Sona.kz

Метка: Олжас Бектенов

  • Былтырғы нәтиже жаман емес, бірақ түйткіл әлі көп – Президент

    Былтырғы нәтиже жаман емес, бірақ түйткіл әлі көп – Президент

    Өткен жылды оң көрсеткіштермен аяқтадық. Бұл туралы Үкіметтің кеңейтілген отырысында Президент Қасым-Жомарт Тоқаев мәлім етті.

    «Былтыр біраз қиындық болғаны рас. Экономиканың дамуына көптеген жағымсыз факторлар ықпал етті. Дегенмен, біз ахуалды ушықтырмай, бақылауда ұстай алдық. Жалпы нәтиже жаман емес деуге болады. Өткен жылды оң көрсеткіштермен аяқтадық. Алайда жайбарақат отыруға болмайды, шешімін табуы қажет түйткілдер әлі де көп. Мұны сарапшылар да, азаматтар да жақсы біледі», – деді Мемлекет басшысы.

    Президент еліміздің экономикасын әртараптандыру міндеті тиісті деңгейде орындалмағанын айтты.

    «Экономикамыз Ұлттық қордың қаржысына аса тәуелді болып тұр. Бірақ, осы жерде атап өтуіміз керек, Ұлттық қор – бұл мемлекеттік экономиканың ажырамас бөлігі. Бизнестің инвестициялық белсендігі әлі де болса төмен деңгейде. Бұл олқылықтарды биылдан қалдырмай дереу жою қажет. Үкімет нақты шаралар қабылдауы тиіс, – деді Қасым-Жомарт Тоқаев.

  • Олжас Бектенов: Бағаның күрт қымбаттауына жол бермейміз

    Олжас Бектенов: Бағаның күрт қымбаттауына жол бермейміз

    Премьер-министр Олжас Бектенов Үкіметтің кеңейтілген отырысында экономиканы ырықтандыру саясаты қалай іске асатынын айтты.

    «Экономиканың қаржыландыру көлемі үлкен секторларында бағаны шамадан тыс мемлекеттік реттеу бұл міндетті қиындата түсіп, инвеститициялық әлеуетті төмендетіп отыр. Үкімет жанар-жағармай материалдары мен газ бағасын, тұрғын үй-коммуналдық шаруашылық және теміржол тасымалы салаларындағы тарифтерді кезең-кезеңмен ырықтандырыла бастады», – деді ол.

    Премьер-министр нарықтық баға саясатына көшудің артықшылықтарына да тоқталды.

    «Біртіндеп нарықтық баға саясатына көшу осы салаларға қажетті инвестицияларды тартуға және жанармай тапшылығының алдын алуға мүмкіндік береді. Біз бағаның күрт қымбаттауына жол бермейміз. Осыны баса айтқым келеді», – деді Үкімет басшысы.

     

  • 2024 жылы экономика 4,8 пайызға өсті – Олжас Бектенов

    2024 жылы экономика 4,8 пайызға өсті – Олжас Бектенов

    Аграрлық сектор мен өңдеуші салада соңғы 10 жыл ішіндегі ең қарқынды өсім тіркелді. Бұл туралы Үкіметтің кеңейтілген отырысы барысында Премьер-министр Олжас Бектенов айтты.

    «2024 жылы экономика 4,8 пайызға өсті. Ауыл шаруашылығында 13,7 пайыз, құрылыста – 13,1, саудада – 9,1, көлік саласында 8,5 пайыз деңгейінде өсімге қол жеткізілді. Өңдеу өнеркәсібінің көлемі 5,9 пайызға ұлғайды. Аграрлық сектор мен өңдеуші салада соңғы 10 жыл ішіндегі ең қарқынды өсім тіркелді, – деді Олжас Бектенов.  Оның айтуынша, мұнай өндіру көлемі 2 млн 400 мың тоннаға төмендеп, жалпы ішкі өнімнің өсу қарқынына кері әсерін тигізді.

    «Бұл көбіне еліміздің ОПЕК+ аясындағы міндеттемелеріне және ірі кен орындарындағы күрделі жөндеу жұмыстарына байланысты болды», – деді Үкімет басшысы.

