Sona.kz

Метка: Басты оқиғалар

  • Ауа райы: Тұман түсіп, жел күшейеді

    Ауа райы: Тұман түсіп, жел күшейеді

    Синоптиктердің болжамынша, бүгін ҚР аумағының басым бөлігі антициклон сілемінің ықпалында болады. Осыған байланысты күн жауын-шашынсыз болып, тек елдің солтүстігінде, батысында ғана аздаған қар жауады.

    Республика бойынша тұман түсіп, елдің батысында көктайғақ болады, Алакөл көлдері ауданында жел күшеюі ықтимал.

    Астанада жауын-шашынсыз, күн бұлтты болады. Кейде тұман. Оңтүстік бағыттағы жел секундына 2-7 метрді құрайды. Ауа температурасы түнде 12-14 градус, күндіз 6-8 градус аяз.

    Алматыда да бұлтты, жауын-шашынсыз. Түнде және таңертең тұман. Жел секундына 0-5 метр. Ауа температурасы түнде 10-12 градус, күндіз 1-3 градус аяз.

    Шымкентте де бұлтты, жауын-шашынсыз. Түнде және таңертең тұман. Оңтүстік-шығыс жел секундына 3-8 метр. Түнде ауа температурасы 6-8 градус аяз, күндіз 5-7 нрадус жылы.

  • Алматыда жаңа автобус бағыттары іске қосылады

    Алматыда жаңа автобус бағыттары іске қосылады

    Алматыда мегаполистің агломерациямен көліктік байланысын арттыру аясында қалалық мобилділік басқармасы 25 желтоқсаннан бастап тағы 2 қала маңындағы қоғамдық көлік бағытын іске қосады. Үлкен сыйымдылығы бар автобустар Алматыдан облыстың Қарасай және Талғар аудандарына жіберіледі.

    Мәселен, №256 маршрут «Мәдениет және демалыс саябағы – Ақтас кенті» қатынасымен және №249 маршрут «Төле би/Ясауи» автостанциясы» – Шамалған кенті» қатынасымен «FOTON» маркалы сыйымдылығы жоғары автобустармен қызмет көрсетілетін болады. Тасымалдаушы «ECOBUS SERVICE» ЖШС, жоспарлы шығу-жылжымалы құрамның 7 бірлігі.

    Жол жүру құны қалалық маршруттардағыдай – 120 теңге. Барлық автобустар Onay электронды билет жүйесімен жабдықталған.

    Айта кету керек, автомобиль көлігімен жолаушылар мен багажды тасымалдау ережелеріне сәйкес бұл маршруттар тасымалдаушыларға қызмет көрсету конкурстары өткізілгенге дейін берілген және тестілік режимде жұмыс істейтін болады. Қорытындысы бойынша қозғалыс сызбаларына жолаушылар ағыны мен халықтың қажеттілігін ескере отырып өзгерістер енгізілетін болады.

  • Медицина қызметкерлерін соққыға жыққандар 3 жылға дейін сотталуы мүмкін

    Медицина қызметкерлерін соққыға жыққандар 3 жылға дейін сотталуы мүмкін

    Денсаулық сақтау министрлігі медицина қызметкерлерін ұрып-соққаны үшін қылмыстық жауапкершілікті енгізуді көздеп отыр.

    Денсаулық сақтау министрлігі Ғылым және адами ресурстар департаментінің директоры Алмагүл Қайышева дәрігерлерге кезекшілік кезінде шабуыл жасағаны үшін жазаны қатайтатын жаңа түзетулер әзірленгенін мәлімдеді.

    «Қылмыстық жаза болады. Қазір қолданыстағы заңнамаға сәйкес, жаза 10-нан 15 АЕК-ке дейінгі айыппұл немесе 15 тәулікке дейін қамауға алу болса, енді жазаның нақты мерзімдері үш жылға дейін бас бостандығынан айыру немесе 3000 АЕК көлемінде болады», – деді Қайышева.

    Сонымен қатар медицина қызметкеріне шабуыл жасаған адам кем дегенде 800 сағатқа қоғамдық жұмысқа тартылуы мүмкін. Денсаулық сақтау министрлігі медицина қызметкерлерін ұрып-соғу фактілерінің көбеюіне байланысты жазаны қатайту қажет деп санайды.

