Sona.kz

Метка: Шерзат Полат

  • Шерзат Полаттың үйіндегі өртке қатысты іс қайта жанданды: Прокуратура жауабы

    Шерзат Полаттың үйіндегі өртке қатысты іс қайта жанданды: Прокуратура жауабы

    Алматы облысының прокуратурасы қаза тапқан жасөспірім Шерзат Полаттың отбасына тиесілі үйдің өртенуіне қатысты қылмыстық істің қайта жандандырылғанын хабарлады. 2024 жылдың күзінде басталған сотқа дейінгі тергеу амалдары бұған дейін уақытша тоқтатылған болатын.

    Бас прокурордың орынбасары Ғалымжан Қойгелдиевтің айтуынша, тергеу тобы Ресей Федерациясынан спутниктік суреттерді алуды күткен. Бұл мәліметтер оқиғаның мән-жайын толық анықтау үшін қажет болған. Облыс прокуроры Берік Адамов қазіргі уақытта К. Нұрымовтың үйіндегі өрт бойынша қажетті тергеу әрекеттері жүріп жатқанын, оның қорытындысы бойынша тиісті процестік шешім қабылданатынын айтты.

    Алайда, тергеу мүддесіне байланысты спутниктік мәліметтердің келіп-келмегені және күдіктілердің анықталғаны туралы ақпарат әзірге жарияланбайды. Еске сала кетейік, 2024 жылғы 12 қазанға қараған түні Азат ауылында Шерзат Болаттың отбасы тұратын үй өртеніп кеткен еді. Шерзаттың өліміне қатысты негізгі іс бойынша 9 адам сотталып, тиісті жазасын алды, бірақ үйді өртегендер әлі табылған жоқ.

  • Шерзат Полат ісі бойынша прокурор «Үздік мемлекеттік айыптаушы» атанды

    Шерзат Полат ісі бойынша прокурор «Үздік мемлекеттік айыптаушы» атанды

    Шерзат Полаттың өліміне қатысты істің мемлекеттік айыптаушысы болған прокурор Дана Сәрсенбай «Үздік мемлекеттік айыптаушы» төсбелгісімен марапатталды. Бұл туралы Бас прокуратураның бұйрығымен белгілі болды.

    Сот процесі кезінде Дана Сәрсенбайдың сөйлеу мәнері, кәсібилігі және айғақтарды жүйелі түрде жеткізуі әлеуметтік желі қолданушылары тарапынан жоғары бағаланған еді.

    Прокурор айыпталушылардың әрқайсысының әрекетіне қарай 1,5 жылдан 23 жылға дейін бас бостандығынан айыру жазасын сұраған.

    Шерзат Полаттың қазасына қатысты іс қоғамда үлкен резонанс тудырып, құқық қорғау органдарының жұмысына ерекше назар аудартқан болатын.

  • Шерзат соты жалғасуда

    Шерзат соты жалғасуда

    Талдықорғанда Шерзат Болаттың (Полат) өліміне қатысты атышулы іс бойынша сот отырысы жалғасуда. Жетісу облыстық мамандандырылған сотында қаралып жатқан процесте тоғыз айыпталушы, соның ішінде бір кәмелетке толмаған сот алдында жауап беруде.

    Қылмыстық істің ауқымы айтарлықтай:
    – 62 том іс;
    – 40 сот сараптамасы;
    – 200-ге жуық куәгер;
    – 8 видеоайғақ.

    Сот онлайн форматта көрсетіліп жатыр. Бұл – қоғамның назарын өзіне аударған резонансты іс.

    Еске салайық, 2024 жылдың 4 қазанына қараған түні Талғар қаласында болған жаппай төбелес кезінде 17 жастағы Шерзат қаза тапқан. Кейін оның үйі өртеніп, отбасын полиция қорғауға алды.

    Қоғам бұл іске қатысы барлардың бәрі жазалансын деп талап етіп отыр. Сот жалғасуда.

  • Шерзат ісі: Адвокатқа жедел жәрдем шақырылды

    Шерзат ісі: Адвокатқа жедел жәрдем шақырылды

    Шерзат Полаттың өліміне қатысты өтіп жатқан сотта жәбірленуші тараптың адвокаты Мейірман Шекеевтің жағдайы күрт нашарлады. Қан қысымы көтеріліп, жедел жәрдем шақырылған.

    Адвокаттың жағдайы тұрақталып, сот отырысына қайта қатысып отыр. Процесс жалғасып жатыр.

  • Шерзат ісі: Азамат Тоқтаубаев төрт рет істі болған

    Шерзат ісі: Азамат Тоқтаубаев төрт рет істі болған

    Шерзат Полаттың өліміне қатысты сотта Азамат Тоқтаубаевтың бұрын төрт рет істі болғаны белгілі болды. Прокурор оның неге пробациялық шешімді бұзғанын сұрағанда, Тоқтаубаев өзін үйқамақта болғанын және дәріханаға бару үшін сыртқа шығуға мәжбүр болғанын айтты. Ол заң бұзғанын мойындады.