     

     

  • Тоқаевтың төрағалығымен Үкіметтің кеңейтілген отырысы өтеді

    Тоқаевтың төрағалығымен Үкіметтің кеңейтілген отырысы өтеді

    Ақорда атап өткендей, жиында еліміздің 2024 жылға арналған әлеуметтік-экономикалық дамуының қорытындысы шығарылып, алдағы кезеңге арналған міндеттер тұжырымдалады. 

    Премьер-министр Олжас Бектенов, Ұлттық банк басшысы Тимур Сүлейменов және облыс әкімдері есеп береді.

    Бұл 28 қаңтар сейсенбі күні болады,  бір аптадан аз уақыт қалды. Еске салайық, өткен жылғы кеңейтілген отырыс алдында Тоқаев үкіметті отставкаға жіберген болатын.

  • Жалға берілетін жеңілдікті тұрғын үй бағдарламасын кеңейту қажет – Премьер-министр

    Жалға берілетін жеңілдікті тұрғын үй бағдарламасын кеңейту қажет – Премьер-министр

    Кеңеске Өнеркәсіп және құрылыс, Ұлттық экономика, Қаржы министрліктерінің, «Отбасы банк» АҚ, «Самұрық-Қазына» ҰӘҚ» АҚ, «Бәйтерек» ҰБХ» АҚ басшылығы қатысты.

    «Отбасы банкін» даму институтына айналдыру және саланы одан әрі дамыту үшін жеке қаражатты тарту жөніндегі жұмысты жандандыру тәсілдері, сондай-ақ жеңілдікті бағдарламаларды қаржыландыру, оның ішінде өнеркәсіп кәсіпорындары қызметкерлерін қолдау және жаңа өнімдерді шығару бойынша ұсыныстар талқыланды. Бүгінде «Қаражанбасмұнай», «Шұбаркөл көмір», «Еуроазияттық энергетикалық корпорация», «ССКӨБ», «Қазхром» ТҰК», «Қазақстан алюминиі», «Қазақстан электролиз зауыты» сияқты ірі кәсіпорындар және басқа да ұйымдармен жұмысшы кәсіп мамандары отбасыларының тұрмысын жақсарту жұмыстары басталды.

    Премьер-министр Жұмысшы мамандықтары жылы аясында техникалық мамандарға арналған ипотекалық және жалға берілетін жеңілдікті тұрғын үй бағдарламасын кеңейту қажеттігін атап өтті. Банктің трансформациясы оның «бір терезе» қағидаты бойынша мұқтаж азаматтарды баспанамен қамтамасыз ету жұмысын күшейтуге және жалпы алғанда еліміздің экономикасын дамытуға бағытталған.

    Өнеркәсіп және құрылыс министрлігінің деректері бойынша, 2024 жылдың қорытындысында Қазақстанда рекордтық 18,9 млн шаршы метр тұрғын үй пайдалануға берілді, бұл өткен жылмен салыстырғанда 6,4%-ға артық. Саланың нақты көлем индексі бір жылда 113,1%-ды құрады. 2029 жылға қарай 111 млн шаршы метрге жеткізу жөніндегі Президент қойған міндеттерді орындау бойынша жұмыс жүргізілуде.

  • Жұмысшы кадрлар үшін ипотекалық бағдарлама іске қосылмақ

    Жұмысшы кадрлар үшін ипотекалық бағдарлама іске қосылмақ

    Олжас Бектенов жұмысшы кадрлар үшін ипотекалық және жалға берілетін тұрғын үйдің жеңілдетілген бағдарламаларын іске қосу мәселелерін пысықтауды тапсырды.

      «Жұмысшы кадрларды әлеуметтік қолдаудың үздік корпоративтік тәжірибесін кеңінен таратып, жаңа ынталандыру шараларын енгізу керек. Өнеркәсіп, Энергетика, Көлік, Ауыл шаруашылығы, Су ресурстары министрліктеріне кәсіпорындармен, әкімдіктермен және Отбасы банкімен бірлесіп, жұмысшы кадрлар үшін ипотекалық және жалға берілетін тұрғын үйдің жеңілдетілген бағдарламаларын іске қосу мәселелерін пысықтауды тапсырамын», – деді Үкімет отырысында Олжас Бектенов.

