Sona.kz

Метка: Басты жаңалықтар

  • Президент: Бала смартфон пайдаланған кезде қатаң қадағалау қажет

    Президент: Бала смартфон пайдаланған кезде қатаң қадағалау қажет

    Мемлекет басшысы Депутаттар форумында бала тәрбиесіне қатысты пікір білдірді.

     «Балалардың қауіпсіздігін қамтамасыз ету, құқықтарын қорғау, олардың жан-жақты дамуы үшін қолайлы жағдай жасау – мемлекеттік саясаттың ең басты басымдығы. Салалық министрлік болсын, әкімдік немесе құқық қорғау құрылымы болсын, уәкілетті органдардың бәрі өз қызметін мүлтіксіз орындап, жұмысын үйлестіруі керек. Бақытты балалықтың негізі отбасы институты екенін және солай болып қала беретінін түсінген жөн. Біздің қоғам қазір бетпе-бет келген көптеген мәселе мен кеселдің түп-тамыры ата-аналардың бала тәрбиесіне өз деңгейінде араласпауынан басталады. Ұрпақтың цифрлық дүниелерге тәуелді болуы мен виртуалды әлемге шектен тыс құмартуы нағыз дертке айналды», — деді Мемлекет басшысы. 

    Президент балаларға қатысты кез келген қайғылы жағдайдың жанына бататынын жеткізді.

    «Балаларға қатысты кез келген қайғылы жағдай менің жаныма батады. Мемлекеттік органдардың назарын дереу осындай жағдайларға аударып, тиісті тапсырмалар беріп, орындалуын тұрақты бақылауымда ұстаймын. Сөз жоқ, заманауи технологиялар дамуға даңғыл жол ашады, сондай-ақ өмірімізге айтарлықтай қауіп те төндіреді. Танымал әлеуметтік желілер балаларды ғана емес, үлкендерді де зомбиге айналдыруы мүмкін. Ата-аналар балаларының тәрбиесін мемлекетке немесе мектепке ысыра салмауы керек. Гаджеттердің құрсауында қалдыруға тіпті болмайды. Балаларына цифрлық гигиенаның қарапайым ережелерін үйретуге ата-ана жауапты. Ұл-қыздарымызға көңіл бөлу, бірге уақыт өткізу, оларды алаңдатқан мәселелер жайында әңгімелесу маңызды. Баланың смартфон немесе компьютер пайдаланған кезінде не істеп жатқанын қатаң қадағалау қажет»., -деді Мемлекет басшысы Қасым-Жомарт Тоқаев. 

    Еске салайық, қазір Астанада барлық деңгейдегі мәслихаттар депутаттарының ІІ республикалық форумы өтіп жатыр.

  • Тоқаев референдум туралы маңызды мәлімдеме жасады

    Тоқаев референдум туралы маңызды мәлімдеме жасады

    Бірнеше күннен кейін өтетін жалпыұлттық референдум Қазақстанда соңғы бес жылда болған ауқымды өзгерістердің тағы бір мысалы.

    «Орайлы сәтті пайдаланып, бірқатар өзекті мәселеге тоқталғым келеді. Бірнеше күннен кейін өтетін жалпыұлттық референдумда халқымыз Қазақстанда атом электр станциясын салу қажет пе, әлде қажет емес пе деген мәселені шешеді. Дауыс беру нәтижесі қандай болса да, бұл – айтулы уақиға. Алдағы референдум – Қазақстанда соңғы бес жылда болған ауқымды өзгерістердің тағы бір мысалы, «Халық үніне құлақ асатын мемлекет» тұжырымдамасының жарқын көрінісі. АЭС құрылысына қатысты өз ұстанымымды бұған дейін бірнеше рет айттым. Әлемдегі прогрестен шет қалмау үшін біз бәсекелестікте өз артықшылықтарымызды пайдалануымыз керек. Азаматтар қолдап дауыс берген жағдайда, бұл Тәуелсіз Қазақстанның бүкіл тарихындағы ең ірі жобаға айналады», – деді Тоқаев.

    Президенттің пікірінше, атом электр станциясын салу – ұзақмерзімді жоба.

