Түркістан облысында Сарыағаш қаласын айналып өтетін автомобиль жолының құрылысы басталды. ҚР Көлік министрлігінің мәліметінше, жаңа жолдың жалпы ұзындығы 102,6 шақырымды құрайды. Жоба аясында халықаралық стандарттарға сай келетін, төрт жолақты қозғалысы бар I-а техникалық санаттағы магистраль салу қарастырылған.
Жаңа бағыт Сарыағаш қаласының көше-жол желісіне түсетін транзиттік жүктемені азайтуға және Өзбекстан Республикасы бағытындағы логистикалық ағындарды оңтайландыруға мүмкіндік береді. Мамандардың болжамынша, жобаны іске асыру жүк және жолаушылар тасымалының уақытын қысқартып, шекара маңындағы сауданың дамуына серпін береді, сондай-ақ өңірдің халықаралық көлік дәліздеріндегі транзиттік әлеуетін арттырады.
Метка: құрылыс
-
Түркістан облысында Сарыағаш қаласын айналып өтетін автожолдың құрылысы басталды
-
Қонаевта кәріз-тазарту жүйесінің құрылысы басталды: 30 млрд.теңгеден астам қаржы жұмсалады
Қонаев қаласында бірнеше жылдан бері шешімін таппаған күрделі мәселеге нүкте қойылады. Жағымсыз иіс шығарып, 100% тозығы жеткен кәріз-тазарту жүйесінің орнына басқасы салынады, деп хабарлайды Қонаев қаласы әкімінің баспасөз қызметі.
Ескірген нысан қаладан 3-4 шақырым жерде орналасқан. Ал жаңа кәріз-тазарту жүйесі Қонаевтан 15 шақырым жерде бой көтереді.
Құрылысқа тапсырыс беруші – Алматы облысының энергетика және сумен жабдықтау басқармасы. Жоба мемлекеттік-жеке меншік серіктестік аясында жүзеге аспақ. Әріптес компания – «Daur Capital» ЖШС. Нысанның құрылысы 20 ай ішінде аяқталады деп жоспарлануда. Оған 33 млрд теңгеден астам қаржы жұмсалмақ.
Жаңа нысанның қуаттылығы тәулігіне 25 текше метрден астам суды сүзгіден өткізуге мүмкіндік береді. Кәріз-тазарту жүйесі 215 гектар аумақта салынады. Қазіргі таңда жер жұмыстарын бастауға дайындық жүріп жатыр. Негізгі технологиялық жабдықтар, құбырлар және жинақтаушы тоғандарға арналған гидрооқшаулағыш материалдар сатып алынды.
Тозығы жеткен кәріз-тазарту жүйесі жаңасы іске қосылғаннан кейін рекультивацияланады.
-
Биыл Қонаевта төрт әкімшілік ғимараттың құрылысы басталады
Шаһар басшысының сөзінше, биыл Департаменттер үйі, Оқушылар сарайы, Прокуратура, Ұлттық қауіпсіздік комитеті ғимараттарының құрылысы басталады. Тапсырыс беруші – Алматы облыстық құрылыс басқармасы. Барлық нысандар Бас жоспарға сәйкес, Алматы-Өскемен күре жолының бойында салынады. Ал спорт кешенін салу үшін «Самұрық-Қазына» АҚ өкілдерімен келіссөздер жүргізіледі.
Сонымен қатар ол бірнеше жылдан бері түйіні тарқатылмай келе жатқан кәріз-тазарту жүйесінің де құрылысы биыл басталуы мүмкін екенін айтты. Бұл ауқымды жоба мемлекеттік-жеке меншік әріптестік аясында жүзеге аспақ. Мұнда тапсырыс беруші – Алматы облысының салалық басқармасы.
«Құрметті депутаттар, менің ойымша, тек ауызбіршілік арқасында ортақ жұмыстың нәтижесін көреміз. Биылға жоспарларымыз өте көп. Біз өздеріңізден қолдау күтеміз. Алғысымды білдіремін», — деді шаһар басшысы сөзін қорытындылап.
