Жаңа Салық кодексін 2025 жылдың шілдесіне дейін қабылданады. Ал 2026 жылдың 1 қаңтарынан бастап қолданысқа енеді. Бүгін Үкіметтің отырысында ҚР Премьер-Министрінің орынбасары –Ұлттық экономика министрі Нұрлан Байбазаров жаңа салық кодексіне қатысты ұсынысты мәлім етті.
«Жаңа Салық кодексін 2026 жылғы 1 қаңтардан бастап қолданысқа енгізе отырып, 2025 жылғы шілдеге дейін қабылдау ұсынылады. Бұл белсенді бұқаралық-түсіндіру жұмыстарын жүргізуге, заңға тәуелді актілерді әзірлеуге және Мемлекеттік кірістер комитетінің ақпараттық жүйелерін дайындауға мүмкіндік береді»,- деді Нұрлан Байбазаров.
Мемлекет басшысының фискалдық саясат жөніндегі тапсырмаларын іске асыру үшін қосымша мынадай мәселелер пысықталатын болады:
— жеке табыс салығының сараланған мөлшерлемесін белгілеу;
— банк секторы акционерлерінің дивидендтеріне әділ қосымша салық салу;
— салық жеңілдіктерінің тиімділігін арттыру;
— кәсіпкерлер үшін қолайлы жағдайларды нашарлатпай салық режимдерін оңтайландыру;
— салықтық әкімшілендіруді толық цифрландыру, оның жазалау тәсілінен бас тарту;
— цифрлық теңгені пайдалана отырып, қосымша құн салығын әкімшілендіру тетігін енгізу.
«Сонымен қатар, жоспарлы салықтық тексерулер алынып тасталады. Шамамен 5,0 млн теңге мөлшерінде берешек болған кезде кейінге қалдыру немесе бөліп-бөліп төлеу көзделген», — деді Премьер-Министрінің орынбасары –Ұлттық экономика министрі Нұрлан Байбазаров.
Естеріңізге сала кетейік, Президент 2 қыркүйекте жолдаған жолдауында жаңа салық кодексіне қатысты бірқатар мәселені көтерген болатын. Салыққа берешегі бар борышкерлердің шотын толықтай бұғаттауға болмайтынын ескерткен еді.