Sona.kz

Метка: Басты жаңалықтар

  • Талғарда Хасан Қасымбаевқа үкім шығарылды

    Талғарда Хасан Қасымбаевқа үкім шығарылды

    Алматы облысының Талғар аудандық соты Хасан Қасымбаевқа қатысты қылмыстық іс бойынша үкім шығарды, деп хабарлайды Sona.kz Tengrinews.kz сайтына сілтеме жасап.
    Сот Қасымбаевты адам ұрлау, денсаулыққа қасақана ауыр зиян келтіру және қорқытып алу баптары бойынша кінәлі деп танып, оны 12 жылға бас бостандығынан айыру жазасына кесті. Жазасын орташа қауіпсіздік мекемесінде өтейді.
    Бұл іс бойынша тағы бес адам сотталды. Оларға 8 жылдан 22 жылға дейін бас бостандығынан айыру жазасы тағайындалды:
    •Р. А. – 20 жыл,
    •С. А. – 8,5 жыл,
    •М. К. – 12 жыл,
    •Д. А. – 8 жыл,
    •Н. С. – 22 жыл.
    Соңғы сөзінде Қасымбаев өз кінәсін мойындамай, істің қолдан жасалғанын айтып, ақтауды сұрады. Алайда сот бұл уәждерді негізсіз деп тапты.
    ? Айыптың мәні
    Тергеу материалдарына сәйкес, 2021 жылы жазда Талғар қаласында бір топ адам ММА спортшысы Арман Алимовқа шабуыл жасаған. Оны ұрып-соғып, қала сыртына алып кеткен. Мұның себебі — Алимовтың «Қасымбаев мен үшін бедел емес» деген сөзі болған.
    Сондай-ақ Қасымбаевқа Талғардағы кәсіпкер Арипжан Тәжіевтен 1 миллион теңге талап етіп, оны соққыға жықты деген айып тағылған.
    ? Контекст
    Бұған дейін БАҚ Қасымбаевты бейресми “Хуторлықтар” тобының жетекшісі деп атаған. Алайда ІІМ мен прокуратура мұндай ұйымдасқан топтың бар екенін ресми түрде жоққа шығарды.
    ІІМ бірінші орынбасары Бауыржан Аленов 2024 жылы қазанда: «Бізде “Хуторлықтар” деген ОПГ есепте жоқ», – деп мәлімдеген.
    Қасымбаев ісі бойынша тергеу 2025 жылғы 28 наурызда аяқталды. Үкім заңды күшіне апелляциялық тәртіпте қаралған соң енеді.
  • 111 сенім телефонына 44 қоңырау түскен

    111 сенім телефонына 44 қоңырау түскен

    Жиында сөз алған Алматы облыстық балалар құқығы жөніндегі уәкіл Айгүл Есімбекова «Ата-аналар университетінің» жұмысы жөнінде түсіндірді.

    «Біз күнделікті түрлі қиындықтарға ұшырап, түрлі өмірлік жағдайларда өмір сүріп жатқан отбасылармен жұмыс істейміз. Алматы облысы бойынша жасөспірімдердің суицид жасау дерегі азайғанымен, мәселе түбегейлі шешілген жоқ. Қазіргі таңда кез келген мектепте сенім телефондары көрсетілген тақтайшалар ілінген. Оған қоса, елімізде «Ата-аналар университеті» құрылған», — деді маман.

    Уәкілдің сөзіне сүйенсек, өз-өзіне қол жұмсаған балалардың 90 пайызы ата-анасымен ұрысқаннан кейін осындай қадамға барған.

    «Ата-аналар университеті» арқылы жаға ұстатарлық ситуациялардың алдын алуға болады. Бұл университет «Жанұя отбасын қолдау орталығы» қоғамдық қорының базасында құрылды. Мұнда әр отбасы мүшесіне тегін құқықтық, психологиялық көмек беріледі. Бірнеше жылдық тәжірибесі бар гештальт-терапевттер де қызмет етуде», — деді Айгүл Есімбекова.