Естеріңізге сала кетейік, күні кеше Қызылордада өткен Құрылтай кезінде ел Президенті Қасым-Жомарт Тоқаев Алматы облысында театр салынатынын айтты.
-
Сәулет және қала құрылысы бөлімінің басшысы тағайындалды
Қонаев қаласы әкімінің өкімімен Байдуанов Алишер Ерланұлы сәулет және қала құрылысы бөлімінің басшысы болып тағайындалды.
Ол 1993 жылы Астана қаласында дүниеге келген. Білімі – жоғары. 2012 жылы Қазақ бас сәулет-құрылыс академиясы жанындағы Сәулет колледжін, 2015 жылы Халықаралық Білім Беру Корпорациясын «архитектура» мамандығы бойынша тәмамдаған.
Еңбек жолын 2015 жылы жобалаушы-маман ретінде бастаған. 2016 жылдан бері Қапшағай, кейіннен Қонаев қаласының сәулет және қала құрылысы бөлімінде түрлі лауазымдарда қызмет атқарды.
-
Астанада LRT құрылысына қаржы тарту үшін жер телімдері сатылуда
“City Transportation Systems” ЖШС LRT құрылысына қаржы тарту мақсатында жылжымайтын мүлікті сатылымға қойды. Компанияда бұл қосымша қаржыландыру екені атап өтілді, деп хабарлайды Sona.kz NUR.KZ-ке сілтеме жасап.
9 қыркүйек күні e-qazyna.kz сайтында CTS-ке тиесілі Нұра ауданындағы жер телімі аукционға шығарылады. Бастапқы баға – шамамен 338 млн теңге. Сондай-ақ Есіл ауданындағы аяқталмаған құрылыс нысаны мен елорданың түрлі аудандарындағы басқа да нысандар сатылымға қойылған.
CTS баспасөз қызметінің хабарлауынша, сатудан түскен қаражат жеңіл рельсті көлік (LRT) құрылысына бағытталмақ. Бұл қосымша қаржыландыру болып табылады.
Компания нысандар сатылмаса да, LRT құрылысы тоқтамайтынын айтты.
CTS нысандардың компания қарамағына қалай өткенін де түсіндірді:
“Қазақстан Республикасының Азаматтық кодексінің 341-бабына сәйкес, “City Transportation Systems” ЖШС-не міндеттемелердің орындалуын қамтамасыз ететін талап ету құқықтары берілді. Қарызды өтеу үшін талап ету құқығын беру шеңберінде ЖШС-ке мүлік қабылданды. Ол мүлік сатылымға шығарылды”, – деді баспасөз қызметінде.
Астанадағы LRT құрылысы
Мамыр айының соңында Қытайдың Таньшань қаласынан Астанаға LRT-нің алғашқы екі құрамы жеткізілді. Жыл соңына дейін елордаға Қытайдан тағы 17 вагон әкелінеді. Маусым айының басында Астанаға ұзындығы 60 метрлік автоматтандырылған басқару жүйесі бар алғашқы LRT пойыздары жеткізілген болатын.
Осыдан кейін Abu Dhabi Plaza маңындағы станцияда екі вагоннан тұратын екінші LRT құрамы орнатылды.
Қыркүйек айында LRT-нің сынақ режиміндегі іске қосылуы жоспарланған. Бұл кезең шамамен жарты жылға созылады, ал осы уақытта көлік жолаушыларды тасымалдамайды.
Бұған дейін депутат LRT вагондарының ішкі көрінісін көрсеткен болатын. Маусым айында депоның 50%-ға аяқталғаны хабарланған.
Тамызда негізгі желі бойына рельстер төсеу жұмыстары толық аяқталды. Оның жалпы ұзындығы – 22,4 шақырым. Акимат бұл кезеңді LRT құрылысының негізгі кезеңдерінің бірі деп атады.
Сондай-ақ тамыз айында ресми түрде 18 станцияның атауы бекітілді.
-
Қонаевта жыл соңына дейін екі зауыт ашылады
Қонаев қаласында биылдың соңына дейін екі жаңа зауыт іске қосылады.