    2019-2023 жылдар аралығында фельдшерлер, дәрігерлер мен медбикелерге 158 рет шабуыл жасалған. Бұл – тек ресми статистика. Ал 2024 жылы тоғыз жағдай тіркелген. Олардың соңғысы Қостанайда болды.

    Өткен аптада шақырту кезінде жедел жәрдем фельдшерін екі әйел соққыға жыққан. 24 жастағы Анель Баймурзина науқастың өмірін сақтап қалмақ болғанымен, жүрегі тоқтап қалған. Артынша оның қыздары медицина қызметкеріне шабуыл жасаған. Жергілікті полиция департаменті «шабуыл жасау» бабы бойынша қылмыстық іс қозғады.

    Денсаулық сақтау министрлігінің мәліметінше, медициналық қауымдастық дәрігерлерді қорғау үшін заңнамаға жеке нормаларды енгізу қажет деп санайды. Жаңа заң жобасы қазір келісу рәсімінен өтіп жатыр және жақын арада парламентке жіберіледі. Шенеуніктердің ұсынысын депутаттар қолдап отыр.

  • Жетісу облысында 6 мыңға жуық тұрғын табиғи газға қол жеткізді

    Жетісу облысында 6 мыңға жуық тұрғын табиғи газға қол жеткізді

    Жетісу облысында 5735 тұрғыны бар екі ауылдың тұрғындары газға қосылуға мүмкіндік алды. Жаңа жыл қарсаңында Ескелді ауданының Шымыр және Абай ауылдарына көптен күткен көгілдір отын жеткізілді.

    – Бүгінде Ескелді ауданының 14 елді мекені газдандырылды. Газға 39 мың адам немесе 10 354 абонент қол жеткізді. Көкжазық, Теректі, Қаратал, Жастар, Ақтасты ауылдарында газ желілерін салу жұмыстары жүргізілуде. Келесі жылға Қайнарлы, Жалғызағаш ауылдарын газдандыру жұмыстары жоспарланған, – деді облыстық энергетика және тұрғын үй-коммуналдық шаруашылық басқармасы басшысының орынбасары Азамат Бейісбаев.

    Салтанатты жағдайда өткен газ қосу шарасына қатысқан ауыл тұрғындары пікір бөлісті.

    – Мен 50 жылдан бері осы ауылда тұрамын. Бүгін біздің ауылымызда қуанышты жаңалық – табиғи газ жеткізілді. Енді тұрмысымызды жақсартуға оң ықпалын тигізеді деп ойлаймын, – деді Абай ауылының тұрғыны Людмила Ясинская.

    Ал Ескелді ауданы Шымыр ауылында зейнеткер Асылбике Аязбаеваның шаңырағы алғашқылардың бірі болып газға қосылды. Бұл үйді мердігер ұйым демеушілік көрсетіп, газға тегін қосып берді.

    «Жасым 82-де. Өмір бақи көмір тасып, от жағып келгенбіз. Оның өз қиындығы бар. Енді, міне, көптен күткен газға қолымыз жетті. Үйімді газға қосып берген азаматтарға рахметімді айтамын», – деді А. Аязбаева.

    Атап өтсек, Ескелді ауданының Шымыр, Абай ауылдарында газ құбырларын салу жұмыстары өткен жылдың қараша айында басталған. Газ құбырының жалпы ұзындығы – 47 шақырым.

    Еске салсақ, Жетісу облысының газдандыру деңгейі жыл қорытындысында 56,9% құрап отыр.

  • Черчесов орнынан кетпейді – ҚФФ мәлімдеме жасады

    Черчесов орнынан кетпейді – ҚФФ мәлімдеме жасады

    Федерация мәліметінше, Станислав Черчесовтің қызметінен кетуі туралы бұқаралық ақпарат құралдарында жарияланған ақпарат шындыққа жанаспайды.

    «Қазіргі таңда Станислав Черчесов Ұлттық құраманың бас бапкері қызметін жалғастырып, Қазақстан футбол федерациясымен келісімшарт бойынша жұмыс істейді. Қазақстан футбол федерациясының баспасөз қызметі тек ресми ақпарат көзіне, федерацияның ресми сайты мен әлеуметтік желілерінде жарияланған ақпаратқа сенуге шақырады», – делінген федерация хабарламасында.