    Ұйымдастырушылардың айтуынша, Алматы облысы бойынша әйелдер және балалардың құқығын қорғау мәселелері бойынша 111 сенім телефонына 44 қоңырау түсіп, олардың әрқайсына жекелеген қолдаулар көрсетілген. Бұдан бөлек, Қонаевтағы «Жанұя» отбасын қолдау орталығының көмегіне 200 адам жүгінген.

    Ал полиция басқармасының өкілдері буллинг жайында сөз қозғады.

    «Бұрын буллингке аса мән берілмейтін. Цифрлық технологиялардың дамуына байланысты Қазақстанда кибербуллинг белең алып, білім ошақтарында буллинг көрсету проблемасы жаңа сипатқа ие болды. Оқушылардың психологиялық мінез-құлқына зиян келтірмеу мақсатында ҚР Әкімшілік құқық бұзушылық туралы кодексіне 127-2-бабы енгізілді. Бұл бапқа сай, Кәмелетке толмаған адамды жәбірлеу (буллинг, кибербуллинг) – ескерту жасауға немесе он айлық есептік көрсеткіш мөлшерінде айыппұл салуға алып келеді», — деді маман.

    Сондай-ақ басқосуда кәмелетке толмағандар арасында құқықбұзушылықты азайту сұрағы да талқыланды.

  • Хасан Қасымбаев өз ісін қолдан жасалған деп атады және ақтауды сұрады

    Хасан Қасымбаев өз ісін қолдан жасалған деп атады және ақтауды сұрады

    Қасымбаевқа үш бап бойынша айып тағылған: адам ұрлау, ауыр дене жарақатын келтіру және бопсалау. Онымен бірге тағы бес адам сот алдында отыр. Жәбірленушілер — ММА жауынгері Арман Алимов пен кәсіпкер Арипжан Тажиев.

    Соңғы сөзінде Қасымбаев өзіне тағылған айыпты жалған және дәлелсіз деп атады.

    «Бұл істі қоғамды тыныштандыру үшін ойлап тапты. Менің кінәмді дәлелдейтін еш айғақ жоқ. Барлығы Алимовтың сөзіне ғана сүйенеді, ал ол есірткіге тәуелді әрі бұрын сотталған», — деді ол.

    Оның айтуынша, оны «Хутор» тобы мен Шерзат Полат ісімен байланыстыру – негізсіз.

    «Мені резонанс үшін соттап жатыр. Мен заң алдында да, Алла алдында да арым таза. Соттан әділ шешім шығаруды сұраймын», — деді айыпталушы.

    Басқа айыпталушылар да Қасымбаевты қолдап, оны ақтауды өтінді. Кейбірі тергеуге сенбейтінін және айыптаулардың ойдан шығарылғанын айтты.

    Сот ғимараты алдында ондаған адам айыпталушыны қолдап жиналды. Оқиға орнында полиция мен жедел жәрдем қызметі кезекшілікте тұрды.

    Прокурор бұған дейін Қасымбаевқа 15 жыл түрме жазасын, ал өзгелерге — 9-22 жыл аралығында жаза сұраған. Үкім жақын күндері жариялануы мүмкін.

  • Алматы облысының кәсіпкері Президентке алғыс айтты

    Алматы облысының кәсіпкері Президентке алғыс айтты

    Алматы облысының жас кәсіпкері, Pul.vc венчурлік платформасының негізін қалаушы Бағлан Бауыржанұлы Олжабаев Мемлекет басшысы Қасым-Жомарт Тоқаевқа жастар мен инновациялық кәсіпкерлікті дамытуға ерекше көңіл бөлгені үшін алғыс білдірді.

    Кәсіпкердің айтуынша, Президенттің бастамалары жаңа буын кәсіпкерлері мен IT мамандардың қалыптасуына зор серпін беріп отыр.