Президент Қасым-Жомарт Тоқаев барлық деңгейдегі әкімдерге инвестиция тарту және өнеркәсіп орындарын көбейту жөнінде тапсырма берген болатын. Осы бағытта Қонаев қаласында ауқымды жұмыстар атқарылуда.
Облыс орталығы мәртебесін алғаннан бері қалаға 308,8 млрд теңге инвестиция құйылды. Оның нәтижесінде «Оспанова Девелопмент» балық өңдеу зауыты ашылып, үш түрлі өнім шығаратын зауыт жаңғыртылды. Сонымен бірге қонақ үйлер мен демалыс аймақтары салынып, жаңа жұмыс орындары құрылуда.
Ресми деректерге сәйкес, Қонаевтың инвестициялық портфелінде 2024–2030 жылдары жүзеге асатын 39 жоба бар. Оның 11-і туризм саласына бағытталған. Жалпы құны 2,4 трлн теңгеге бағаланған бұл жобалар іске асса, 17 мың жаңа жұмыс орны ашылады.
Қала әкімі Асхат Бердіхановтың айтуынша, жыл соңына дейін «Run Planet» сусын шығаратын зауыт пен «Қапшағай бидай өнімдері» май, құрама жем және ұн өндіретін кәсіпорны іске қосылады.
2026 жылы әлеуметтік маңызы бар нысан – 48 орындық кардиологиялық орталық ашылмақ. Жоба құны – 1,5 млрд теңге. Орталық заманауи диагностикалық құрылғылармен және ота жасау кабинеттерімен жабдықталмақ.
Қазір қалада 12 өндіріс орны жұмыс істеп тұр. Олар өңір құрылғаннан бері 410,2 млрд теңгенің өнімін шығарған.
-
Қонаевта тұрғын үй құрылысы қарқын алды
Қонаев қаласында құрылыс қарқыны артып, жаңа тұрғын үй кешендері мен инфрақұрылымдық нысандар бой көтеріп жатыр.
Д. Қонаев көшесінде «MDI Construction» компаниясы жеті төрт қабатты блоктан тұратын «Маяк» тұрғын үй кешенін салып жатыр. Кешенде 216 пәтер, сондай-ақ тұрғындарға арналған кафе, дүкен және спорт залы болады.
19-шағынауданда «Хаммер Бау Девелопмент» компаниясы үш тоғыз қабатты үйден тұратын «Атамекен» кешенін тұрғызуда. Жоба 2025 жылдың соңына дейін толық аяқталмақ.
«Али-Нұр транс» компаниясы жүзеге асырып жатқан «NNS City» – ең ірі жобалардың бірі. Мұнда 21 бес қабатты үй салынып, 600-ге жуық пәтер пайдалануға беріледі. Алғашқы үйлер 2025 жылдың қарашасында тапсырылмақ.
Қала орталығында «Retail Construction» компаниясы 50 пәтерлік бес қабатты үй тұрғызуда. Нысан 2025 жылдың желтоқсанында аяқталады.
«R&M Construction» компаниясының «Аристократ» жобасы – 25 тұрғын үйден тұрады. Бірнеше үйі қазірдің өзінде қолданысқа берілген, толық аяқталуы 2027 жылға жоспарланған.
«GS QURYLYS» компаниясының «Comfort» кешені төрт үйден тұрады. Сауда орындары мен автотұрағы бар жоба 2026 жылдың алғашқы тоқсанында қолданысқа беріледі.
10-шағынауданда «Chinese Foreign Construction Company» «Феникс» кешенінің құрылысын бастады. Алғашқы кезек 2026 жылы аяқталады.
Әкімдік мәліметінше, биылғы алғашқы жартыжылдықта қалада 14,2 мың шаршы метр тұрғын үй пайдалануға берілген. Бұл өткен жылдың сәйкес кезеңімен салыстырғанда 65,2%-ға көп. Құрылыс көлемі – 8 млрд теңге.