    Мәселені қарау қорытындысы бойынша Премьер-министр мүдделі мемлекеттік органдар, әкімдіктер, ұлттық компаниялар мен кәсіпорындарға Президент Қасым-Жомарт Тоқаев жариялаған Жұмысшы мамандықтары жылын өткізу жөніндегі салалық және өңірлік жоспарлардың сапалы іске асырылуын қамтамасыз етуді тапсырды.

    «Барлық іс-шаралар жүйелі, нәтижелі және олардың әлеуметтік-экономикалық ұзақмерзімді әсері болуы тиіс. Үкімет Жұмысшы мамандықтары жылын өткізу мәселелерін үнемі бақылауда ұстайды», – деп атап өтті Олжас Бектенов.

     

  • Елімізде жаңадан 12 футбол стадионы салынбақ

    Елімізде жаңадан 12 футбол стадионы салынбақ

    Бұл жайында Сенат депутаттарының сауалына Премьер-Министр Олжас Бектеновтің жауабында айтылған.  «Министрлік республика бойынша барлық спорт нысандарына түгендеу жұмыстарын жүргізді. Атап айтқанда, елімізде спорттың ойын түрлеріне арналған (футбол, волейбол, стритбол, воркаут) 6 100 жазықтық алаң бар, оның ішінде 1 200-ден астамы ауылдық жерлерде орналасқан.

    Ауылдық балалар мен жасөспірімдердің жыл бойы футболмен, мини футболмен және спорттық ойындармен шұғылдануы үшін 358 спорттық кешен қолданылады.  Елімізде 1 500-ден 30 000 орындық тиісті санаттағы 28 негізгі стадион бар, сондай-ақ Қызылорда қаласында 10 мың орындық трибуналары бар бір стадион салынып жатыр. Одан басқа елімізде 12 стадион құрылысы жоспарлануда. Осылайша, барлық стадиондарды УЕФА-ның халықаралық талаптарына сәйкестендіру бойынша жұмыстар кезең-кезеңмен жүргізілетін болады», – деді Үкімет басшысы жауабында.

    Сонымен қатар Премьер-министр Қазақстан футбол федерациясы УЕФА мамандарымен бірге 2034 жылға дейінгі қазақстандық футболды дамыту стратегиясын бекіткенін атап өтеді.

    – Стратегияда жалпы Қазақстанда кәсіпқой және әуесқой футболды кешенді дамытудың, футболшыларды даярлау жүйесін құрудың ерекшеліктері, футбол бизнесі индустриясын құру, халықаралық аренадағы спорттық нәтижелерді жақсарту бағытында кәсіпқой футболды трансформациялау қарастырылған, – деді Олжас Бектенов.

  • Үш жылда ауылдарда 180 мектеп салынады

    Үш жылда ауылдарда 180 мектеп салынады

    Ауылдық аумақтарды дамыту тұжырымдамасы шеңберінде 2027 жылға дейін 180-ге жуық мектеп салу жоспарланған.

    Үкімет басшысы қазір ауыл мектебі – тек білім ордасы ғана емес, жергілікті халық үшін мәдениет ошағына, рухани орталыққа айналғанын, Мемлекет басшысы ауыл мектептерін дамытуға ерекше көңіл бөліп отырғанын атап өтті.

    Биыл «Жайлы мектеп» ұлттық жобасын қоса алғанда, ауылдарда 42 мектеп пайдалануға берілді.

    «Соңғы үш жылда ауылдарда 2,5 мыңға жуық мектеп жаңғыртылды. Оқыту жағдайларын жақсарту және жайлы орта құру мақсатында 800-ден астам мектепті қайта жаңарту жұмысы жүргізіліп жатыр. Сондай-ақ ауыл мектептері үшін 4 мыңнан астам пәндік кабинет сатып алынды. Оқу-ағарту министрлігі жыл соңына дейін өңірлерге мектептерді қайта жаңартудың бірыңғай талаптарын ұсынуы керек. Онда білім ошақтарын күрделі жөндеу ғана емес, пәндік сыныптармен жабдықтау мәселесі де қаралуға тиіс», – деді О.Бектенов Үкімет отырысында.