    «Құрметті Қасым-Жомарт Кемелұлы! Қазақстанның жаңа элитасын – жас кәсіпкерлерді, инженерлер мен IT-мамандарды дамытуға ерекше назар аударып келе жатқаныңыз үшін алғыс білдіремін. Мемлекет пен кәсіпкерлердің бірлескен еңбегі арқылы Қазақстан инновациялар саласында өңірлік көшбасшы болатынына сенімдімін», – деді Олжабаев.

    Pul.vc платформасы бүгінде қазақстандық стартаптарды дамытуға, инвесторлар мен жас кәсіпкерлерді байланыстыруға ықпал етіп келеді. Оның негізгі мақсаты – әлеуеті бар жобаларды қолдап, оларға халықаралық нарыққа шығуға мүмкіндік беру.

    Кәсіпкердің айтуынша, стартап әлемінде алғашқы қадамдар оңай болмаған.

    «Кәсіпкердің жолы – құлап, қайта тұру. Инвестиция тарту, нарықты зерттеу, өнімге сұранысты анықтау – бәрі тәжірибе арқылы келеді. Ең бастысы – сенімді команда мен нақты мақсат», – деді Олжабаев.

    2024 жылы Pul.vc командасы «Qazinnovations» ұлттық агенттігінің грантын жеңіп алып, 20 млн теңгеден астам қолдау иеленді. Бұл қаражат жоба идеяларын іске асырып, венчурлік инвестиция тартуға мүмкіндік берді.

    Қазір компанияның капитализациясы 10 миллион АҚШ долларына жеткен. Pul.vc Сингапур моделі бойынша жұмыс істейді және бұл формат Орталық Азияда әзірге теңдесі жоқ.

    Бағлан Олжабаев Президенттің жастарға бағытталған саясатының нақты нәтижелерін атап өтті.

    «Қазір жастарға беріліп жатқан импульс өте маңызды. Бұрын мұндай мүмкіндіктер аз болатын. Енді инновация мен IT саласына қызығушылық артып келеді, ал Қазақстан аймақтық технологиялық орталыққа айналып жатыр», – дейді кәсіпкер.

    Бүгінде Алматы облысында жастар кәсіпкерлігін қолдау белсенді дамып келеді. Биылдың өзінде 100-ге жуық жас кәсіпкер грантқа ие болып, өз ісін бастаған.
    Pul.vc сияқты бастамалар өңірде инновациялық экожүйенің қалыптасуына жол ашып отыр.

  • Ақтөбе облысында ер адам келінін зорлады деген күдікке ілінді

    Ақтөбе облысында ер адам келінін зорлады деген күдікке ілінді

    Ақтөбе облысының бір ауылында 53 жастағы ер адам өз келінін зорлады деген күдікпен ұсталды, деп хабарлайды Sona.kz Halyqstan-ға сілтеме жасап.

    Тергеу деректеріне сәйкес, күдікті ұзақ жылдар бойы ішімдікке салынған және тұрақты жұмысы болмаған. Біраз уақыт бұрын ол Алға ауданына қарасты Токмансай ауылындағы өгей ұлы мен оның 22 жастағы жұбайының үйіне көшіп келген. Қылмыс дәл осы үйде болған деп болжануда.

    Жәбірленуші оқиғадан кейін бірден полицияға арыз түсірген. Күдікті ұсталып, уақытша ұстау изоляторына қамалды.

    Аталған факт бойынша ҚР Қылмыстық кодексінің 120-бабы («Зорлау») бойынша іс қозғалды. Тергеушілер күдіктінің ақыл-есінің дұрыстығын анықтау үшін сот-психиатриялық сараптама тағайындады.

