Sona.kz

Метка: Ғани Бейсембаев

  • Бір топ баланы ұрған жасөспірімнің ісін министр жеке бақылауына алды

    Бір топ баланы ұрған жасөспірімнің ісін министр жеке бақылауына алды

    Оқу-ағарту министрі Ғани Бейсембаев әлеуметтік желіде жасөспірім бір топ баланы тұрғызып қойып, ұрып жатқан бейнежазбаға қатысты түсінік берді.

    – Әдетте жұмыс кестесінің тығыздығына байланысты әлеуметтік желілердегі жазбаларды тұрақты бақылауға мүмкіндік бола бермейді. Сондықтан жарияланған арыз-шағымдарды демалыс күндері арнайы қарап шығуға тырысамын. Кейде әлеуметтік желілер арқылы расымен де алаңдаушылық тудыратын мәселелерден хабардар болып жатамыз. Мысалы, Алматы облысы оқушыларының шағымы мені бейжай қалдырмады. Мәселе білім алушылардың құқығы бұзылуы, мектептегі тамақтану жағдайының санитариялық талаптарға сай ұйымдастырылмауы сияқты фактілердің болу ықтималдығына байланысты, – деп жазды желідегі парақшасында Ғани Бейсембаев.

    Осы орайда министр жергілікті атқарушы органдардың өз міндеттерін толықтай орындамай отырғанын айтты.

    «Бала құқығын қорғау шараларын заңнамалық тұрғыда күшейту мақсатында министрлік тарапынан үш негізгі заңнамаға 94 түзету енгізіліп, 2024 жылы тексеруден өткен 342 білім беру ұйымының 24-інде басшылар әкімшілік, 78-і тәртіптік жауапкершілікке тартылғанына қарамастан, мұндай жағдайлар әлі де кездесіп отыр. Аталған жағдай жеке бақылауымда. Балалардың құқығын қорғау комитеті мен аумақтық білім сапасын қамтамасыз ету департаментінің қатысуымен арнайы жұмыс комиссиясын құруды тапсырдым. Комиссия қолданыстағы заңнама аясында барлық қажетті шараны қабылдайды. Алматы облысының басшылығы бұл мәселені шұғыл түрде қолға алып, алдағы уақытта мұндай келеңсіздіктерге жол бермеу үшін нақты әрі жүйелі іс-шаралар қабылдайды деп сенемін», – дейді ведомство басшысы.

    Ғ.Бейсембаевтың айтуынша, әр баланың қауіпсіздігі – білім беру жүйесінің барлық деңгейінде орындалуы тиіс стратегиялық міндет.

    «Балалардың құқығы мен қауіпсіздігін қамтамасыз ету министрліктің тұрақты бақылауындағы мәселе екенін жергілікті әкімдіктер де жақсы біледі. Тағы да өңірлердегі білім саласының басшыларын осындай маңызды мәселелерге жоғары жауапкершілікпен қарауға шақырамын», – дейді министр.

  • Елімізде мектеп директоры жетіспейді

    Елімізде мектеп директоры жетіспейді

    Оқу-ағарту министрі Ғани Бейсембаев ведомствоның алқа мәжілісінде мектеп директорларының деңгейі ойдағыдай болмай тұрғанын айтты.

    «Республикада 7 мыңнан аса мемлекеттік мектеп жұмыс істейді. Талдау директорлардың біліктілік деңгейін көтеру керектігін көрсетіп отыр. Олардың тек 9 пайызында ғана «жетекші-көшбасшы» санаты бар. Осы жағдайды шешу үшін 2023 жылдан бері «Білім берудегі өзгерістің 1000 көшбасшысы» жобасы іске асырылып келе жатыр. Бүгінгі күні 583 кандидат Республикалық кадрлық резервке енгізілді. Жоба іске қосылғанына қарамастан, 740 мектепке директор жетіспейді, оның 81%-ы ауыл мектебі», – деді Ғани Бейсембаев.

    Директорлар тапшылығы әсіресе Түркістан, Қарағанды, Павлодар, Ақмола және Қостанай облыстарында тіркелген көрінеді.

