Sona.kz

Метка: Қырғызстан

  • Мәжіліс Қырғызстанмен шекарада орналасқан «Кеген» өткізу пунктін тәулік бойы жұмыс істеуге бекітті

    Мәжіліс Қырғызстанмен шекарада орналасқан «Кеген» өткізу пунктін тәулік бойы жұмыс істеуге бекітті

    Мәжіліс Қазақстан Республикасы Парламенті төменгі палатасы Қырғызстанмен шекарадағы «Кеген-автодорожный» өткізу пунктін тәулік бойы жұмыс істеу режиміне көшіру туралы протоколды ратификациялады. Бұл туралы Мажилис баспасөз қызметі хабарлады.
    Енді «Кеген-автодорожный» (Қазақстан) — «Каркыра-автодорожный» (Қырғызстан) өткізу пункті тек күндізгі уақытпен ғана емес, 24 сағат бойы қызмет көрсетеді.
    Бұл өзгеріс Қырғызстанмен үкіметтер арасындағы мемлекеттік шекара арқылы өткізу пункттері туралы келісімге енгізілген түзетулер негізінде жүзеге асырылады. Протокол 2024 жылғы 19 сәуірде Астанада қол қойылған. Ал келісім 2003 жылғы 25 желтоқсанда бекітілген.
    Неліктен маңызды?
    Мажилис мәліметінше, өткізу пунктінің тәулік бойы жұмыс істеуі:
    •Қазақстан мен Қырғызстан арасындағы шекаралық ынтымақтастықты нығайтады;
    •тауар айналымының өсуіне ықпал етеді;
    •туризм саласындағы байланыстарды кеңейтеді.
    Шекарадағы жағдай
    Қазақстан-Қырғызстан шекарасында қазіргі таңда 12 өткізу пункті жұмыс істейді:
    •8 көпжақты: Кеген, Карасу, Кордай, Сыпатай батыр, Айша-биби, Сартобе, Аухатты, Чалдовар
    •4 екіжақты: Аксу, Бесагаш, Алатау, Жайыл
    Сонымен қатар шекара халықаралық құқықтық тұрғыдан толық рәсімделген.
    Естеріңізге салсақ, «Кеген-автодорожный» өткізу пунктін тәулік бойы жұмыс істеуге көшіру туралы жоспар туралы алғашқы ақпарат 2022 жылдың маусымында айтылған еді.
  • Қазақстанда жұмыс істеген вебкам-студиялардың ұйымдастырушылары Қырғызстанда ұсталды

    Қазақстанда жұмыс істеген вебкам-студиялардың ұйымдастырушылары Қырғызстанда ұсталды

    Қырғызстанның құқық қорғау органдары Қазақстан аумағына да бағытталған вебкам-студияларды ұйымдастырды деген күдікпен бір топ адамды ұстады.

    Күштік құрылымдардың мәліметінше, күдіктілер Бішкек қаласында бірнеше пәтерді жалға алып, сол жерлерде интернет-платформалар арқылы ашық сипаттағы онлайн-трансляциялар жүргізген. Бұл мақсатта веб-камералар, кәсіби жарықтандыру құрылғылары мен компьютерлік техника пайдаланылған.

    Алдын ала деректерге сәйкес, заңсыз қызметтен түскен табыстар криптовалюта әмияндарына аударылып отырған. Тергеу нұсқасы бойынша, бұл қаржылық операцияларды жасыру және бақылаудан тыс қалдыру үшін қолданылған.

    Тінту барысында құқық қорғау органдары техникалық жабдықтарды, электрондық ақпарат тасымалдағыштарын және трансляциялар кезінде пайдаланылған арнайы костюмдерді тәркіледі. Іс бойынша Қырғызстан азаматтары ұсталған.

    Қазіргі уақытта тергеу-жедел шаралары жалғасуда. Вебкам-студиялардың қызметіне қатысы бар барлық тұлғалар, сондай-ақ ықтимал халықаралық байланыстар мен табыс көздері анықталып жатыр.

  • Мәскеу полициясы қырғыз мигранттарын моншада 5 сағат бойы азаптаған

    Мәскеу полициясы қырғыз мигранттарын моншада 5 сағат бойы азаптаған

    10 сәуірде Мәскеу полициясы қырғыз мигранттары барған «Бодрость» моншасына рейд жүргізіп, келушілерді соққыға жыққан.

     Бұл туралы сол күні моншада болған қырғыз азаматтары мәлімдеді. Әлеуметтік желіде сол күні болған оқиғаның видеосы да тарады.

    Мәскеуде бір айдан астам уақыт такси жүргізушісі болып жұмыс істеп жүрген Әлихан 10 сәуір кешке ағасымен және немере ағасымен бірге моншаға барған. Шамамен жарты сағаттан кейін олар әлдекімдердің есікті қалай сындырып жатқанын естіген және дүрбелең басталған.