    «Алайда бұл бастама еліміздің орнықты дамуын онжылдықтарға ілгерілетеді, энергетикалық дербестігімізді нығайтады, экономиканың, ғылым мен білімнің түрлі саласын өркендетуге тың серпін береді, сондай-ақ инженерлер шоғыры мен әртүрлі бейіндегі мамандар легін қалыптастыруға ықпал етеді. Заманның талабы осы. Демек, оның пайдасын қазіргі жастарымыз бен болашақ ұрпақ көреді. Осы ретте АЭС құрылысына қолдау білдіріп жатқан Халықтық штабтың жұмысын ерекше атап өткім келеді. Штаб саяси партиялар мен түрлі қоғамдық ұйымдардың өкілдерін, сондай-ақ ғалымдарды, сарапшыларды, өндіріс мамандары мен кәсіпкерлерді біріктірді. Азаматтардың ұйысып, ортақ іске жұмыла кірісе алатынын көрсетеді. Дамуға ұмтылыс – ұлтымыздың ең жақсы қасиеттерінің бірі. Сондықтан біз ешқандай қиындыққа қарамастан, алға қарай батыл қадам басуымыз керек. Тағы да қайталаймын. Алдағы референдум тәуелсіздік жылдарындағы ең маңызды уақиға болады және еліміздің одан әрі дамуына тікелей әсер етеді», – дейді Тоқаев.

    Осы ретте президент қазақстандықтарға қарата айтқан сөзінде демократия үздіксіз процесс екенін алға тартты.

    «Отандастарымызға айтарым: демократия – үздіксіз жүретін үдеріс. Оған тұрақты түрде атсалысу қажет. Осыны қаперден шығармауымыз керек. Әлемдегі кез келген табысты демократиялық қоғам айналасына бей-жай қарамайтын азаматтардың арқасында ғана дамиды, өміршең болады.

    Әр азаматтың әл-ауқаты мен Отанымыздың тағдыры тек өзіміздің қолымызда. Балаларымыз бен немерелеріміз біздің жетістіктерімізді еселеуі үшін келер ұрпаққа қажетті жағдай жасау – ортақ парызымыз. Қазақстанның болашағы – жастардың қолында. Мен бұл туралы үнемі айтып жүрмін. Жерімізге егілген әр талдың игілігін көретін де – жас ұрпақ.

    Бір сөзбен, не істесек те, бәрін еліміздің ертеңі үшін істейміз. Сондықтан біз балалардың денсаулығына, олардың білімі мен тәрбиесіне бүкіл ел болып ерекше көңіл бөлуіміз керек. Мемлекет осы бағытта нақты шаралар қабылдады, яғни қаражат бөліп, қажетті инфрақұрылым салуда. Жалпы, бұл жұмыс қарқынды жүріп жатыр деуге болады, бірақ, алдымызда тұрған міндеттер ауқымды, әлі де атқаратын шаруа көп», – деді ол бұл мәселеге қатысты ойын түйіндей келе.

  • Президент Қасым-Жомарт Тоқаев депутаттар форумына қатысты 

    Президент Қасым-Жомарт Тоқаев депутаттар форумына қатысты 

    Президент Қасым-Жомарт Тоқаев барлық деңгейдегі мәслихаттар депутаттарының ІІ республикалық форумына қатысты. 

    «Баршаңызды мәслихат депутаттарының ІІ республикалық форумының ашылуымен құттықтаймын!

    Шын мәнінде, бұл жиынның мән-маңызы айрықша. Депутаттар – өзекті мәселелерді ашық айта білетін, азаматтардың қоғамдағы ой-пікірін атқарушы билікке тікелей жеткізетін қауым. Бір сөзбен айтсақ, депутат болу – халықтың үні болу деген сөз. Мысалы, жаңа ғана сөз сөйлеген азаматтар өте маңызды мәселелерді көтерді. Әсет Махамбетовтің білікті маман ретінде атом энергиясы туралы пікірі өзекті. Сырымбек Сәрсембаев моно-қалаларды дамыту жөнінде жақсы ұсыныстар айтты. Ринат Заитовтың ұлттық өнерді қолдау туралы пайымдары да орынды. Депутаттар Юлия Кучинская және Евгений Буслаев та өте өзекті пікірлерін айтты.

    Мәслихат – мемлекеттік биліктің өте маңызды тармағы. Аймақ жұртшылығының тыныс-тіршілігі, мұң-мұқтажы қашанда мәслихат депутаттарының жіті назарында болуға тиіс. Сайлаушылардың мүддесін қорғап, ел үмітін ақтау – басты парыз. Мен мәслихаттардың қызметіне ерекше мән беремін. Жалпы, елімізде 3300-ден астам мәслихат депутаты бар. Соның 70 пайызына жуығы осы залда отыр»,- деді Президент Қасым-Жомарт Тоқаев өз құттықтауында. 

