Қытай Халық Республикасының Алматыдағы Бас консулы Су Фанцю республикалық референдумға халықаралық байқаушы ретінде қатысып, дауыс беру барысына қатысты пікір білдірді. Ол Ұлттық кітапхана ғимаратында орналасқан №254 сайлау учаскесінде болып, ұйымдастыру жұмыстарының сапасына назар аударды.
Дипломаттың айтуынша, оның тобы қазірдің өзінде төрт сайлау учаскесін аралап үлгерген. Су Фанцю дауыс беру процесінің тыныш және заң аясында өтіп жатқанын атап өтті. «Біз бұл шараны Қазақстан Республикасындағы үлкен саяси оқиға деп санаймыз және жаңа Конституция жобасы бойынша референдумның табысты өтуіне тілектеспіз», — деді Бас консул. Сондай-ақ, ол Қытай тарапы қазақстандық әріптестерінің шақыруымен халықаралық байқау миссияларына әрқашан белсенді қатысуға дайын екенін жеткізді.
Метка: Қытай
-
Қытайдың Алматыдағы Бас консулы: «Бұл – Қазақстан үшін маңызды саяси оқиға»
-
Қытайда қызметкерлерге ерекше сыйақы: қолы жеткенше ақша алуға мүмкіндік берілді
Қытайдағы өндірістік компания Henan Kuangshan Crane жыл сайынғы сыйақы акциясын өткізді. Биыл бонусқа шамамен 26 млн доллар бөлінген бұл өткен жылмен салыстырғанда үш есе көп.
Ақпаратқа сәйкес, қолма-қол ақша 800-ге жуық үстелге жайылып қойылған. Қызметкерлерге өздері қалаған мөлшерде ақша алуға рұқсат берілді. Қанша көтере алса, сонша. Акцияға компанияның шамамен 7000 қызметкері қатысты.
Мұндай сыйақы беру компанияда жыл сайын ұйымдастырылады, бірақ 2026 жылы төлем көлемі айтарлықтай ұлғайған. Кәсіпорын басшылығы бонус мөлшерінің артуына қатысты ресми түсініктеме бермеді.
Қытайда қызметкерлерді ынталандыру үшін ірі сыйақылар төлеу тәжірибесі бар. Дегенмен мұндай акциялар қоғам назарын аударып, төлемдердің ауқымына байланысты талқыланады.
Сарапшылардың пікірінше, қосымша төлемдер компанияның қаржылық нәтижелерімен немесе білікті мамандарды ұстап қалу стратегиясымен байланысты болуы мүмкін.
Құқық бұзушылық немесе шағымдар туралы ақпарат жарияланған жоқ.
-
Димаш Құдайберген қатысқан шоу Қытайда телерейтингтің көшін бастады
Қазақстандық өнерпаз Димаш Құдайберген атқарушы продюсері болған «Voice Beyond Horizon» музыкалық жобасының алғашқы эпизоды Қытайда телерейтингтің көшін бастады. Бұл туралы Sona.kz Kazinform-ға сілтеме жасап хабарлайды.
Ақпаратқа сәйкес, жоба эфирге шыққан сәттен бастап көрермендер арасында жоғары қызығушылық тудырған.
Алғашқы шығарылымның қытайлық стримингтік платформалардағы тікелей көрсетілімдерінің жиынтық көрілімі 102 миллионнан асты.
Сондай-ақ әлеуметтік желілерде жобаға қатысты 143-тен астам ең көп талқыланған тақырып тіркелген.
Музыкалық жобада алты елден келген сегіз әртіс өнер көрсетіп, әртүрлі жанр мен бағыттағы шығармаларды ұсынған.
Димаш Құдайбергеннің ресми сайтында хабарланғандай, жоба қатысушыларының өнері түрлі мәдениеттердің музыкалық үндестігін көрсетуге мүмкіндік берген.
Жоба авторлары «Voice Beyond Horizon» бастамасының негізгі мақсаты — мәдени алмасуды дамыту және Ұлы Жібек жолы кеңістігіндегі музыкалық дәстүрлерді кеңінен таныту екенін атап өтеді.