    Айтуынша, ол уақытша ұстау изоляторында отырғанда, бұрынғы ісі бойынша 7 жылға сотталған. Бұған дейін 106-баппен — «адам денсаулығына қасақана зиян келтіру» бойынша бірнеше рет жауапқа тартылған. Ол 2017–2018, 2022 және 2024 жылдары істі болған.

  • «Тергеушілер ұрды»: Шерзат ісінде Нұрбол Тоқтаубаев жауап берді

    «Тергеушілер ұрды»: Шерзат ісінде Нұрбол Тоқтаубаев жауап берді

    Шерзат Полаттың өліміне қатысты сотта Нұрбол Тоқтаубаев тергеу кезіндегі жауабынан бас тартты. Ол өзіне және інісіне қысым көрсетіліп, тергеушілер ұрып-соққанын айтты.

    Оқиға кезінде досы Дархан Әскентай көмек сұрап шақырғанын, дүкенге барғанда сатушымен ақша үшін сөзге келгенін, кейін жанжал өршігенін жеткізді. Айтуынша, Қаржаубай Нұрымов екі рет пышақпен оқталған. Ал дүкенге қайта оралғанда, қарсы тарап шабуылдаған.

    Тоқтаубаев төбелеске қатысқанын, Ғайыпбаевты бір-екі рет тепкенін мойындады. Сондай-ақ, мылтықпен алғашқы болып Ғайыпбаев оқ атқанын айтты. Інісі Азаматты өзі шақырғанын растады.

    Сотта ол тергеу кезінде құқықтары түсіндірілмегенін, адвокатсыз жауап алғанын мәлімдеп, бұрынғы жауабынан толық бас тартты. Адвокаты азаптау туралы арызға жауап болмағанын айтса, прокурор келесі отырысқа дейін құжат ұсынуға уәде берді.

  • Шерзатты пышақтаған күні келген полицей күдіктінің сыныптасы болып шықты

    Шерзатты пышақтаған күні келген полицей күдіктінің сыныптасы болып шықты

    Шерзат ісінде түске дейінгі 1-бөлімінде сотталушылардың бірінің сыныптасы, Талғар ауданы полиция басқармасының рота патрульдік полиция қызметкері Жәнібек Әмірақын іске куәгер ретінде қатысты.

    Соттың қойған сұрағына ол «біреуін, Дархан Әскентайды танимын» деп жауап берді, Ержан Жанұзақовтың «Қашаннан бері?» дегеніне, «Бір мектепте оқығанбыз» деді. «Бір сыныпта?» деп тағы сұрақ қойды сот. «Әрине» деп нақтылады Жәнібек Әмірақын.

    Одан кейін мемлекеттік айыптаушының сұрақтарынан соң ол оқиға болған күнді есіне түсіріп көрді.

    – 4 қазан күні 12:42 шамасында Жедел кезекшінің нұсқауы бойынша «Талғар қаласы, Менделеев көшесінде төбелес болып жатыр» деген хабарлама түсті. Сол жерге 7-8 минут аралығында бардым. Барғанымда бір топ адамды көрдім, сөйлестім. Басында жердегі қанды көрдім. Адамдар «бір бала пышақталған, оны әкесі емханаға алып кетті» деді. Бәрін кезекші бөлімге хабарладым. Кейін күдікті автокөліктерді тауып, кезекшіге хабарластық. Сол кезде бір жігітті байқадық, оны әріптесім екеуіміз ұстадық. Ол «иә, мен Менделеев көшесінде болдым, төбелеске қатысым бар» деді. Ол Дархан Әскентай болып шықты. Дархан сыныптасым болса да, бірден танымадым, себебі көзі ісіп кеткен, тау жақта жарықшам жоқ, қараңғы болды. Ішімдіктің иісі сезілді, – деді Жәнібек Әмірақын.

  • Шерзат ісі: сотта екінші куәгер қыз оқиға кезіндегі жағдайды баяндады

    Шерзат ісі: сотта екінші куәгер қыз оқиға кезіндегі жағдайды баяндады

    Жетісу облысының қылмыстық істер жөніндегі мамандандырылған ауданаралық сотының ғимаратында Шерзат Полаттың өліміне байланысты сот отырысы өтіп жатыр.

    Сот отырысында былтыр 3-інен 4-ші қазанға қараған түні оқиға орнында болған куәгер Дана Жақсыгелді сөз сөйледі. Ол оқиға қалай болғанын баяндады.

    Оның айтуынша, Равиль Сәкиевтің шақыруымен куәгер Эльмира Нұрбековамен бірге мейрамханаға барған. Онда айыпталушылардың бірнешеуі болған.

