Sona.kz

Метка: ҚР Ішкі істер министрлігі

  • Жалған полицей адамдардан ақша бопсалап келген

    Жалған полицей адамдардан ақша бопсалап келген

    Ішкі істер министірлігінің мәліметінше, олардың барлығы өздерін полиция қызметкері ретінде таныстырып, «қорғаймыз» деген желеумен ақша бопсалап, алаяқтықпен айналысқан.

    Атап айтар болсақ, алаяқтықпен айналысқан бір топ адам Шымкентте құрықталды. Олар өздерін полиция қызметкерлеріміз деп таныстырып «қорғағандары» үшін ай сайын 1,5 миллион теңге алып отырған. Сонымен қатар, дәл осындай жағдаймен Алматы облысының 2 тұрғыны ұсталды. Олар өздерін жедел уәкіл ретінде таныстырып, жәбірленушіден 500 мың теңге бопсалаған екен. Қазіргі таңда, олар пайдаланған жалған қызметтік куәліктер, құжаттар мен полиция қызметкерлерінің киімдері тәркіленді.

    «Жалған полиция қызметкерлерін ұстау бұл қауіпсіздік мәселесі ғана емес, азаматтар құқықтарын қорғаудың маңыздылығы. Егер азаматтар қырағы әрі мұндай сәттерде мұқият болса, осындай қылмыстардың саны едәуір төмендеуі мүмкін. Бұл бағыттағы профилактикалық жұмыстар әлі де жалғасып жатыр», – деді ұйымдасқан қылмысқа қарсы күрес департаментінің өкілі Қуандық Алпыс.

  • Ішкі істер министрлігі ата-аналарға үндеу жасады

    Ішкі істер министрлігі ата-аналарға үндеу жасады

    Ішкі істер министрлігі ата-аналарға үндеу жасады. Ведомство өкілдері қалың қардың түсуіне байланысты ата-аналарды балалардың қауіпсіздігіне көбірек көңіл бөлуге шақырды.

    Жол бойында шанамен сырғанау сияқты қысқы ойындар қауіпті болуы мүмкін. Балалар көп жағдайда айналасындағы қатерді байқамайды және сырғанақтан тікелей жолға қарай шығып кетуі ықтимал. Бұл олардың жарақаттануына немесе жол-көлік оқиғаларына әкелуі мүмкін, – деді ІІМ әкімшілік полиция комитетінің ерекше тапсырмалар жөніндегі аға инспекторы Ақтоты Боранова.

    Осыған байланысты балаларға негізгі қағидаларды түсіндіру қажет:

    • тек тротуарлар мен жаяу жүргіншілер жолдарымен жүру керек;
    • жолдың жанында ойнауға болмайды;
    • жолды кесіп өту кезінде екі жаққа да қарау керек.
    • қыста балаларға көлік жүргізушісі көретіндей ашық түсті, көзге көрінетін киім кигізу маңызды.

    Балаларымыздың қауіпсіздігін бірге қамтамасыз етейік! Сіздің жанашырлығыңыз бен қырағылығыңыз көптеген жазатайым оқиғалардың алдын алады! – деді Ақтоты Боранова.

  • Кентауда «Хизб-ут-Тахрир» тобының мүшелері ұсталды

    Кентауда «Хизб-ут-Тахрир» тобының мүшелері ұсталды

    Ішкі істер министрлігінің мәліметінше, экстремизмге қарсы іс-қимыл жөніндегі бөлімшесі ұлттық қауіпсіздік комитетінің көмегімен «Хизб-ут-Тахрир» ұйымының 10 мүшесін ұстады.

    «Топ мүшелері шетелдік радикалды уағызшылардың, соның ішінде «Хизб-ут-Тахрир» ұйымының дәрістерін тыңдап, тарату үшін интернет-ресурстарды пайдаланған», – делінген ІІМ түсіндірмесінде.