Музыкалық жоба алдағы уақытта да телевизиялық маусым аясында эфирге шығуын жалғастырады.
-
Қытайда «әдепсіз» жазысуларға тыйым салынады
2026 жылғы 1 қаңтардан бастап Қытайда «Қоғамдық тәртіпті бұзғаны үшін жазалау туралы» заңның жаңа редакциясы күшіне енеді. Құжатқа сәйкес, әдепсіз ақпаратты таратуға қатысты жазалар қатаңдатылды, деп хабарлайды Sona.kz Kazinform-ға сілтеме жасап.
Жаңартылған нормалар цифрлық ортадағы «құқықтық вакуумды» жояды. Әкімшілік жауапкершілік эротикалық контентті кез келген байланыс арнасы арқылы — мессенджерлерде, әлеуметтік желілерде немесе жеке жазысуларда таратуға қатысты қолданылады.
Заңның 80-бабына сәйкес, әдепсіз материалдарды (кітап, фото, видео, аудио) жасау, тасымалдау, сату, жалға беру немесе тарату ақпараттық желілер немесе телефон арқылы жүргізілген жағдайда түрлі жазалар қарастырылған: 10–15 тәулікке әкімшілік қамау және 5 000 юаньға дейін айыппұл; жеңіл бұзушылықтар — 5 тәулікке қамау немесе 1 000–3 000 юань айыппұл; кәмелетке толмағандарды тарту жағдайында — ең қатаң жазалар.
Әлеуметтік қауымдастықтарды модерациялауға ерекше көңіл бөлінген. Әкімшілердің әрекетсіздігі қылмыстық жауапкершілікке алып келуі мүмкін. 30 адамнан асатын топтарды ұйымдастыру және басқару кезінде порнографиялық материалдар таралса, бұл да қылмыстық жауапкершілікке себеп болады.
Заң қабылданғанға дейін жеке чаттарда мұндай материалдарды тарату көбінесе этикалық қателік ретінде қарастырылған. Жаңа редакция бойынша, тарату формасы мен пайда алу мақсаты істің құқықтық бағасына әсер етпейді.
Мамандардың пікірінше, жаңа нормалар мессенджерлер мен әлеуметтік желілердің күнделікті қолданылуына айтарлықтай әсер етуі мүмкін, цифрлық контентке бақылауды күшейтеді.
Заңның орындалуы пайдаланушылар мен қауымдастық әкімшілерінің цифрлық қауіпсіздік пен этика стандарттарын сақтауға жауапкершілігін арттыратынын көрсетеді.
-
АҚШ Қытайға қарсы 100% кедендік баж енгізбек: әлемдік экономикаға әсері қандай болмақ
10 қазан күні АҚШ президенті Дональд Трамп Қытайдан келетін импортқа 100 пайыздық баж салығын енгізу жоспарын жариялады, деп хабарлайды Sona.kz Kazinform-ға сілтеме жасап.
Трамптың айтуынша, бұл шешім АҚШ пен Қытай арасындағы сауда қатынастарындағы «әділеттілікті қалпына келтіруге» бағытталған. Алайда сарапшылар мұндай қадам жаңа сауда соғысын туғызуы және әлемдік нарықтарға қысым жасауы мүмкін екенін ескертеді.
Мамандардың пікірінше, баж салығының өсуі Қытай тауарларының бағасын қымбаттатып, АҚШ-та инфляцияның үдеуіне және жеткізу тізбектерінің бұзылуына әкелуі ықтимал. Ең көп зардап шегетін салалар — технология және автокөлік өндірісі.
Сондай-ақ Қытай да жауап ретінде сирек кездесетін металдар мен электроника экспортына шектеу қоюы мүмкін, бұл өз кезегінде әлемдік өндіріс пен электроника бағасына әсер етеді.
Сарапшылардың пайымдауынша, жаңа баж толқыны әлемдік сауда жүйесі үшін үлкен сынаққа айналмақ, себебі нарықтар пандемия мен геосаяси шиеленістерден кейін әлі толық қалпына келген жоқ.