     

  • Қазақстандық полицейлер күшейтілген режимге көшті

    Қазақстандық полицейлер күшейтілген режимге көшті

    Полиция қызметі күшейтілген режимге ауыстырылды. Бұл шешім Республикалық референдумның өткізілуіне байланысты қабылданып отыр. Ішкі істер министрлігі науқан кезінде құқықтық тәртіп пен қауіпсіздікті қамтамсыз етеді. Дауыс беруге арналған учаскелерге комиссиялық тексерулер жүргізілетін болады. Олардың техникалық сипаттарға және қауіпсіздік талаптарына сәйкестігі, терроризмге қарсы қорғалуы қаралады.

  • Тынышбай Досымбеков: Тағы төрт жолбарыс әкелу жоспарда бар

    Тынышбай Досымбеков: Тағы төрт жолбарыс әкелу жоспарда бар

     Өткен аптаның басты жаңалығы – Нидерландыдан екі амур жолбарысының келуі болды. 2017 жылы еліміз бен WWF International (Дүниежүзілік жабайы табиғат қоры) арасындағы меморандум нәтижесінде арнайы бағдарлама түзілді. Мұның аясында алаңы 415 мың гектар жерді қамтитын «Іле-Балқаш» резерватын құру, оңтүстік Балқаш маңы экожүйесін қалпына келтіру қолға алынды. Sona.kz тілшісі Іле-Балқаш табиғи резерватында аумақтық сарапшы Тынышбай Досымбековті аз-кем әңгімеге тартты.

    –  Тынышбай мырза, «Іле-Балқаш» резерватын құру жұмысының басы-қасында жүргеніңізді білеміз. Бұл идея қашан туындады? 

    – Өзім Балқаш ауданының тумасымын. Осы ауданның алғашқы әкімімін. Біз Балқаш ауданынан ерекше қорғалатын аймақ ашу мәселесін 2008 жылдан бері көтеруге атсалыстық. Неге десеңіз, бұл жаққа демалыс күндері Алматы қаласынан келімді-кетімді қонақ көп. Сенсеңіз, шамамен 500-дей джип көліктері ағылады. Жанашырлық танытқан ауыл азаматтары «Ештеңе қалмайтын болды. Балықты да сүзіп әкетіп жатыр. Аң-құсты да атады. От жағады, өртейді. Тіпті, Іленің бойында бос орын болмайды» деп айтып жүрді. Содан кейін аудан әкімдігі экологиялық пост қойды. Бірақ оған бағынып жатқан адам жоқ. Әрбірден кейін лауазымды азаматтардың өзі тоқтамай өте шығады екен. Содан ерекше қорғалатын аймақ жасайық деген ұйғарымға келдік.

    2014 жылы Алматы облысы әкімінің орынбасары болып тұрғанда 417 мың га жерді қоршап қойдық. Оған дейін арнайы мекеме қорықты қай жерден ашуға болатынын зерттеуге кірісті. Сөйтіп, Балқаш көлінің батыс жағынан 86 мың га, шығыс жағынан 365 мың га, жалпы аумағы 417 мың га жерді белгіледік. Енді резерватты ашуға әреккеттенгенде «жолбарыс әкеледі екен» дегенді естіген аудан халқы қарсы болып, Президент әкімшілігіне дейін хат жазған еді. Оның үстіне зоологтар да «Көшуге дайындалыңдар!» депті жұртты дүрліктірген.