    Белгілі болғандай, топтың жетекшісі бұрын тыйым салынған діни-экстремистік ұйымның қызметіне қатысқаны үшін сотталған. Тінту кезінде топ мүшелерінен діни-экстремистік әдебиеттер мен басқа да дәлелдер табылды. Терроризмді насихаттау және діни араздық қоздыру әрекеттері бойынша сотқа дейінгі тергеу жүргізілуде.

    Еске сала кетейік, маусым айында «Хизб-ут-Тахрир» ұйымының екі мүшесі ұсталған болатын. Ал шілде айында осы ұйымның 22 радикалды мүшесі Шымкентте ұсталды.

    «Хизб-ут-Тахрир» террористік ұйымы Қазақстанда 2005 жылғы 28 наурыздан бастап ресми түрде тыйым салынған.

  • ІІМ-де жаңа департамент құрылды

    ІІМ-де жаңа департамент құрылды

    Киберқылмысқа қарсы күресті күшейту мақсатында ішкі істер министрлігінде жаңа департамент құрылды. Бұл бастама азаматтардың мүдделерін киберқылмыстарға қарсы іс-қимыл саласындағы артқан қауіп-қатерден қорғауға бағытталған.

    «Технологиялардың қарқынды дамуы және интернет-қатерлер санының артуы жағдайында арнайы бөлімше құру қазіргі заманның сын-тегеуріндеріне неғұрлым тиімді жауап беруге мүмкіндік береді», – деп атап өтті Ішкі істер министрі Ержан Сәденов.

    Жаңа департаменттің басшысы болып полиция полковнигі Жандос Сүйінбай тағайындалды.

  • Айдос Рысбаев Ішкі істер министрінің орынбасары қызметінен босатылды

    Айдос Рысбаев Ішкі істер министрінің орынбасары қызметінен босатылды

    Айдос Рысбаев ішкі істер министрінің орынбасары лауазымынан босатылды, — деп хабарлайды Ақорда.

    «Мемлекет басшысының өкімі бойынша, Айдос Какашаұлы Рысбаев Қазақстан Республикасы Ішкі істер министрінің орынбасары лауазымынан босатылды», — делінген хабарламада.

  • Талғардағы жасөспірім қазасы: ІІМ оқиғаның толық видеосын жариялады

    Талғардағы жасөспірім қазасы: ІІМ оқиғаның толық видеосын жариялады

    Ішкі істер министрінің бірінші орынбасары Бауыржан Аленов Талғар ауданындағы жағдайға байланысты әлеуметтік желіде түрлі ақпарат тарап жатқанын айтып, 4 қазанға қараған түні болған оқиғаның толық видеосын жариялау туралы шешім қабылданғанын жеткізді.

    Тергеу заңға сәйкес жүргізіледі. Оқиға орнында түсірілген видеоны жариялаймыз, — деді Аленов.

    «Қамажай» дүкені ішінде екі камера, сыртында бір камера қойылған.

    Дүкенде болған қыздар туралы әңгіме болып жатыр. Олар бір жігітті төбелеске жібермей ұстап отыр. Қыздар ажыратуға тырысқан, — дейді мамандар.

    Осылайша полиция дүкенде түсірілген толық видео қылмыстық іс материалдарына қосылғанын, ешқандай монтаж жасалмағанын айтты. Сондай-ақ видеода сыра мен темекі сатып алынған сәт, оның ақысын төлегені де көрсетілген. Полиция жанжал сыраның ақысын төлемегеннен туындаған деген болжамды жоққа шығарды.

  • Ішкі істер министрінің бірінші орынбасары тағайындалды

    Ішкі істер министрінің бірінші орынбасары тағайындалды

    Мемлекет басшысының өкімімен Бауыржан Төлегенұлы Әленов Қазақстан Республикасы Ішкі істер министрінің бірінші орынбасары лауазымына тағайындалды.

    Бауыржан Әленов 1976 жылғы 8 қарашада Көкшетау облысында дүниеге келген. Білімі бойынша заңгер, заң ғылымдарының магистрі.

    Ішкі істер органдарындағы қызметін 1997 жылғы мамыр айында Көкшетау қаласы Ішкі істер Бас басқармасына қарасты МҚКБ полициясының полиция батальоны болып бастаған. Әртүрлі қызметте істеді.