-
«Қазпошта» Қытаймен бірге маркетплейс іске қосады
«Қазпошта» АҚ электрондық коммерция мен цифрлық технологиялар саласындағы Қытайдың жетекші компанияларымен екі стратегиялық келісімге қол қойды.
Жоспарға сәйкес, Қазақстанда трансшекаралық маркетплейс іске қосылады. Платформа JD.com International сынды ірі қытайлық ритейлерлердің жеткізу тізбегін пайдаланып, тауарларды тікелей Қытай фабрикаларынан жеткізуге мүмкіндік береді. Жобаны 2025 жылдың IV тоқсанында іске қосу көзделген.
Президент тапсырмасына сәйкес, трансшекаралық сауданы дамыту үшін «Қазпошта» 2025 жылдың 14 тамызында China Poly Group (CITIC Poly Fund) компаниясымен бірлескен кәсіпорын құрды.
Жоба аясында шағын және орта бизнеске халықаралық нарыққа шығуға және тиімділігін арттыруға көмектесетін жаңа цифрлық шешімдер енгізіледі.
Сонымен қатар, Alipay Labs және Whale Cloud Technology компанияларымен келісім жасалды. Ол трансшекаралық саудаға арналған ашық цифрлық экожүйені дамытуға бағытталған. Бұл платформа 2026 жылы іске қосылады.
Әлемдегі ең ірі төлем жүйелерінің бірі — Alipay, онлайн және оффлайн төлемдерді бірыңғай экожүйеге біріктіру мүмкіндігін ұсынады.
«Трансшекаралық электрондық сауданы дамыту және бизнеске арналған заманауи сервистер құру — «Қазпоштаның» стратегиялық міндеті. Қытайлық серіктестердің қолдауын жоғары бағалаймыз және бұл жобалар ұзақ мерзімді әріптестіктің негізіне айналады деп сенеміз», — деді «Қазпошта» АҚ басқарма төрағасы Бекежан Жәкеев.
-
Қазақстандағы үшінші АЭС-ті Қытай салады: Скляр
Қазақстандағы үшінші атом электр станциясын Қытай компаниясы салуы мүмкін. Бұл туралы ҚР Премьер-Министрінің орынбасары Роман Скляр Үкіметтегі баспасөз мәслихатында мәлімдеді, деп хабарлайды Kazinform.
Оның айтуынша, станцияны салатын мердігер компания жобалау-сметалық құжаттама (ПСД) дайын болғаннан кейін анықталады. Аталған жоба аясындағы шығын көлемі де содан кейін белгілі болмақ.
«Үкіметаралық келісім, ынтымақтастық формасы сынды мәселелер қазіргі уақытта Ресей тарапымен келісу сатысында. Кейін бұл құжаттар Парламентке ратификацияға ұсынылады», – деді вице-премьер.
Склярдың мәліметінше, үшінші АЭС-ті екінші станцияны салуға қатысып жатқан сол қытайлық компания жүзеге асыруы мүмкін.
Қай өңірде салынатыны әзірге нақтыланбаған. Алайда техникалық талаптар ескерілуде.
«Станцияның жанында тұрақты су көзі болуы қажет. Сондай-ақ, электр энергиясын таратуға арналған аймақтар белгіленуі тиіс. Бұл мәселе жақын арада шешіледі», – деді Роман Скляр.
-
Қытайда жарқанаттан жаңа коронавирус табылды
Қытай ғалымдары HKU5-CoV-2 деп аталатын жаңа коронавирус түрін анықтады. Бұл штамм Гонконгтегі жапондық ергежейлі жарқанаттардан табылған.
Ғалымдардың айтуынша, вирус тез жұғалы және адамға тікелей немесе аралық тасымалдаушылар арқылы берілуі мүмкін.
Жаңа вирус қандай ауру тудырады?
HKU5-CoV-2 коронавирусы Таяу Шығыс респираторлық синдромын (MERS) қоздыруы мүмкін. Бұл ауру қатты жөтелмен қатар пневмония сияқты асқынуларға әкеледі. Бұған дейін COVID-19 вирусы да осындай ауыр тыныс алу жолдарының ауруларын тудырғаны белгілі.