    Экология және табиғи ресурстар министрлігі

    Қазіргі кезде Балқаш ауданында 29 мың халық тұрады. 3 млн 700 мың га жері бар. Алматы облысы жерінің 35 пайызы Балқаш ауданына тиесілі. Содан кейін 2015 жылы қорықтан зейнетке шығып, осында келіп Бақанас, Қараойға барып түсіндіру жұмысын жүргіздік. «Темір қазып, көмір өндіріп жатқан жоқсыңдар. Бұл жердің табиғи байлығы жетеді. 400-ден астам табиғи биоәртүрліліктің түрі бар. Бұл жерден теміржол өтпейді. Нағыз қолайлы жер. Ертең шаруашылық қайта қалпына келіп, ел жұмысқа тұрады. Туристер келіп, тіршілік пайда болады» дедім. Олар да «Бізге сіз сияқты ешкім түсіндірмеді. Жолбарыс әкеледі, ертең жеп қояды. Көшіңдер!» деді. Біз неге кетеміз? Керісінше, ерекше қорғалатын аймақты ашқандарыңызға ризамыз» деді. Содан не керек, 2018 жылы резерват ашылды. Дүниежүзілік жабайы табиғат қорының (WWF) бөлімшесі жұмыс істейді. Ал табиғи резерват мемлекеттік меншікке бағынышты мекеме ретінде Ауыл шаруашылығы министрлігіне қарайды. Директорын сайладық. Қараойдан бір бөлімшесін аштық. Өтетін жолдарға бекініс қойылды.

    – Ал амур жолбарысын елге әкелу жоспары қалай жүзеге асты?

    – 2010 жылы жабайы жануарлардың дүниежүзілік қорының Санкт-Петербург қаласындағы бөлімшесі жиналыс өткізіп, Ресейден Қазақстанға амур жолбарысын беру туралы келісімшартқа қол қойған. Дүниежүзілік жабайы табиғат қорымен (WWF) тығыз ынтымақтастықтың арқа­сын­да екі Амур жолбарысы «Іле-Балқаш» мемлекеттік табиғи ре­зер­ватына Нидерландтағы «Свя­того льва» жабайы жануарларды сақтау орталығынан жеткізілді. Бұл – тұран жолбарысын қалпына келтірудің алғышарты. Бір әңгімеде тұран жолбарысы 1939 жылы атылған дейді, енді бірі 1946 жылы Балқаш көлінің маңынан ізі көрінгенін айтады. Оның анық-қанығын ешкім білмейді. Бірақ тұран жолбарысының соңғы тұяғы 1978 жылы немістің зообағында өліп, содан жойылған деген дерек те бар. Сонымен не керек, «Екі жолбарысты қайда апарамыз?» дегенде, Балқаш ауданының Іле жағасы таңдалды. Өйткені, басқа жерде халық көп, өндіріс орындары жұмыс істейді.

     

    – Білуімізше, бұл екі жолбарыстың жерсініп кетуіне бір жылдай уақыт кетеді екен. Оның тамағы, күтімі де мамандардың қадағалауын қажет ететін шығар.

    – Резерватқа жеткізілген Богдана мен Кума атты Амур жолбарыстары арнайы зообақта, қолға үйренген. Оны Дүниежүзілік жабайы табиғат қорындағы зообағы бар меценат сыйға берген. Еркегі – 13 жаста, ұрғашысы – 9 жаста. Жолбарыс тұратын жер жасау үшін 10 га жер қоршалып, бес бөлікке бөлінді. Мамандар арнайы монитор арқылы қадағалап, көзден таса қылмайды.

    Күніне жейтін 4 келі етті Дүниежүзілік жабайы табиғат қоры әкеп береді. Алдағы уақытта тағы 4 жолбарыс әкелу жоспарда бар. Өзіміз алдыңғы жылы 60 құлан апардық. Биыл қазан айының соңына дейін 35 құлан жеткізіледі. Одан бөлек тоғай бұғысы 260-қа жетті. Жабайы шошқа қой сияқты жайылып жүр.

    Демек, Тұран жолбарысының Амур жолбарысынан соншалықты айырмашылығы жоқ. Сондықтан амур жолбарысы мекен еткен табиғаты, климат белдеуі бізге сәйкес келеді. Басты мақсат – Орталық Азияда жойылып бара жатқан жыртқыш-тұран жолбарысын қалпына келтіру. Кейін олардың шөнжігін табиғатқа жі­беріп, көбейте аламыз.

    – «Іле-Балқаш» резерваты аймақтың экотуризмін дамытуға таптырмас мүмкіндік пе?

    – Жалпы, биоэкономикалық негіздеме деген болады. Соны жасағанда резерватқа 2 млрд 242 млн қаржы құйылып, Қараойдан әкімшілік ғимарат, бизнес орталық, демалыс орны ашылуы тиіс. Одан бөлек ауыр техника мен көліктік базасы қалыптасады. Сондай-ақ, 169 адам жұмыспен қамтылады деген есеп болған. Қазір мұнда 64 адам жұмыс істейді. Жаз маусымында 100-ге жуықтайды.