    «Адамдар үрейленіп, қашуға тырысты. Біз де қашуға тырыстық, бірақ ешкімнің шығуына мүмкіндік бермеді. Кейін бәрін ұра бастады. Кім ұрып жатқаны түсініксіз — басыңды көтеруге де мүмкіндік жоқ. Олардың қолдарында таяқшалар мен электр шокерлер болды. Барлығын асүйге жинады. Күші бар деген еркектерді бөлді, ал әлсіз не арық көрінгендерді бір бөлмеге қалдырды. Сақалы бар адамдарды жеке алып кетті. Бір ер адамның мұртының жартысын сол жерде қырып тастады. Ол қарсылық көрсеткенде, бетінен ұрды. Біз не үшін ұрып жатқанын түсінбедік — ешкім құжаттарды сұраған жоқ. Бір адам орнынан тұрып, себебін сұрады, оған «Бізге тек сендер ұнамай тұрсыңдар» деп жауап берді», — деді ол.

    Әлиханның айтуынша, ұрып-соғу шамамен бес сағатқа созылып, полицейлер түрлі қорлық көрсеткен.

    «Біреуінің қалтасынан насыбай тауып алды. Сөйтіп сол насыбайды бәрінің аузына тығып, жегізді. Кейбірін қол күрестіріп, жеңілгендерді соққыға жықты. Кейбірінің құжатын жыртып тастады. Киімшең болғандарды бассейнге секіртті. Кейбірінің қалтасындағы ақшаны тартып алды. Бір адамға жарты келі ащы бұрыш жегізді» – дейді Әлихан.

    Оның айтуынша, бес сағаттан соң полицияның лауазымды адамдары келген. Олар болған жайтты туралы сұрақ қойған кезде мигранттарға ешкім тимеген. Куәгердің сөзінше, моншада 60-қа тарта қырғыз азаматы болған. Кейін олардың бәрін түрлі полиция бөлімдеріне алып кеткен. Әлиханды 1-2 сағат ұстап, босатқан. Ал оның күйеу баласы Байназарға айыппұл салған. Ол не үшін айыппұл салғанын түсінбеген.

    Жогорку Кенеш депутаты Жанарбек Ақаев Қырғызстан Мәскеудегі моншада болған оқиғаға назар аударуы керек екенін айтты.

    Осы оқиғадан кейін Ресейдің Қырғызстандағы елшісі Қырғыз Республикасының Сыртқы істер министрлігіне шақырылып, оған нота тапсырылды.

    «Ресей тарапына құқық қорғау органдары жүргізген іс-шаралардың негіздері туралы ақпарат беру туралы ресми нота табысталды», – делінген хабарламада.

  • Қырғызстанға заңсыз жолмен бензин өткізгендер 15,5 млрд теңге тапқан

    Қырғызстанға заңсыз жолмен бензин өткізгендер 15,5 млрд теңге тапқан

    Қазақстаннан Қырғызстанға АИ-92 маркалы бензинін заңсыз шығарумен айналысқан қылмыстық топтың мүшелері ұсталды.

    Қаржылық мониторинг агенттігі қылмыстық топтың қызметін әшкереледі. Олар АИ-92 маркалы бензинін Қырғыз Республикасына заңсыз шығарып, сатып отырған.

    Тергеу барысында күдіктілердің Қазақстан аумағында бензинді еріткіш және дистиллят ретінде рәсімдеп, жалған құжаттар арқылы шекарадан заңсыз өткізгені анықталды.

    Жедел іздестіру іс-шаралары барысында «Түрксіб» станциясында заңсыз жолмен жөнелтілген 500 тоннаға жуық бензин тиелген 8 теміржол цистернасы ұсталды. Жүк «Қара Май Ойл» шағын мұнай өңдеу зауытынан жөнелтілген және Қырғызстанға бағытталған.

    «Тергеу мәліметтеріне сәйкес, 2023-2024 жылдары аталған шағын зауыттан 102 мың тоннадан астам мұнай өнімдері көрші мемлекетке экспортталған.

    Алдын ала есеп бойынша, қылмыстық топтың көлеңкелі айналымы соңғы екі жылда 15,5 млрд теңгеден асып түсті», – делінген хабарламада.

    Аталған іс бойынша үш күдіктіге мемлекетаралық іздеу жарияланды:

    • Попов Алексей Александрович, 27.04.1987 жылы туған, Қазақстан Республикасының азаматы, Жамбыл облысы, Тараз қаласының тумасы, бұрын сотталмаған;
    • Ибраимов Рахымжан Маматұлы, 29.01.1996 жылы туған, Қазақстан Республикасының азаматы, Өзбекстан Республикасының Чартак қаласының тумасы, бұрын сотталмаған;
    • Сағындықов Серік Ерланұлы, 29.07.1987 жылы туған, Қазақстан Республикасының азаматы, Жамбыл облысының тумасы, бұрын сотталмаған.