Зерттеу қайда жасалды?
Зерттеу жұмыстарына Ухань вирусология институтының мамандары қатысқан. Бұл институт пандемияның алғашқы кезеңінде коронавирустың зертханадан таралуына қатысты айыптауларға ұшыраған еді. Зерттеу нәтижелері South China Morning Post басылымында жарияланды.
Қауіп бар ма?
Вирусологтар қазіргі уақытта жаңа вирусқа байланысты эпидемиялық қауіп жоқ екенін мәлімдеді. Алайда оның нақты қаупін анықтау үшін қосымша зерттеулер қажет. Ғалымдар вирустың адамға таралу мүмкіндігін толық зерттемейінше, болашақта қандай қауіп төндіретіні белгісіз.
-
Қытайдағы жер сілкінісі: 126 адам көз жұмды
Қытайдың жер сілкінісі болған аймағында құтқару жұыстары жүріп жатыр. Алдын ала мәлімет бойынша, 3600-ден астам үй құлаған, үйінділердің астында қалған 407 адам құтқарылып, 30 мыңнан астам адам қауіпсіз жерлерге көшірілді, деп хабарлайды Синьхуа ақпарат агенттігі.
Естеріңізге сала кетсек. Қытайдың оңтүстік-батысындағы Сицзан автономиялық ауданында болған 6,8 балдық жер сілкінісі 126 адамның өмірін қиды, тағы 188 адам жарақат алды, Гималайдың солтүстік беткейіндегі мыңдаған ауылдары бар үйлер қирады.
«Үйінділердің астында қалғандарды іздеу жалғасып жатыр. Құтқарушылар эвакуацияланғандар үшін шатырларды мүмкіндігінше тез орнатуға тырысады, өйткені бұл аймақтағы температура минус 17 градус Цельсийге дейін төмендейді деген болжам бар», — делінген ақпарат агенттігі таратқан хабарламада.
ҚХР Төрағасы Си Цзиньпин сейсенбіде мейліне көп адамның өмірін сақтап қалу және құрбандарды барынша азайту үшін іздеу-құтқару жұмыстарын жүргізуге бар күшті салуды бұйырды. Өңір билігі апат аймағына 12 мыңнан астам құтқарушыны, оның ішінде өрт сөндірушілер, әскери қызметшілер мен полицейлердің кәсіби құтқарушыларын жіберді.
Қаржы министрлігі мен төтенше жағдайларды басқару министрлігі Сицзандағы апатты жою әрекеттерін қолдау үшін 100 миллион юань, шамамен 13,9 миллион АҚШ доллары бөлгенін хабарлады. Даму және реформалар жөніндегі мемлекеттік комитет жер сілкінісінен кейін қалпына келтіруді қолдау үшін 100 миллион юань жіберді.
-
Қытайда 426 миллион доллар пара алған шенеунік өлім жазасына кесілді
Қытайда пара алғаны дәлелденген шенеунік Ли Цзяньпинге қатысты өлім жазасы туралы сот үкімі орындалды, деп хабарлайды ТАСС агенттігі.
Агенттіктің мәліметінше, Ли Цзяньпин Хоххот (Ішкі Моңғолия автономиялық ауданының әкімшілік орталығы, Солтүстік Қытай) техно-экономикалық даму аймағының жұмыс комитетінің хатшысы болып жұмыс істеген. Оған ұрлық және пара арқылы 3,06 миллиард юань (шамамен 426 миллион доллар) иемденді деген айып тағылды.
Қытай Халық Республикасының Жоғарғы халық сотының жолдауында көрсетілгендей, Ли Цзяньпин аты аталмаған мемлекеттік компаниядан алаяқтық жолмен 1,43 миллиард юаньнан (199 миллион доллар) астам ақшаны иемденіп алған. Сонымен қатар ол 577 миллион юань (80 миллион доллар) пара алып, 1,06 миллион юань (147 миллион доллар) жымқырған. Қаражаттың жартысын қайтару мүмкін болмады.