    Өзім БҰҰ-ның Даму бағдарламасы (БҰҰДБ)  аясында жұмыс істеймін. Қазір БҰҰДБ қамқорлық жасап резерватқа қажетті техниканы, дүрбі, квадрацикл көлігін алып берді. Бұл үкіметтен тыс беріліп жатқан көмек. Дүниежүзілік жабайы табиғат қоры (WWF) экотуризмді дамыту үшін ауыл адамдарына шағын несие берді. Қазір БҰҰДБ тарапынан 130 метр тереңдіктегі су ұңғымасын қазылды. Бітеліп қалған Қара Бақанас өзегін тазалау бойынша құжат экспертизада жатыр. Сметасы дайын. Егер жасалса, Іленің Қара Бақанас  тармағы ашылып, үлкен оазис пайда болады.

    Екінші, Балқаш ауданында туризмді дамыту. Экология және табиғи ресурстар министрі Ерлан Нысанбаевтың айтуынша, алдағы уақытта кэмпинг, тікұшақ, ұшақ қонатын жолақ салынады, су шығатын ұңғыма қазылады. Қараойда әкімшілік ғимарат салынса, Бақанаспен ортадағы жол жөнделеді. Оған 1 млрд 150 млн теңге бөлінеді делінді. Одан бөлек мамандарды даярлап, интернетпен қамтамасыз ету мәселесі де күн тәртібінде болады.

    – Әңгімеңізге рақмет! 

  • 12 облыста ауа райына байланысты ескерту жарияланды

    12 облыста ауа райына байланысты ескерту жарияланды

    Республиканың басым бөлігінде атмосфералық фронтальды бөлімдердің өтуімен жаңбыр күтіледі, республиканың оңтүстік-батысында қатты жаңбыр болжанады, оңтүстік-шығыстың таулы аймақтарында түнде кей уақыттарда қатты жауын-шашын (жаңбыр, қар) жауады.

    Елдің батысында, оңтүстігінде, оңтүстік-шығысында найзағай күтіледі, оңтүстік-шығыстың таулы аймақтарында жаңбыр мен қар түрінде жауын-шашын күтіледі. Республиканың солтүстігінде, солтүстік-батысында ғана жоғары қысымды өрістің әсерінен құрғақ және жылы ауа райы күтіледі. ҚР бойынша желдің күшеюі күтіледі, түнгі және таңертеңгі сағаттарда солтүстікте, солтүстік-батыста, елдің оңтүстік-шығысындағы таулы аудандарда тұман болады.

    Қарағанды, Абай облыстарында, Ақтөбе облысының солтүстігінде, солтүстік-шығысында, Ұлытау облысының шығысында, Батыс Қазақстан облысының солтүстігінде, Қызылорда облысының солтүстік-батысында, Жамбыл облысының оңтүстік-шығысында, Қостанай облысының оңтүстігінде, Маңғыстау облысының шығысында, батысында, оңтүстігінде, Шығыс Қазақстан облысының орталығында жоғары өрт қаупі сақталады.

    Маңғыстау, Атырау, Ақтөбе, Түркістан, Қызылорда, Жамбыл, Батыс Қазақстан облыстарында, Қостанай облысының оңтүстік-батысында, Ұлытау облысында, Қарағанды облысының батысында, шығысында, Абай облысының оңтүстігінде, Жетісу облысының батысында, солтүстігінде, орталығында, Алматы облысының солтүстігінде, батысында төтенше өрт қаупі сақталады.

  • Қазақстаннан Дубайға қатынайтын ұшақтардың бағыты өзгереді

    Қазақстаннан Дубайға қатынайтын ұшақтардың бағыты өзгереді

    Ұшақтар Иранның әуе кеңістігін айналып өтеді. Көлік министрлігі барлық әуе компанияларына осындай кеңес берді. Астана мен Алматы қалаларынан Дубайға қатынайтын рейстердің бағыттары өзгеріп, ұшу уақыты ұзарады.

    Ал Жиддаға рейстер өзгермейді, бірақ өңірдегі әскери әрекеттер күшейген жағдайда қайта қаралуы мүмкін.

    Естеріңізге сала кетейік, Тау Шығыстағы күрделі саяси жағдайға байланысты Иран, Израиль және Ливанда жедел желілер іске қосылды. Ондағы Қазақстандық азаматтар қандай да бір көмек қажет болса, елшілікке жүгіне алады.