    «Резвервтегі кадрларды тағайындау Ақтөбе облысында қажетті деңгейде орындалмаған. Яғни басшылық лауазымға 12 кадрдың екеуі, Шымкентте 23-тің үшеуі ғана тағайындалған. Алматы қаласында ревервте тұрған 30 маманның біреуі де тағайындалмаған. Бұл білім басқармалары тарапынан өңірдегі бос орындарды ескере отырып, оқытуға қатысушыларды іріктеу кезінде нақты тәсілдің жоқ екенін көрсетеді. Басқаша айтсақ, стратегиялық маңызы жоба бетімен жіберілген. Мәселе тек жаңа директорлар дайындауда ғана емес, бүкіл директорлар құрамын сапалы менеджментке оқыту қажеттігі туындап отыр. Сонда ғана білім беру саласында айтарлықтай өзгерістерге қол жеткіземіз», – деді министр.

  • Метапневмовирус: Мектептерде шектеу енгізіле ме?

    Метапневмовирус: Мектептерде шектеу енгізіле ме?

    Біздің елдің білім беру жүйесі кез келген сын-қатерге дайын екенін көрсетіп отыр. Бұл пандемия кезінде жинақталған тәжірибенің нәтижесі. Барлық колледждер мен мектептер мұндай жағдайларда қажетті құралдармен толық жабдықталған. Дегенмен, Денсаулық сақтау министрлігінің шешімін күту қажет деп ойлаймын. Егер шешім қабылданса, біз әрдайым қиындықтарға дайынбыз, – деді Ғани Бейсембаев Үкіметтегі брифингте.

    Өз кезегінде Премьер-министрдің орынбасары Тамара Дүйсенова Денсаулық сақтау министрлігі Дүниежүзілік денсаулық сақтау ұйымына (ДДСҰ) сұрау салғанын атап өтті.

    – ДДСҰ бізге алаңдауға негіз жоқ екенін жеткізді. Бұл вирус ұзақ уақыттан бері елдерде айналымда жүр, оны емдеу жолдары бар. Профилактикалық шараларды жүргізу қажет. Біз осыған сүйенеміз. Бұл кезеңді бірге еңсеруіміз керек, – деді ол.

  • Семейде шыршадан құлаған мұғалім ауруханадан шықты

    Семейде шыршадан құлаған мұғалім ауруханадан шықты

    Оқу-ағарту министрі Ғани Бейсембаев Семейде шырша безендіремін деп биіктіктен құлап кеткен мұғалімге қатысты тың деректерді айтты. Ал премьер-министрдің орынбасары Тамара Дүйсенова мұғалімнің жұмысқа тартылғаны өндірістік жарақатқа қандай жағдайда жататыны туралы түсіндіріп берді.

    «Бұл мәселемен қазір әкімдік айналысып жатыр. Бүгін таңертең ғана мұғалімнің ауруханадан сауығып шыққаны туралы маған хабар жетті. Бұл мәселені үнемі бақылауда ұстап отырмын. Қазір бірінші кезектегі тиісті шаралар қабылданды. Бұл жұмыс ары қарай да жалғасатын болады деп есептеймін. Жазаланатындар жазаланды. Бұл бәріне тиісті үлгі болуы керек. Тексеру толықтай аяқталғаннан кейін тиісті шаралар қолданылады деп есептеймін», – деді министр.

    Министр атағандай, 2019 жылы қабылданған заң аясында мұғалімдерді өзінің мамандығына сәйкес келмейтін қандайда бір қосымша жұмыстарға тартуға болмайды.

    «Осы заң орындалуы керек. Бұл заңның жергілікті жерлерде қаншалықты орындалып жатқанында. Осыған қатысты мен тапсырма бердім. Жергілікті жерлерде сапаны қамтамасыз ететін департаменттер бар. Қазір олар тексеріс жасап, мониторинг жүргізіп жатыр. Мұғалімдерді жергілікті жерлерде, әсіресе аудандарда қажетсіз, өзінің мамандығына сәйкес келмейтін жұмыстарға тартудың бар-жоғы анықталып жатыр. Енді еріктілерге қатысты мәселе біздің министрліктің құзыретіне кіретін заңнама емес. Ұсыныс қажет болса, біз оны міндетті түрде оны көтереміз», – дейді Бейсенбаев. 

    Ал премьер-министрдің орынбасары Тамара Дүйсенова егер мұғалім жұмысқа құжат бойынша тартылса, оқыс оқиға өндірістік жарақат ретінде саналатынын айтты.