    2013 жылы Ақмола облысы ІІД Көкшетау қалалық ішкі істер басқармасының бастығы болып тағайындалды.

    2015-2018 жылдары Ақмола облысы Ішкі істер департаменті бастығының орынбасары болып істеді. Одан кейін Ақмола филиалы басшысының бірінші орынбасары болды.

    2019-2021 жылдары – Қазақстан ІІМ жетінші департаментінің бастығы.

    2021 жылдың қаңтарынан бастап – Қазақстан ІІМ жедел қызмет департаментінің бастығы,

    2022 жылдың қаңтарынан бастап Алматы облысының полициясын басқарған.

  • Ішкі істер министрінің орынбасары қызметінен босатылды

    Ішкі істер министрінің орынбасары қызметінен босатылды

    Мемлекет басшысының өкімімен Марат Шәдетханұлы Қожаев Қазақстан Республикасы Ішкі істер министрінің бірінші орынбасары лауазымынан босатылды.

    Марат Қожаев 1964 жылы 23 ақпанда туған. Білімі жоғары, 1989 жылы КСРО ІІМ Қарағанды жоғары мектебін, 2001 жылы ҚР ІІМ Академиясын тәмамдаған.

    Мансабы:

    • 1984 жылдан – Алматы облысы ІІБ Қаскелең ауданының ІІБ уақытша ұстау изоляторының милиционері;
    • 1989 жылдан 2001 жылға дейін тергеу қызметінде, оның ішінде Алматы облысы ІІБ басшылық лауазымдарында жұмыс істеді;
    • 2004 жылдан 2009 жылға дейін – Алматы қаласы ІІД бастығының орынбасары
    • 2012 жылғы ақпаннан бастап – Қазақстан Республикасы ІІМ Тергеу комитетінің төрағасы;
    • 2014 жылдың қыркүйегінен – Павлодар облысы ІІД бастығы;
    • 2017 жылғы желтоқсаннан бастап – Нұр-сұлтан қаласы ПД бастығы;
    • 2019 жылғы 6 сәуірден бастап – ҚР Ішкі істер министрінің бірінші орынбасары.

    Қызметте жеткен жетістіктері үшін ІІМ басшылығымен бірнеше рет көтермеленген, 2-ші дәрежелі «Айбын» (2013) орденімен және 7 медальмен марапатталған.

  • Баланы қатыгездікке итермелейтін қауіпті ойыннан сақ болыңыз

    Баланы қатыгездікке итермелейтін қауіпті ойыннан сақ болыңыз

    Бірнеше күннен бері ата-аналар чаттарында осындай хабарлама тарап жатыр. Осы кітаптардан, мына ойын түрлерінен  сақ болыңыздар деп ескертілуде.

     

    Осы жағдайдан кейін оқу-ағарту министрлігі ішкі істер министрлігіне қауіпті ойындарды бұғаттау жөнінде хат жолдады. Әлеуметтік желіде де ата-аналар дабыл қаға бастады. Себебі, ойынның жалпы құрылымынан адам шошиды. Атауының өзі оқушының үйден қашуы деген мағына береді.  Ал, бала үйден қашып шығу үшін онлайн түрде тапсырмаларды орындайды.

    «Бұл деген сұмдық! Үйден қашқан бала қайда барады? Әке-шешеден қашқан бала қай бір оңған бала? Таблетка беріп ұйықтатып тастау деген не сұмдық? Бара-бара әке-шешесін өлтіреді ғой бұлар. Ең сорақысы үшінші сыныптың оқушылары жаппай ойнайды екен бұл ойынды. Шешелері тексергенде ойнайтындарын мойындаған. Енді чатта шулап жатыр», — деп жазды фейсбуктегі парақшасында  Гүлжан Амангелдіқызы. https://www.facebook.com/guljanamangeldikyzy/posts/pfbid035Zc8U5icQ7ndZT8ejyBQU9yxLhF2BzKeQzX3R9kY6e7ZH7fGN3hLDxtAkHMTkx7Cl?rdid=JWxkopNVUoboTkXs

     Мұндай ойындар бала психологиясына қауіпті. Сондықтан, психолог мамандар барынша балаға көңіл бөлуге кеңес береді.