  • Нартай Аралбайұлы: Орманшылардың жалақысы барлық өңірде өспеді

    Нартай Аралбайұлы: Орманшылардың жалақысы барлық өңірде өспеді

    ҚР Парламенті Мәжілісінің депутаты Нартай Аралбайұлы бірнеше өңірде  орманшылардың жалақысы өспегенін жеткізді. Осы мәселені шешу мақсатында ол депутаттық сауалын ҚР Премьер — Министрінің Бірінші орынбасары Роман Склярға жолдады.

    «Семей орманында өрт болып ондаған отандасымыз опат болған кезде Үкімет өкілдері «2023 жылдың 1 шілдесінен бастап орманшылардың жалақысы өседі» деп кесіп айтқан еді. Бірақ айтылған сөз айтылған жерде қалды. Жалақы орман шаруашылығындағы басшылық құрам мен санаулы мамандық иесіне қосылғаны болмаса орман үшін от кешкен мыңдаған маман түкке жетпейтін жалақымен сол күйі қала берді», — деді  Нартай Аралбайұлы.

    Депутат орманшылардың жалақысын өсіру бойынша қол қойылған құжаттың барлық өңірде жүзеге аспағанын сынады. 

    «2024 жылдың 1 шілдесінде  Премьер-Министр Олжас Бектенов еліміздегі орман шаруашылығы және табиғатты қорғау мекемелері қызметкерлерінің лауазымдық жалақыларына үстемақы қосу туралы  қаулыға қол қойды. Орман және табиғатты қорғау ұйымдары қызметкерлеріне еңбекақы төлеу жүйесін, шарттары мен мөлшерлерін жетілдіру мақсатында «Азаматтық қызметшілерге, мемлекеттік бюджет қаражаты есебінен қаржыландырылатын ұйымдардың қызметкерлеріне еңбекақы төлеу жүйесі туралы» Қазақстан Республикасы Үкіметінің қаулысына өзгерістер енгізілді. Бөркімізді аспанға атып, алақайладық.

    Құжатқа сәйкес, орман өртін сөндіру бекеттерінің, орман шаруашылығы мекемелерінің, қоршаған ортаны қорғау және орман орналастыру ұйымдарының қызметкерлері лауазымдық жалақыларына 100 пайызға дейін өсімақы алуы керек еді. Олардың қатарында орман өртін сөндірушілер, өрт сөндіру көлігінің жүргізушілері, тракторшылар, радио операторлар, өрт сөндіру машиналарын, жабдықтар мен аппараттарды жөндеу жөніндегі шеберлер, өрт бақылау мұнарасының бақылаушылары бар еді. Шіліңгір шілдеден бастап жалақымыз еселеп артады деп елдің еңсесі тіктеліп қалды. Бірақ, 2023 жылы үмітінің күлі көкке ұшқан орманшылар 2024 жылы да дәл сол жағдайды бастан кешуде», — деді халық қалаулысы.

    Себебі аталған қаулы Қызылорда облысында,  Арал ауданында, Павлодар облысында, Маңғыстау облысында, Қостанай облысында, Жетісу облысында орындалмады деген дерек келді. Депутат  орманшылардың жазған арызы қолында екенін жеткізді. 

    «Орманшылардың жалақысын көтерудің жүгі жергілікті бюджетке артылыпты, ол қамбада қаржы жоқ екен. Қаулысы бар да қаржысы жоқ. «AMANAT» партиясы бұл жағдайды бірнеше рет көтергенін қаперлеріңізге сала кетейін.Салдары ауыр, жалақының төмендігінен жастар орманшы болып қызметке барғысы келмейді. Орман бар, орын бос, жалақы жетпейді.Жоғарыда айтылған мәселелерді зерделеп, 2024 жылдың 1 шілдесінде қол қойылған  қаулының толыққанда орындалуын қадағалап, Қазақстандағы орман шаруашылығындағы мамандардың лауазымдық жалақыларына 100 пайыздық өсімақының қосылуын қамтамассыз етуіңізді сұраймын», -деп Нартай Аралбайұлы депутаттық сауалын қорытындылады.