    «Көбіне мәселе осыған байланысты туындайды. Жұмысқа тартылса да, құжат жүзінде ол тіркелмей қалады. Сол себепті қазір еңбек инспекциясы мен білім басқармасы осы мәселені зерттейді. Егер құжат рәсімделмесе, еңбек кодексіне сәйкес актілер толтырылуы керек. Шартсыз тартылса, жұмысқа тартқан адамдар заңды бұзған. Ал келісімшарт болса, ол өндірістік жарақат болады», – дейді Тамара Дүйсенова.

  • Колледждің бір студенті үшін 912 мың теңге жұмсалады

    Колледждің бір студенті үшін 912 мың теңге жұмсалады

    2025 жылдың 1 қыркүйегінен бастап Қазақстандағы колледждердің бір студентін даярлау үшін жылына 912 мың теңге бөлінеді. Бұл туралы бүгін үкіметте оқу-ағарту министрі Ғани Бейсембаев мәлім етті.

    Айта кетейік, бұрын бұл қаражат екі есеге аз еді.

    «Техникалық және кәсіптік білім беру ұйымдарының көптен күткен жаңалығы – 2025 жылы 1 қыркүйектен бастап жан басына шаққандағы қаржыландыру мөлшері ұлғаяды. Қазір қолданыстағы жан басына шаққандағы нормативтік қаржыландыру әдістемесіне сәйкес 1 студентті даярлау үшін бөлінетін қаржының орташа мөлшері 437 мың теңге болса, ол енді орташа есеппен 912 мың теңге болады», – деді Ғани Бейсембаев.

  • Астанада Ұлттық құзыреттер орталығы құрылады

    Астанада Ұлттық құзыреттер орталығы құрылады

    Жұмысшы мамандықтар жылының тағы бір жаңалығы Астана қаласында Ұлттық құзыреттер орталығын құру болмақ. Бұл орталық кәсіби құзыреттерді, жаңа технологиялық шешімдерді, заманауи кәсіби дағдыларды әзірлеп, өндіріске енгізуге ықпал етеді, – деді Ғани Бейсембаев.

    Оның айтуына қарағанда мұндай орталықтар әлемнің алдыңғы қатарлы индустриалдық мемлекеттерінде бұрыннан бар.

    – Сонымен қатар, Ұлттық құзыреттер орталығы базасында жыл бойы халықаралық чемпионаттарға арналған оқу-жаттығу лагерлері, республикалық чемпионат, педагогтерге арналған салалық курстар өткізіледі, – деді министр.

  • Оқулықтағы қателіктерге кім жауапты? – Министр жауабы

    Оқулықтағы қателіктерге кім жауапты? – Министр жауабы

    Журналистер министрден «Қазан айының басында Мәжілістің комитетінде оқу бағдарламасының мазмұнын жаңарту мәселесі қаралды. Оқу бағдарламасы қашан жаңартылады, кітаптар біркелкі әрі салмағы жеңіл болатындай бір ізге түсе ме?», – деп сұрады.

    «Оқулықтарға қойылатын талаптарға қатысты заңнамалық актілер толық қабылданған. Енді көбінесе бұл мәселені шешуде мектептердегі оқулықтарды шығаратын баспалардың осы тәртіпті сақтауына да байланысты. Екіншіден, жалпы мына мектептегі сабақ кестесіне қойылатын сабақтардың да санына өте байланысты екенін айта кеткен жөн. Бұрыннан келе жатқан дәстүрлі ережелер бар, соны қатаң сақтайтын болса, онда бұл мәселе қатты ушықпауы да мүмкін. Жалпы оқу бағдарламасына келсек, оқулық жаңаруы үшін бірінші кезекте стандарт жаңаруы керек. Қазір стандарт талқылану үстінде. Ол бекітілгеннен кейін оқу бағдарламалары қабылданып, соның негізінде оқулықтар жазылатын болады», – деді Ғани Бейсембаев Үкімет отырысынан кейінгі брифингте.

    Министр оқулықтарда кетіп жатқан қателіктерге жеке тоқталды. Сөзінше, бұл бағытта үлкен сараптамалық жұмыстар жүргізілген.