    Ауылға білікті педагогтерді тарту мақсатында лауазымдық жалақыға 25% мөлшерінде қосымша ақы көзделген.

    Сондай-ақ, «Дипломмен ауылға» бағдарламасы шеңберінде педагогтерге көтерме жәрдемақы төленеді, сондай-ақ тұрғын үй сатып алуға немесе салуға тиімді несиелер беріледі.

  • Уақыт белдеуі өзгермейтін болды

    Уақыт белдеуі өзгермейтін болды

    Сауда және интеграция министрі Арман Шаққалиев өз баяндамасында қолданыстағы уақыт белдеуіне қатысты жан-жақты дәлелдерді келтіріп, нақты жауап берді. Үкімет бұл шешімді қолдайды. Біз бірыңғай уақыт белдеуіне бекерден бекер ауысқан жоқпыз. Ел аумағының көп бөлігі UTC+5 уақыт белдеуінде орналасқан. Сондықтан бұл – ғылым тұрғыдан дұрыс шешім. Сауда және ақпарат министрліктеріне жан-жақты ақпараттық түсіндіру жұмыстарын жүргізуді тасырамын, – деді Олжас Бектенов Үкімет отырысында.

    Айта кетейік, географиялық жағынан Қазақстан UTC+3, UTC+4, UTC+5, UTC+6 белдеуінде орналасқан. Бұған дейін елімізде UTC+5, UTC+6 белдеуі қолданылады. Еліміздің батыс өңірі басқа аймақтарға қарағанда бір сағат артта жүрді. 2024 жылдың 1 наурызынан бастап ел бойынша UTC+5 белдеуі енгізілді.

     

  • Биыл тағы 78 ауыл жабылды

    Биыл тағы 78 ауыл жабылды

    Бір жыл ішінде еліміздегі 78 елді мекен қаңырап бос қалды. Оның сыртында қазір адам саны 50-ге де жетпейтін ауылдар көп, деп хабарлайды «Астана» телеарнасы.

    Бізде тұрғыны көп өлкеден теріскейге адам шоғырландыру жобасы бар. Бірақ оның да пайдасын көріп жатқанымыз шамалы. Депутаттар бағдарламаның жемқорларға желініп біткенін алға тартып отыр.

    Былтыр елде 6 286 ауыл болған. Биыл ол 6 208-ге қысқарды. Демек тағы 78 елді мекен жойылды деген сөз. Жалпы, соңғы 10 жылда ауыл саны айтарлықтай азайған. 500 елді мекеннің орнын сипап қалдық.

    Тұрғындар мұны жұмыстың жоқтығы, ақшаның аздығымен байланыстырады.

    Қазір елде адам саны 50-ге де жетпейтін 546 ауыл бар. Әрқайсысында шамамен тек 26 тұрғын өмір сүріп жатыр. Ал заң бойынша тұрғын саны 50 азаматтан аз болса, ол елді мекен жабылуға тиіс.

    Бірақ депутаттар мұнымен келіспейді. «Жай жаба берсек, алтын бесігімізден айырыламыз» дейді. Сол үшін Үкімет тиісті шаралар қабылдауы керек.

    Қазір халықтың 38%-ы ауылда тұрады. Бұл – 7,5 млн адам. Ал даму әлеуеті бар жерлердің саны – 3,5 мың. Соның ішінде 1,2 мыңы – тірек ауыл, 2,3 мыңы – серік-спутник саналады. Оларда ауыл халқының 90%-ы қоныстанған.

    «ҚР әкімшілік-аумақтық құрылысы туралы» заңының 2-бабы 3-тармағына сәйкес, халқының саны 50 адамнан азайған шаруа қоныстары мен өзге елді мекендер ең жақын елді мекеннің құрамына енгiзiледi. Мұндай ауылдық елді мекендердің тұрғындары орталық ауылдарда көрсетілетін қызметтерді пайдалана алады және осы жерде тұру құқығын сақтайды. Мемлекет оқушыларды тасымалдауды ұйымдастыруды, сондай-ақ пошта, медициналық қызметтер көрсетуді және басқасын қоса алғанда, базалық инфрақұрылымды қолдауды жалғастырып жатыр, – дейді премьер-министр Олжас Бектенов.