     

     

  • Депутат Дайрабаев су шаруашылығындағы былықты жіпке тізіп берді

    Депутат Дайрабаев су шаруашылығындағы былықты жіпке тізіп берді

    ҚР Парламенті Мәжілісінің депутаты Жигули Дайрабаев  су шаруашылығындағы кемшіліктерді тізіп,  Премьер-Министрдің орынбасары Қанат Бозымбаевқа депутаттық сауал жолдады.

    «2017 жылы «Ақтөбе, Жамбыл және Түркістан облыстарының су шаруашылығы және гидромелиоративтік жүйелерін реконструкциялау» жобасын іске асыруға мемлекеттің кепілдігімен 173,8 млн АҚШ доллар немесе 53,9млрд. теңге Еуропалық Қайта Құру және Даму Банкі тарапынан алынған болатын.

    Қарыз қаражатының қолжетімділік мерзімінің аяқталуына, оның толық игерілмеуіне және құжаттарды рәсімдеу уақыты созылуына байланысты Еуропалық Қайта Құру және Даму Банкі 664,9 млн. теңге қосымша комиссия есептеген.

    Аталған жобалар бойынша жұмыстар 2021 жылы аяқталуы керек еді. Алайда, жобалау-сметалық құжаттаманың сапасыз әзірленуіне, мердігерлердің жауапсыз жұмысына байланысты Үйлестіру кеңесінің шешімімен 2023 жылға, одан кейін 2025 жылға ауыстырылды.

    Бүгінде осы жобалардың орындалу барысыда мәз емес. Бұған кім жауап береді? Артық кеткен шығындардың сұрауы барма?», — деді депутат, «Ауыл» партиясы Фракциясының мүшесі Жигули Дайрабаев.

    Халық қалаулысы  жаз айында өңірлерді аралау барысында Жамбыл облысының сайлаушылары осы мәселені көтергенін жеткізді.

    «Бүгінгі күнге жоспарланған 315 каналдың тек 137 каналы жөндеуден өткен.Жұмыстың баяу жүруі жыл сайынғы вегетациялық кезеңнің өткеру сапасын төмендетуге әкеледі, берілетін судың шығыны 20-30 пайыздан асады», — деді депутат. 

    Жигули Дайрабаевтың мәліметінше,  Ақтөбе  қаласы бойынша инфрақұрылымның жетіспеушілігі салдарынан бөлінген 5,6 млрд теңгенің 1,3 млрд теңгесі игерілмеген. Ал Түркістан облысы бойынша бөлінген 18,5 млрд. теңгенің тек 2,2 млрд. игерілген.

    «Бұдан басқа, «Ирригациялық және дренаждық жүйелерді жетілдіру» (ПУИД-2) жобасы бойыншада шешілмеген сұрақтар көп.Түркістан, Қызылорда, Жамбыл облыстарында бұл жоба аясында жыл басынан тек 3,35 млрд. теңге Үкімет Резервінен бөлінген.Сондай-ақ, өткен жылдан бері Дүниежүзілік Банк тарапынан төленетін 1,1 млрд. теңге қарыз әліде болса төленбеген, ал жобаны орындау мерзіміне аз уақыт қалды.Бюджетті нақтылау кезінде қаржы бөлінеді деген уәделестікте жоқ.Қажетті 28 млрд. теңгені сонда Үкімет қашан бөлмекші? Шешуге тиісті мәселені одан әрі ушықтырмай нақты жұмыс ұйымдастыру керек емес пе?»,— деп толықтырды Жигули Дайрабаев.

    Депутат, елімізде су тапшылығы жыл өткен сайын күрделі мәселеге айналып келе жатқанын жеткізді.

    «Ал бізде суды үнемді және тиімді пайдалану тетіктері әліде болса жоқ. Сондықтан жыл сайын миллиардтаған теңгенің шығыдарын көрудеміз.Тасқын суды жинау және қауіпсіз өткізуді қамтамасыз ету үшін салалық министрлік 2,6 млрд. текше метр су сақтай алатын 42 жаңа су қоймасын салуды, жалпы көлемі 3,7 млрд. текше метр болатын 37 су қоймасы мен 14,5 мың шақырым ирригациялық каналды реконструкциялауды жоспарлап отыр екен.Министрлік бұрынғы жоспарлаған міндеттерін орындамай жатып, құрылыстың басталуы 2012 жылдан бері созылып келе жатқан, жырға айналған Жамбыл облысындағы 3 су қоймаларының мәселесі әлі шешілмеуде, аталған Қалғұтты, Ырғайтты мен Ақмола су қоймаларының құрылысы 34,5 мың гектар суармалы жерді тиімді пайдалануға мүмкіндік берер еді»,- деді Ж. Дайрабаев.