    “Үйге қайтамыз дегенде «апарып тастаймыз, бірақ жолда дүкенге кірейік» деді. Бізде де темекі бітіп қалған еді. Сөйтіп дүкен алдында бір топ адам тұрды. Кейін біз дүкенге темекі алуға кірдік. Бірақ бізге «сатпаймы» деді. Сосын біз шықтық, сол кезде ерегес басталып кетті. Мен көліктің артына кеттім. Сол кезде атыс басталды. Сұр киім киген сақалды жігіт бірінші аспанға, сосын екі рет бізге қарай оқ атты. Кейін төбелес көшенің арғы бетіне кетіп қалды. Мен көліктің ішінде отырып, 5 минуттан кейін шығып ұлдарға «қайтайық» деп айқайладым. Ол кезде ешкім естіген жоқ. Қайтып көлікке отырдым. Төбелес не үшін басталғанын білмедім”, – деді Дана Жақсыгелді.

    Прокурор куәгерден «102», «103»-ке неліктен хабарласпағанын сұрады.

    “Ондай ойымда болған жоқ. Бір жағынан мылтықты өмірімде бірінші рет көрдім. Содан кейін қорқып, көлікте отырып қалдым. Өз өмірі үшін қорықтым”, – деді ол.

  • Шерзат соты: Куәгер Нұрбекованың жауабы тергеу кезіндегімен сәйкес келмеді

    Шерзат соты: Куәгер Нұрбекованың жауабы тергеу кезіндегімен сәйкес келмеді

    Талдықорғанда Шерзат Полаттың ісі бойынша сот процесі бүгін де жалғасты. Бұл жолы да Эльмира Нұрбекова жауап берді. Ол – қанды түні сотталушылармен бірге көлікпен бірге «Қамажай» дүкенінің алдына келген. Қазір ол іс бойынша қорғалуға құқығы бар куәгер ретінде өтіп жатыр,

    Адвокат Мейірман Шекеев бүгінгі сотта Эльмира Нұрбекованың тергеу барысында қазақ тілінде жауап бергенін, бірақ сотқа келіп, орыс тілінде жауап беріп жатқанына назар аударды. Тергеу мен соттағы жауабы неге екі түрлі шыққанын куәгердің өзінен сұрады.

    Сіз 5 қазан күні берген жауабыңызда Абзалдың қай жерге пышақ сұққанын дәлме-дәл айтып бердіңіз. Сізге ол қайдан белгілі? Мен сот материалдарын зерттеген кезде қарашаның 11-де ғана сараптама шыққан. Сол кезде ғана біз білдік. Сұрағымды нақтылап жатырмын. Сіз “көрген жоқпын, білген жоқпын” деп айтасыз, бірақ Шерзаттың денесіне пышақ солай тығылғанын – солай болғанын біреу сізге айтты ма, әлде өзіңіз солай жауап бердіңіз бе? 5 қазанда сіз дәл айттыңыз, – деді адвокат.

    Бұл сұраққа жауап берген Нұрбекова ұсталып, екі күн бойы тергеушілерге жауап бергенін айтты.

    Бізді ұстаған кезде екі күн бойы ұйқысыз өткіздік. Тамақ іше алмадық. Ішкі істер бөлімінде бізден 100-ге тарта адам жауап алды. Мен сол кезде тіпті олар не сұрағанын да білмеймін. Орыс тілінде жауап бердім. Олар қазақша қалай аударып отырғанына назар аудармадым. Үйге қайту үшін алдыма келген қағазға қол қоя бердім, – деді Эльмира Нұрбекова.

    Нұрбекованың қорғаушы өкілі адвокат Шекеевтің сұрауына жауап ретінде “біз тергеу кезінде Нұрбекованың “жүрек тұсына пышақ сұғылғанын көрдім” деген жауабы еш жерде жазылмаған” деп айтты.

    Сот барысында Эльмира Нұрбекованың тергеу барысында беттестіру кезінде берген видео-жауабы көрсетілді. Ол видеода Нұрбекованың қазақ және орыс тілінде аралас жауап беріп отырғанын көруге болады.

    Эльмира Нұрбекова өткен аптада да сот кезінде тергеуде берген жауабынан шатасқан еді.

  • Шерзат өлімі бойынша сот отырысы басталды

    Шерзат өлімі бойынша сот отырысы басталды

    Жетісу облысының қылмыстық істер жөніндегі мамандандырылған ауданаралық сотының ғимаратында Шерзат Полаттың өліміне байланысты кезекті сот отырысы өтіп жатыр. Іс бойынша 9 айыпталушы бар.

    Сот отырысын Жоғары соттың Youtube арнасынан тікелей эфирде көруге болады.

    Еске салайық, судья Ержан Жанұзақовтың бекітуімен келесі сот отырыстары 29 сәуір, 5-6 мамыр сағат 10:00-де өтеді.