    «Оларға «камаққа алу» түріндегі бұлтартпау шарасы таңдалды. Егер сізге іздестіріліп жатқан тұлғалардың орналасқан жері туралы қандай да бір ақпарат белгілі болса, келесі телефондарға хабарласуды сұраймыз: +7-727-279-20-86 – кезекші бөлім.

    Сыйақы мен анонимділікке кепілдік беріледі», – деп хабарлайды ҚМА.

  • Қырғызстан экс-министрі мен оның ұлы 8 жылға сотталды

    Қырғызстан экс-министрі мен оның ұлы 8 жылға сотталды

    Қырғызстан Республикасының бұрынғы табиғи ресурстар, экология және техникалық қадағалау министрі Динара Құтманова мен оның ұлы Кемелбек Құтманов 8 жылға сотталды.

    Бішкек қаласының Первомай аудандық сотының үкімі бойынша Динара Құтманова Қырғызстан Республикасы Қылмыстық кодексінің «Қызмет бабын асыра пайдалану» бабы бойынша кінәлі деп танылып, оның мүлкі тәркіленіп, үш жыл мерзімге дейін мемлекеттік қызмет атқару құқығынан айырылып, сегіз жылға бас бостандығынан айырылды.

    Оның ұлы Кемелбек Құтманов аса ірі көлемде алаяқтық жасағаны үшін мүлкі тәркіленіп, үш жыл мерзімге жеке кәсіпкерлікпен айналысуға тыйым салынып, 8 жылға бас бостандығынан айырылды.

    Екеуі де табиғи ресурстар, экология және техникалық қадағалау министрлігінде қызмет атқара отырып, Қырғызстандағы ең ірі «Құмтор» кен орнын игеруден түскен қаражатты заңсыз пайдаланған.

    2023 жылдың жазында анасы мен ұлының 2021 жылдан бастап жыл сайын 3 млн 700 мың доллар шамасында қаражат жымқырып келгені анықталды. Бұл ретте, Қырғызстанның есеп палатасының қорытындысына сәйкес министрлік 720 млн сомды мақсатсыз пайдаланған. Ал  мемлекетке келтірілген залал 192 млн сомды құрады.

    Экс-министр 2023 жылдың шілдесінде ұсталды. Ол министр қызметін 2021 жылдың қазанынан 2023 жылдың наурызына дейін атқарды. Ал ұлы – Кемел Құтмановқа халықаралық іздеу жарияланды. Күдікті Түркияда ұсталып, 2023 жылдың қазан айында Қырғызстанға экстрадицияланды.

     

  • Екі қазақстандық полицейлерден 2500 доллар бопсалады деген күдікке ілінді

    Екі қазақстандық полицейлерден 2500 доллар бопсалады деген күдікке ілінді

    Қырғызстанның ІІМ Ішкі тергеу қызметі мен Шу облысы ІІД қызметкерлері ақша бопсалағаны үшін екі шетелдік азаматты ұстады, деп хабарлайды «АКИpress» порталы.

    1 ақпанда Қазақстан азаматтары әлеуметтік желілерде компроматтық видео жариялаймыз деп қорқытып, Шу облысының жол полициясы басқармасының қызметкерлерінен 2500 АҚШ долларын талап еткені туралы ақпарат түскен.

    Аталған факті бойынша Қырғыз Республикасы Қылмыстық кодексінің 208-бабы (бопсалау) бойынша қылмыстық іс қозғалды.

    «Тергеу барысында Сокулук ауданы, Военно-Антоновка ауылында қызмет атқарған полицияның жедел уәкілі А.Н. мен полиция аға сержанты М.Б. Mercedes-Benz автокөлігін тоқтатқаны анықталды. Оны Қазақстан азаматы, жүргізуші куәлігі жоқ Б.А. басқарған, ішінде А.Р. де болған. 

    Көлікті айып тұрағына сүйреп апара жатқанда, екі азамат патрульдік көліктің жәшігіне 6000 сом тастап, ақша жатқанын бейнежазбаға түсірген. Кейін осы видеоны пайдаланып, полицейлерден 2500 доллар талап еткені анықталды. Полиция 1990 жылы туған Б.А. мен 1984 жылы туған А.Р.-ды ұстап, уақытша ұстау изоляторына қамады», – делінген хабарламада.

    Тінту кезінде күдіктілерден таңбаланған ақшалай қаражат тәркіленді, ал істі толық анықтау үшін сот-медициналық сараптамалар тағайындалды.
    Қазіргі уақытта тергеу жалғасуда.