    Ауыл тұрғындарының айтуынша, ер адам бұған дейін де ішімдік ішіп, отбасылық жанжалдарға себеп болып жүрген.
    «Ол үнемі мас болып жүретін. Бірақ мұндай қылмысқа барады деп ешкім ойламады», — дейді ауыл тұрғыны.

    Қазір полиция оқиғаның барлық мән-жайын анықтап жатыр. Тергеу жалғасуда.

  • Алматыдағы «Премьера» тұрғын үй кешенінде маскүнемдер шу шығарды

    Алматыдағы «Премьера» тұрғын үй кешенінде маскүнемдер шу шығарды

    Алматыда «Премьера» тұрғын үй кешенінде бір топ адам улы заттарды пайдаланып, пышақпен төбелес ұйымдастырған, деп хабарлайды Sona.kz Kriminal Kazakhstan-ға сілтеме жасап.

    Куәгерлердің айтуынша, 6 қараша түні бірнеше ер адам қозғалтқышты тазартуға арналған «Карб» сұйықтығын иіскеп, кейін өзара жанжалдасқан.

    Тұрғындар дереу полиция шақырғанымен, құқық қорғаушылар тек екі адамды ұстаған, ал қалғандарына еш шара қолданылмаған.

    «Полиция “қалғандары өздері қашып кетеді” деді. Алты адам сол күйі бос жүр», — дейді тұрғын.

    Кешен тұрғындары бұл адамдардың улы заттардың әсерінен қауіпті болуы мүмкін деп қауіптенеді.

    Полиция әзірге ресми түсініктеме берген жоқ.

  • Түркістан облысында әкімшілік кәсіпкерлердің жерін заңсыз тартып алған

    Түркістан облысында әкімшілік кәсіпкерлердің жерін заңсыз тартып алған

    Түркістан облысының Сайрам ауданында әкімшілік мемлекеттік қажеттер үшін деген сылтаумен кәсіпкерлердің жер учаскелерін заңсыз тартып алған, деп хабарлайды Sona.kz Kazinform-ға сілтеме жасап.

    Арнайы экологиялық прокуратура жүргізген тексеріс барысында жер кодексі талаптарының бұзылғаны анықталды.

    Анықталғандай, жалпы аумағы 523 гектар жерді қамтитын 21 кәсіпкер өз учаскесін заңсыз түрде пайдалану құқығынан айырылған. Сонымен қатар, 20 гектар жер әкімшілік тарапынан өкілеттігінен тыс біржақты тәртіпте алынған.

    «Кәсіпкерлер заңсыз түрде жер пайдалану құқығынан айырылған», — делінген прокуратура хабарламасында.

    Прокуратура наразылық енгізіп, әкімшіліктің заңсыз қаулыларын жойды, нәтижесінде кәсіпкерлердің құқықтары қалпына келтірілді.

    ? Еске сала кетейік, Қазақстанда бизнеске заңсыз араласқандарға жаза күшейтілген. Жыл басынан бері 98 қысым фактісі тіркеліп, 18 миллион теңге көлемінде айыппұл салынды.

  • Қазақстан Алатау мен Алматы арасында әуе таксиін іске қоспақ

    Қазақстан Алатау мен Алматы арасында әуе таксиін іске қоспақ

    Қазақстан инновациялық көлік дәуіріне қадам баспақ – жақын жылдары Алатау мен Алматы арасында әуе таксилер қатынайды, деп хабарлайды Sona.kz Tengrinews.kz-ке сілтеме жасап.

    Жасанды интеллект министрлігі, америкалық Joby Aero, Inc. компаниясы, қазақстандық Alatau Advance Air Group Ltd және кәсіпкер Вячеслав Ким арасында $300 миллион долларлық келісімге қол қойылды.

    Жоба Urban Air Mobility – қалалық әуе мобильділігі жүйесін дамытуға бағытталған. Оның аясында сынақ алаңы құрылып, сертификаттау және демонстрациялық ұшулар өткізіледі. Кейін әуе таксилер Алатау мен Алматының көлік инфрақұрылымына қосылады.

