Қазақстан Президенті Үкіметке ауыл шаруашылық өнімін экспортқа үздіксіз жеткізуді қамтамасыз етуді және әуе тасымалы әлеуетін белсенді пайдалануды тапсырды, деп хабарлайды Sona.kz Акордаға сілтеме жасап.
Сарапшылардың болжамынша, алдағы 10 жылда әлемде қызыл етке сұраныс 233 миллион тоннаға дейін өседі. Қазақстанның бай жайылымдық жерлері бар және ел Азия елдеріне маңызды жеткізушіге айнала алады. Дегенмен, экспорт көлемі бойынша Қазақстан Моңғолия, Нидерланды, Испания және Франциядан артта қалуда.
Президент тапсырмасына сәйкес агроэкспортты дамыту жоспары әзірленуде. Жоспар логистиканы жетілдіруді, ветеринарлық және фитосанитарлық талаптарды сақтау мен тиімді маркетингтік стратегияларды қамтиды. Негізгі мақсат – өнімді тұрақты және жыл бойғы жеткізуді қамтамасыз ету.
Атап айтқанда, Астана, Алматы, Алматы облысы, Шымкент, Ақтөбе, Қарағанды және Ақтау әуежайлары өңірлік логистикалық хабтарға айналуға толық қабілетті. Арнайы экономикалық аймақтардың преференцияларын ескере отырып, бұл әуежайлар халықаралық әуе маршруттарына интеграцияланып, ауыл шаруашылық өнімін экспортқа жеткізудің негізгі нүктелеріне айналады.
Президент атап өткендей, қазіргі таңда кәсіпкерлер өнімді жөнелту кезінде қиындыққа тап болады, себебі әуе тасымалы жүйелі түрде реттелмеген. Мысалы, кейде ет өнімдері тұрақты рейстермен Эмираттарға жіберіледі, бірақ орталықтандырылған жүйенің болмауы экспорт көлемін шектейді.
Өңірлік авиациялық хабтарды құру жеткізу уақытын қысқартуға, өнім жоғалту қаупін азайтуға және Қазақстан ауыл шаруашылық өнімін халықаралық нарыққа тиімді шығару мүмкіндігін арттырады. Үкіметке осы мәселені жан-жақты қарастыру және экспорттық нарықтарды үздіксіз қамтамасыз ету шараларын әзірлеу тапсырылды.