-
«Құрылыста ең бастысы – сапа»: Қанат Ақылбеков өз тәжірибесімен бөлісті
Батыс Қазақстан облысы, Теректі ауданы, Ақжайық ауылында дүниеге келген Қанат бүгінде Қонаев қаласындағы тұрғын үй нысандарында құрылыс учаскесінің басшысы қызметін атқарады. Ол бұл мамандықты жай жұмыс емес, өмірлік жол деп санайды.
Қанаттың айтуынша, құрылысқа деген қызығушылығы 2018–2019 жылдары Алматыда ағаларына үй салуға көмектесіп жүрген кезде оянған. Ал әкесі де құрылыс саласының маманы болған.
«Бала күнімнен әкемнің еңбегін көріп өстім. Бұл мамандықтың жауапкершілігін сол кезде-ақ сезіндім. Кейін университетті аяқтап, еліміздегі ірі құрылыс компанияларының бірінде жұмысымды бастадым», – дейді Қанат.
Бүгінде ол құрылыс жұмыстарының әр кезеңін өзі қадағалап, сапа мен қауіпсіздікке ерекше мән береді.
«Материал қабылдау, іргетас құю, қабырға көтеру – бәрі менің бақылауымда. Себебі бұл үйлерде ертең адамдар тұрады. Әр кірпіш – біреудің өмірінің бөлшегі», – дейді ол.
Қанаттың пікірінше, құрылыс саласында кәсіби деңгейге жету үшін кемі 6–7 жыл үздіксіз еңбек ету қажет. Ол жастарға мамандықты жүрекпен таңдап, шыдамдылық танытуға кеңес береді.
«Көпшілік бірден табысқа жетуді қалайды. Бірақ бұл салада тәжірибе мен табандылық басты рөл ойнайды. Еңбектенуден қорықпау керек», – дейді ол.
Қанаттың келесі мақсаты – өз жобалау компаниясын ашу. «Жинаған білім мен тәжірибемді енді жеке кәсіп бастауға бағыттағым келеді. Бұл – тек бастамасы», – дейді ол сеніммен.
Әрбір сапалы салынған үй – құрылысшының қолтаңбасы. Ол – тек құрылыс нысаны емес, қауіпсіздік пен жайлылықтың символы. Қанат сынды мамандардың еңбегі – нағыз құрметке лайық.
-
Құрылыс — тәртіппен: Қонаевтағы рейд нәтижесі
Қонаев қаласында заңсыз орнатылған құрылыс нысандары мен сауда павильондарына қатысты бірлескен тексеру жүргізілді. Шараға қалалық сәулет, кәсіпкерлік бөлімдері мен прокуратура өкілдері қатысты.
Рейд барысында рұқсатсыз қойылған нысандар анықталып, иелеріне заңбұзушылықтарды жою туралы ескерту берілді. Сонымен қатар, құрылыс нормаларына сәйкес келмейтін жұмыстар да тіркеліп, құжаттар тиісті органдарға жолданды.
Мұндай бақылау жұмыстары Қонаевта тұрақты түрде жалғасады. Мақсат — қаланың заңға сай әрі қауіпсіз дамуын қамтамасыз ету.
-
Құрылыс алаңында бір адам көз жұмды
Қайғылы оқиға көпқабатты үйде болған. Build Invest құрылыс компаниясы салып жатқан тұрғын үй кешенінде лифт құлап кеткен. Салдарынан бір адам көз жұмды. Тағы бір адам ауруханаға жеткізілді, жағдайы ауыр.
«Қарағандыда салынып жатқан тұрғын үй кешені нысандарының бірінде болған оқиға бойынша, байқаусызда адамның өліміне немесе өзге де ауыр зардаптарға әкеп соққан тау-кен немесе құрылыс жұмыстарын жүргізу кезінде қауіпсіздік ережелерін бұзу фактісі бойынша қылмыстық іс қозғалды. Қазіргі уақытта бірқатар сараптамалар тағайындалды. Мән-жай анықталуда», – деп хабарлады Қарағанды облысы ПД баспасөз қызметі.