    «Қазақстан инновациялық көлік жүйесіне қадам басуда. Электрлі eVTOL ұшақтарын сатып алу – “ақылды қалаларды” дамыту жолындағы маңызды кезең», – деді вице-премьер, Жасанды интеллект және цифрлық даму министрі Жаслан Мадиев.

    Алатау қаласы арнайы экономикалық аймаққа кіреді, мұнда салықтық жеңілдіктер мен инвестициялық артықшылықтар қарастырылған.

    Анықтама:
    ? Joby Aero, Inc. (АҚШ) – eVTOL ұшақтарын шығаратын әлемдік көшбасшы.
    ? Вячеслав Ким – Kaspi.kz директорлар кеңесінің төрағасы, «Алатау қаласы» жобасының инвесторы.
    ? Alatau Advance Air Group Ltd – Қазақстандағы әуе мобильділік технологияларының операторы.

  • Алматыдағы ALA Hostel ісі бойынша сот үкімі өзгеріссіз қалды

    Алматыдағы ALA Hostel ісі бойынша сот үкімі өзгеріссіз қалды

    Алматы қаласында ALA Hostel-дегі өрт ісі бойынша апелляциялық сот отырысы аяқталды, деп хабарлайды Sona.kz Kazinform-ға сілтеме жасап.

    Сот алқасы хостел директоры Адильбек Мұхамедьяровқа шығарылған 5 жыл бас бостандығынан айыру жазасын өзгеріссіз қалдырды.
    Ал нысан иесі Александр Пекельникке қатысты моральдық зиянды өндіру туралы шешімнің бір бөлігі жойылды, бірақ оның кінәсі дәлелденген күйінде қалды.

    Сот материалдарына сәйкес, хостелде өрт қауіпсіздігі талаптары өрескел бұзылған: эвакуациялық шығу жолдары, дабыл жүйесі және өрт сөндіру құралдары болмаған.

    Еске салайық, қайғылы оқиға 2023 жылғы 3 қарашада Алматы қаласындағы жертөле ғимаратында болған. Өрт салдарынан 13 адам, негізінен 18 бен 25 жас аралығындағы жастар қаза тапты.

    Қаза тапқандардың туыстары кінәлілерге қатаң жаза қолдануды және олардың әрекеттерін қасақана немқұрайлылық деп тануды талап етуде.

  • Шымкентте блогер шенеуніктен 10 млн теңге бопсалағаны үшін ұсталды

    Шымкентте блогер шенеуніктен 10 млн теңге бопсалағаны үшін ұсталды

    Шымкент қаласында блогер акимат қызметкерінен 10 миллион теңге талап етті деген күдікпен ұсталды, деп хабарлайды Sona.kz Kazinform-ға сілтеме жасап.

    Тергеу мәліметінше, күдікті мемлекеттік органның беделіне нұқсан келтіретін материалдарды жариялаймын деп қорқытып, ақша сұраған. Ол ақпаратты таратпау үшін 10 миллион теңге “сыйақы” талап еткен.

    Тінту кезінде оның үйінен электрондық құрылғылар мен дәлел болатын құжаттар тәркіленді. Қазіргі уақытта күдікті уақытша ұстау изоляторында отыр, іс бойынша тергеу амалдары жүріп жатыр.

    Полиция өкілдері мұндай әрекеттер ҚР Қылмыстық кодексінің 194-бабына (“Бопсалау”) сәйкес келетініне назар аударды. Бұл бап бойынша 7 жылға дейін бас бостандығынан айыру жазасы қарастырылған.

    Белгілі болғандай, ұсталған блогер бұған дейін де мемлекеттік органдар қызметін сынаған жазбалар жариялап келген. Тергеу оның өз жазбаларын қысым жасау құралы ретінде пайдаланған-пайдаланбағанын анықтауда.