    Айта кетейік, осыған дейін Станислав Черчесовтің жұмысынан кетуі мүмкін екендігі айтылған еді.

  • Су саласының 105 маманы Қытайда біліктілігін арттырады

    Су саласының 105 маманы Қытайда біліктілігін арттырады

    Келесі жылы «Қазсушар» мекемесінің 105 маманы ҚХР-да біліктілік арттыру курстарынан өтеді.

    Су ресурстары және ирригация министрлігінің мәліметінше, ведомство басшысы Нұржан Нұржігітов қытайлық Power China компаниясының Қазақстандағы өкілдерімен кездесу барысында тиісті келісімге қол жеткізген.

    Ақпаратқа сәйкес, арнайы курстар тоқсан сайын өтеді. Сәуірде Қытайға 30 маман барады. Содан кейін 25 адамнан жасақталатын топтар әр 3 ай сайын біліктілік арттыру бағдарламасына қатысады. Жақын арада тараптар оқу бағдарламаларының тақырыбы мен бағыт-бағдарын айқындайды.

    Шетелдік компаниялармен және өзге мемлекеттермен келіссөздер барысында міндетті тақырыптың бірі – бірлесіп кадр даярлау және мамандардың біліктілігін арттыру. Біздің мамандар Қытайда мол тәжірибе жинайтынына сенімдімін. Биыл министрлік су шаруашылығы қызметкерлерінің біліктілігін арттыру жұмысын белсенді жүргізді. Мысалы, жыл басынан бері 500-ден астам адам мамандандырылған орталықтарда курстан өтті. Бұл бастапқы жоспардан 12%-ға артық, – деді Нұржан Нұржігітов.

    Сондай-ақ, министр қытайлық кәсіпкерлермен Power China компаниясының елімізде су қоймаларын салу және реконструкциялау жұмыстарына қатысу мәселесін талқылады. Шетелдік делегаттар Қазақстанда жаңа су шаруашылығы инфрақұрылымына инвестиция салуға дайын екендіктерін білдірді.

  • Қорғаныс министрі самбо федерациясын басқарады

    Қорғаныс министрі самбо федерациясын басқарады

    Руслан Жақсылықов Қазақстанның спорттық және жауынгерлік самбо федерациясын басқаратын болды.   

    Қорғаныс министрлігінің хабарлауынша, сайлау Астанадағы федерацияның кезектен тыс отырысында өтті, онда Жақсылықовтың кандидатурасы бірауыздан қолдау тапты.

    «Қоғамдық бірлестіктің жаңа басшысы Руслан Жақсылықов – дзюдодан КСРО спорт шебері, бірнеше дүркін чемпион, самбо мен дзюдодан республикалық және халықаралық жарыстардың жүлдегері» деп қорғаныс ведомствосы министрдің жаңа лауазымын түсіндірді.

    Генерал-полковник алдағы жылдарға арналған жоспарларын жариялады. Жақсылықовтың айтуынша, ол самбоны әскери қызметшілер мен құқық қорғау органдары қызметкерлерін даярлауға енгізгісі келеді.

    «Алда көп жұмыс бар. 2025 жылы самбо ТМД әскери-спорттық ойындары мен ҚР Қарулы Күштерінің спартакиадалары бағдарламасына енгізіледі. Сондай-ақ Бауыржан Момышұлы атындағы Алматы әскери-спорт колледжінде бөлімше ашу жоспарлануда, онда көп балалы отбасылардан, әскери қызметшілерден және ауылдық жерлерден келген балалар басымдыққа ие болады. Жаппай даму мақсатында әскер қатарына маман-нұсқаушыларды шақырамыз», – деп министрлік басшысы мәлімдеді.

  • Қазақстанда ЖИ бойынша білім беру бағдарламалары әзірленеді

    Қазақстанда ЖИ бойынша білім беру бағдарламалары әзірленеді

    Үкімет отырысында премьер-министр Жасанды интеллектіні дамытудың 2029 жылға дейінгі тұжырымдамасы мен Жасанды интеллект туралы жаңа заң аясында цифрлық трансформациялау және тиісті шешімдерді енгізу жұмыстарын күшейту үшін бірқатар тапсырма берді.