    Ал, депутат су шаруашылығы бойынша жаңадан  құрылған министрліктің жұмысына көңілі толмайтынын жеткізді. 

    «Мемлекет басшысы былтырғы Жолдауында су ресурстарының маңыздылығын атап, оны тиімді пайдалануды тапсырып, жаңа ведомства құрып еді. Дегенмен, қазіргі жүргізіліп жатқан жұмыстар халықтың көңілінен шықпауда, су шаруашылығы саласындағы ұйымдастыру жұмыстары сылбыр жүруде. Министрлік құрылғанына бір жыл өтседе, бүкіл Республика бойынша ревизиялық жұмыстар әлі толық біткен жоқ.

    Мәселен, Шығыстағы судың 40%-на ие Семей өңірінде Облыстық деңгейде ҚазСуШар мекемесі әлі күнге дейін құрылмаған, Ұлытаудада осындай жағдай. Су шаруашылығы объектілерін ұстау, пайдалану мен құрылыстарының қауіпсіздігін қамтамасыз ететітін ұйымы болмаса, басқасы туралы не айтуға болады!

    Осыған орай, сауалда көтерілген 3 мәселе бойынша қандай шаралар қабылдануда? Құрылыстардың аяқталу және күрделі жөндеу жұмыстары қай уақытта бітеді?Осы сұрақтарға жауап  беруіңізді сұраймыз», -деді ҚР Парламенті Мәжілісінің депутаты Жигули Дайрабаев Премьер-Министрдің орынбасары Қанат Бозымбаевқа жолдаған депутаттық сауалында.

  • 25 % айлығымызды қиып тастады: Алатаулық ұстаздар бас көтеріп жатыр

    25 % айлығымызды қиып тастады: Алатаулық ұстаздар бас көтеріп жатыр

    Алматы облысында жаңадан құрылған Алатау қаласының ұстаздары бас көтеріп жатыр. Көпшіліктің айтуынша, олардың айлығын 25 пайызға қысқартып тастаған. Осы жайтқа наразы мұғалімдер Президент Қасым-Жомарт Тоқаевқа үндеу жариялап, көмек сұрап жатыр. Сондай-ақ, дәл осы мәселенің әділ шешілуіне Оқу-ағарту министрі Ғани Бисембаев пен Мәжіліс депутаттары да араласса  дейді, ұстаздар  қауымы.

    Алатаулық ұстаздардың наразылығына қаланың білім бөлімі жазбаша былай деп жауап берді.

    «2024 жылғы 1 қазанда Алатау қаласындағы №1 және №47 мектептерінің педагогикалық ұжымдары жергілікті мемлекеттік органдар өкілдерімен кездесті. Бұған дейін аталған мектеп ұжымдары әкімшілік-аумақтық құрылыстың өзгеруіне байланысты жалақы мөлшерінің өзгеруіне қатысты алаңдаушылықтарын білдірген болатын.

    Естеріңізге сала кетейік, 2024 жылғы 9 қаңтардан бастап Алатау қаласының құрамына бұрын Алматы облысының Қонаев қаласына, Іле және Талғар аудандарына қарасты бірқатар елді мекендер енгізілді. Осыған орай, қолданыстағы заңнамаға сәйкес, аталған аумақтарда тұратын бюджет саласы қызметкерлерінің еңбекақы төлеу жүйесінде өзгерістер орын алды», — делінген Алатау қаласы Білім бөлімінің баспасөз қызметінің хабарламасында.

    Сондай-ақ, ведомство қызметі туындаған мәселелерді жан-жақты қарау мақсатында кездесуге Алатау қаласы әкімінің орынбасары, қалалық білім бөлімінің басшысы, сондай-ақ облыстық білім және ішкі саясат басқармаларының өкілдері қатысқанын жеткізді.

    «Нәтижелі диалог барысында еңбекақы төлеу мәселелерімен қатар, тұрғындардың өзекті мәселелері — көлікпен қамтамасыз ету, қоқыс шығару, газбен жабдықтау мәселелері де талқыланды. Кездесу қорытындысы бойынша педагогикалық ұжымдармен өзара түсіністікке қол жеткізілді», — деп толықтырды аталған ведомствоның баспасөз қызметінен.