    «Ең оңай монепуляцияға ұшырайтын балалар, ата-ана тарапына көңіл бөлінбеген балалар. Өйткені, өзінің табиғатында бала көңіл бөлуге өте мұқтаж болады. Ата-ана менімеен сөйлессе екен, құшақтаса екен, мақтаса екен, қолдаса екен деп мұқтаж боолып тұрады. Оны ата-ана бермеген кезде, оны кім береді, соның әсерінде қалады», — деді  психолог Ержан  Мырзабаев.

    Мамандар, баланың телефонмен қандай қосымшаны көргенін біліп отыру үшін ата-аналарға бақылау бағдарламасын жүктеуге кеңес береді. Әрбір ойын тек ата-ананың рұқсатымен жүктелуі керек. Оқу ағарту министрлігі  қауіпті ойындарды бұғаттау бойынша шешуші шаралар қабылдау үшін Ішкі істер министрлігіне  хат жолдағанын жеткізді.

    «ҚР Оқу-ағарту министрлігі Балалардың құқықтарын қорғау комитеті балалардың киберқауіпсіздігін қамтамасыз етуге қатысты алаңдаушылық білдіруде. Интернет желісіндегі кез келген қауіп-қатердің алдын алу және балалардың қауіпсіздігін қамтамасыз етуді күшейту мақсатында Комитет бұл салада жауапты мемлекеттік органдар – ҚР Мәдениет және ақпарат министрлігіне, ҚР Ішкі істер министрлігіне зиянды цифрлық ойындарға мониторинг жүргізу және бұғаттау бойынша шешуші шаралар қабылдау жөнінде хат жолдады.

    Сондай-ақ Комитет бұған дейін балалардың онлайн қауіпсіздігін күшейтуге бағытталған науқандарға бастамашы болғанын еске саламыз. Атап айтқанда, жағымсыз контентке қол жеткізуді шектеу үшін «Ата-ана бақылауы» функциясын орнату. Бұдан бөлек, 1 қыркүйектен бастап барлық білім беру ұйымдарында «Жеке қауіпсіздік» сабақтары енгізіліп, балаларға интернеттегі қауіп-қатерден қорғану, өзін-өзі сақтау дағдыларын дамыту және түрлі қауіп пен сыни сағатта дұрыс мінез-құлық таныту жөнінде түсіндірілуде.

    «Біздің басты міндетіміз — балалардың қауіпсіздігін қамтамасыз ету. Ата-аналар балаларының қолданатын сайттарын қадағалап, оның онлайн белсенділігіне ерекше назар аударуы керек. Әсіресе, ата-ана бақылауының қолжетімді құралдарын міндетті түрде қолдану қажет. Баламен күнделікті қарапайым ғана әңгімелесу, балалардың өміріне қатысу — олар үшін қауіпсіз кеңістік құрудың жалғыз жолы. Өз кезегінде жауапты мемлекеттік органдар мұндай қауіп-қатерлерге тосқауыл қою үшін қолдан келгеннің бәрін жасайды», — деп атап өтті ҚР Оқу-ағарту министрлігі Балалардың құқықтарын қорғау комитетінің төрағасы Насымжан Оспанова.

    Бұл мәселенің түбегейлі шешілуін ҚР Оқу-ағарту министрлігі Балалардың құқықтарын қорғау комитеті бақылауда ұстайтын болады», — делінген ҚР Оқу-ағарту министрлігі Балалардың құқықтарын қорғау комитетінің хабарламасында.

    Бұл ойын түрлерін ұялы телефонға жүктемей, бірден ойнауға да болады екен. Сондықтан,  балаңыз бұл ойынды жүктемеді деп алаңсыз жүріп қалмаңыз. Барынша сақтық шараларын күшейтіңіз.