    Халықтың жасанды интеллект саласындағы жаңалықтардан хабардарлығының төмендігін ескере отырып, Цифрлық даму, инновациялар және аэроғарыш өнеркәсібі министрлігіне қолданыстағы цифрлық шешімдерді одан әрі жетілдіру және оларды пайдалану туралы жұртшылықты ақпараттандыру міндеті қойылды.

    Сонымен қатар премьер-министр Цифрлық даму министрлігіне өңір әкімдерімен бірге келесі жылы мемлекеттік органдардың қызметкерлерін жасанды интеллект құралдарына оқыту жөнінде шаралар қабылдауды тапсырды. Ғылым және жоғары білім министрлігі жасанды интеллект бойынша білім беру бағдарламалары мен курстарын дайындауы керек.

  • Кибералаяқтыққа қатысы бар 2,1 мың sim-карта тәркіленді

    Кибералаяқтыққа қатысы бар 2,1 мың sim-карта тәркіленді

    ІІМ киберқылмысқа қарсы іс-қимыл департаменті мен Қарағанды облысы ПБ жүргізген жедел-іздестіру іс-шараларының нәтижесінде жақын шетелдердің бірінің 22 жастағы азаматын ұстады. Оған ұялы байланыс абоненттік құрылғыларының идентификациялық кодтарын заңсыз өзгертіп, азаматтарды алдау мақсатында пайдаланған деген айып тағылып отыыр.

    Тінту барысында дыбыс күшейткіш ретінде жасырылған арнайы құрал-жабдық тәркіленді. Бұл құрал Қазақстан Республикасы азаматтарына банктер мен құқық қорғау органдарының қызметкерлері атынан қоңырау шалып, алдау және алаяқтық әрекеттер жасау үшін пайдаланылған, – делінген полиция хабарламасында.

    Күдіктінің жалдамалы пәтерінен 2100-ден астам sim-карта, екі ноутбук, екі мобильді телефон, планшет табылды. Тәркіленген құрал-жабдыққа қатысты 48 абоненттік нөмірден азаматтарға қоңыраулар жасалғаны анықталды.

    Қазір күдіктінің басқа алаяқтық эпизодтарға қатысы бар-жоғы тексеріліп жатыр. Аталған факт бойынша қылмыстық іс қозғалды, – делінген хабарламада.

    Күдікті прокуратураның келісімімен қамауға алынды. Тергеу жалғасып жатыр.

  • 271 азаматқа «Болашақ» халықаралық стипендиясы тағайындалды

    271 азаматқа «Болашақ» халықаралық стипендиясы тағайындалды

    Мемлекеттік кеңесші Ерлан Қариннің төрағалығымен Шетелде кадрлар даярлау жөніндегі республикалық комиссияның кезекті отырысы өтті.

    Бұл туралы Ақорданың баспасөз қызметі хабарлады. Жиын барысында 271 азаматқа «Болашақ» халықаралық стипендиясын тағайындау туралы шешім қабылданды. Стипендия иегерлерінің 136-сы – магистратура, 8-і докторантурада оқиды. Сондай-ақ 127 азамат әлемнің ең үздік университеттері мен орталықтарында тағылымдамадан өтеді.

    Комиссия мүшелері басымдық беріліп отырған мамандықтарға ерекше назар аударды. Яғни стипендия иегерлерінің 65 пайызы – жаратылыстану-техникалық, ал 35 пайызы әлеуметтік-гуманитарлық бағыттар бойынша білімін жетілдіреді.

    Сонымен қатар 170 азамат шетелдің жетекші ғылыми-зерттеу орталықтарында ғылыми тағылымдамадан өтуге стипендия алды.

    Ерлан Қарин биыл былтырға қарағанда тағылымдамадан өтуге екі есе, инженерлік-техникалық мамандықтар бағытына алты есе көп өтініш түскенін атап өтті. Бұл Мемлекет басшысының инженерлік-техникалық білім беруді дамытуға және қолдауға бағытталған бастамасының өзекті әрі заман талабына сай екенін көрсетеді.