкерлерін қорғау мақсатында тәулік бойы полиция бекеттері қойылды.

    Бұл туралы Sona.kz Tengrinews.kz-ке сілтеме жасап хабарлайды.

    Қалалық қоғамдық денсаулық сақтау басқармасының мәліметінше, кезекшілік полиция департаментімен бірлесіп ұйымдастырылған. Криминалдық және жергілікті полиция қызметкерлері енді қабылдау бөлімшелерінде кезекшілік атқарады — дәл осы жерлерде жанжалдар жиі туындайды.

    «Азаматтар тарапынан құқықбұзушылық орын алса, полиция заң шеңберінде әрекет етеді. Соңғы уақытта дәрігерлерге қарсы негізсіз агрессия көбейіп кетті. Костанай облысындағы резонансты жағдай — мұның дәлелі», — деді басқарма басшысының орынбасары Қадыр Жарасбаев.

    Қазіргі уақытта үш ересектерге арналған көпбейінді ауруханада, №2 қалалық балалар ауруханасында және екі республикалық клиникада күзет ұйымдастырылған. Жақын күндері №1 және №3 балалар ауруханаларында, сондай-ақ перинаталдық орталықта да посттар қойылмақ.

    Медқызметкерлер бұл шешімді оң бағалап отыр.

    «Бекеттердің қойылуы бізге сенімділік береді. Күніне 400-ге жуық адам түрлі жарақатпен бізге жүгінеді. Пациенттер ғана емес, туыстары да агрессия танытады. Әркімге шұғыл көмек қажет, бірақ Triage жүйесі бойынша әр науқастың өз кезегі бар. Өкінішке қарай, дәрігерге деген құрмет жиі байқалмайды», — дейді №2 қалалық көпбейінді аурухананың қабылдау бөлімінің меңгерушісі Мәдина Тәбиолдина.