    «26 оқулықтағы қателіктер бары туралы резонанстық мәселе тудырған ақпараттар келіп түсті. Тек 11-інде ғана осындай қателіктердің бар екенін анықтадық. Қалғанында жалған ақпарат болып шықты. Сол 11 оқулықтағы қателіктерге қатысты 8-ін былтыр ауыстырдық, қалған оқулықтарды осы жылы баспалар ауыстырып жатыр. Оқулықтарда қателіктерді болдырмау бағытында баспалардың да жауапкершілігі қазір заңды тұрғыда күшейтіліп отыр. Бұдан былай баспа оқулықта қате жіберетін болса, онда өзінің қаржысы есебінен осы қателіктерді жөндеуге міндеттеледі. Мұндай шара ағылшын тілінің оқулығына байланысты қолданылды. 2022 жылы кеткен қателікке байланысты баспа түгелдей оқулықты өз есебінен ауыстырған болатын», – деді Оқу-ағарту министрі.

  • Мектептерде тамақтандыру сапасы төмен облыстар аталды

    Мектептерде тамақтандыру сапасы төмен облыстар аталды

    Оқу-ағарту министрі Ғани Бейсембаев елдегі мектеп асханаларының санитариялық-эпидемиологиялық талаптарға сәйкестігіне жүргізілген мониторинг қорытындысы туралы айтты.

    Министрдің айтуынша, республикалық мониторинг қорытындысы бойынша атқарушы органдар тарапынан әлі де болса бақылау жеткіліксіз болып отыр. Сондай-ақ ол мұны заңнама талаптарының бұзылу фактілерінен де анық аңғаруға болатынын атап өтті. Мониторинг тобы заң талаптарын бұзу бойынша 771 фактіні анықтаған.

    Ведомство басшысы мектепте тамақтандыруды ұйымдастыру бойынша кешенді бағалау жүргізілгенін атап өтті.

    Бағалау кезінде тамақтандыру сапасына жүргізілген мониторинг нәтижелері, асханалардың қажетті материалдық-техникалық жабдықталуы, 1 оқушыға шаққандағы өңірлердегі тамақтану құны, ата-аналар арасында жүргізілген сауалнама нәтижелері ескерілді. Оның нәтижесінде Жамбыл, Маңғыстау, Алматы, Атырау облыстарының және Шымкент қаласы әкімдіктерінің тарапынан мектептерде сапалы тамақтануды ұйымдастыруға тиісті деңгейде көңіл бөлінбей отырғандығы анықталды. Қазір министрлік мектепте тамақтандыру қызметтерін сатып алу кезінде өнім берушілерді іріктеу талаптарын бұзғаны үшін лауазымды тұлғаларға әкімшілік жауапкершілік енгізу мәселесін пысықтап жатыр, – деді Ғани Бейсембаев Үкімет отырысында.

    Айта кетсек, бұған дейін министрлік талаптарды күшейтіп, білім беру ұйымдарында тамақтандыруды ұйымдастыруға қатысты 7 нормативті-құқықтық актіні қайта қараған болатын.

  • Колледж студенттері онлайн оқуы мүмкін

    Колледж студенттері онлайн оқуы мүмкін

    Елімізде колледж студенттері онлайн оқуы мүмкін. Алайда бұл өзгеріс барлық мамандыққа қатысты емес.

    Оқу-ағарту министрінің айтуынша, онлайн оқыту форматын енгізудің негізгі мақсаты – колледждерге білім беру бағдарламаларын икемді бейімдеу, ал студенттерге жұмыстарын үзбей-ақ нақты практикалық дағдыларды қалыптастыруға жағдай жасау. Экономиканы цифрландыру жағдайында ерекше сұранысқа ие IT-мамандықтарға басты назар аударылмақ.

    Ғани Бейсембаев мұндай тәжірибе АҚШ, Канада, Қытай, Австралия және Ұлыбританияда оң нәтиже бергенін айтты. Бұл елдердегі онлайн оқыту білім беру процестерінің тиімділігін арттырған.

    «Бүгінде еңбек нарығы талаптарына жауап беретін мамандарды сапалы даярлауды іске асыру үшін колледж жүйесіне онлайн-оқытуды енгізу ұсынылады. Бұл өзгеріс өндірістен қол үзбей кадр даярлау мәселесін шешуге бағытталған және студенттерге оқу мен қызметін үйлестіре отырып, жеке бағдарламалар бойынша оқуға мүмкіндік беру көзделген», – деді министр.