  • Қырғызстанда екі қар көшкіні жүрді

    Қырғызстанда екі қар көшкіні жүрді

    Өткен түні Төө-Ашуу асуында жүрген екі қар көшкіні алты жеңіл көлік пен бір шағын автобусты басып қалды.

    Қырғыз Республикасы Төтенше жағдайлар министрлігінің басшысы Бообек Әжікеевтің айтуынша, жолаушылар көлігінің бірін толығымен қар басып қалған, құтқарушылар одан 4 адамды алып шықты. Зардап шеккендердің арасында есінен танған әйел бар. Ол дереу ауруханаға жеткізілді.

    Қырғызстан Республикасы Көлік және коммуникация министрлігінің мәліметінше, қар көшкіні болған Бішкек-Ош тасжолының 132-ші шақырымында жолды тазалау жұмыстары жүргізілді. Жергілікті уақыт бойынша сағат 22:10–да «Сосновка» көліктік бақылау бекетінде жолаушылар көлігінің өтуіне қойылған шектеу алынды.

     

     

  • Қырғызстанның астанасын көшіру ұсынылды

    Қырғызстанның астанасын көшіру ұсынылды

       «Мен астанамызды басқа жерге көшіруді ұсынамын. Бұл мәселені қарастыру керек. Ыстықкөл облысында Асман қаласы салынып, оған 10 миллиард сом инвестиция тартылып жатыр. Темір жолды елорданың сыртына жылжыту үшін 550 миллион доллар, ал айналма жол салу үшін 1 миллиард доллардан астам қаражат қажет. Егер астананы көшіріп, министрлер кабинетін қала сыртына көшірсе, кептеліс мәселесі шешіледі», – деді депутат Бақытбек Марипов.

    Бұған дейін Бішкектегі кептеліс мәселесін шешу үшін депутат Эльмурза Сатыбалдиев елорда әкімдігіне оң рульді көліктерге кіруге тыйым салуды ұсынған болатын. Сондай-ақ, ел парламенті  Бішкектегі шығарындыларды азайту үшін Қазақстаннан көмір сатып алуды да қарастырып жатыр.

     

  • Қырғызстанда виза беру тәртібі өзгеріске ұшырады

    Қырғызстанда виза беру тәртібі өзгеріске ұшырады

    Қырғызстан еліне іскерлік, туристік немесе басқа да жеке мақсаттармен баруды жоспарлап отырған шетел азаматтарына 22 қаңтардан бастап бір реттік немесе көп мәртелікпен 90 күнге дейінгі мерзімге «Сапар визасы» («J» түрі) енгізіледі. Осы орайда, бұған дейін қолданыста болған «іскерлік», «туристік», «тау туризмі» секілді визалық санаттар жойылады.

    Жаңалықтар 2025 жылдың 22 қаңтарынан бастап «Электрондық виза» порталында қолжетімді болады. 2024 жылдың 5 қыркүйегінен бастап Қырғызстанда шетелдіктерді визасыз тіркеудің жаңа тәртібі күшіне енгені хабарлаған-ды. Яғни, бұл – енді елдегі шетелдік студенттерге деген университеттің жеке жауапкершілігі арта түсті деген сөз.

  • Никаб кигендер 120 мың теңге айыппұл төлейді

    Никаб кигендер 120 мың теңге айыппұл төлейді

    Қырғызстандағы қоғамдық орындарда никаб кигені үшін 20 мың сомға (119 мың теңгеге) жуық айыппұл салынады. Себебі, бұл мәселе елдің парламентінде талқыланып жатқан «Діни сенім бостандығы және діни бірлестіктер туралы» заң жобасында анық жазылды.

    Мемлекеттік органдардың ғимаратында және қоғамдық орындарда азаматтың жеке басын сәйкестендіру мүмкіндігі болуы қажет. Депутаттарға осы мақсатта әкімшілік кодекске 127.1-бап қосу ұсынылды. Оған сәйкес, жоғарыда аталған орындарда азаматтардың никаб киюіне тыйым салынады.

    Жоғары кеңестің депутаты Дастан Бекешев айыппұл сомасы тым жоғары екенін алға тартқан.

    «Бетіңізді жасыру үшін никаб немесе паранжа кигенге 20 мың сом айыппұл салады. Никабты халықтың әлеуметтік осал топтарынан шыққан әйелдер киеді. Бай әйелдерді никаб киюі сирек кездесетін жағдай», – деді депутат.

    Ол дін істері жөніндегі мемлекеттік комиссиядан заң жобасынан никабты қоғамдық орындарда киюге тыйым салу туралы норма алып тастауды сұраған. Алайда бастамашы топ азаматтардың жеке басын сәйкестендіру мүмкіндігі демократия қағидаттарынан қайшы келмейтінін алға тартты.