Sona.kz

Метка: Талғардағы оқиға

  • ІІМ Хасан Қасымбековке қатысты пікір білдірді

    ІІМ Хасан Қасымбековке қатысты пікір білдірді

    Ішкі істер министрінің орынбасары Игорь Лепёха құқық қорғау органдарында ұйымдасқан қылмыстық топтардың тізімі бар екенін растап, Хасан Қасымбаевқа қатысты пікір білдірді.

    Еске сала кетейік, күні кеше Хасан Қасымбаевтың екі айға қамауға алынғаны белгілі болды. Осы орайда журналистер Игорь Лепёхадан қазақстандықтардың аузында жүрген «Хуторлықтар» тобы туралы сұрады. Бұған дейін ІІМ мұндай қылмыстық топтың бар екенін жоққа шығарған еді.

    «Бір қылмыстық топ жойылса, жаңалары пайда болады, біз оларды есепке аламыз. Бұл тұрақты жұмыс қой. Алайда, қазір 90-жылдардағыдай қылмыстың өршуі мен ұйымдасқан топтар бар деп айтуға болмайды», – деді Лепёха.

    Ол Хасан Қасымбаевқа қатысты істің егжей-тегжейіне әлі толық үңілмегенін, себебі бұл тергеу ұйымдасқан қылмысқа қарсы күрес басқармасының құзыретінде екенін айтты.

    «Барлық мәселелер қылмыстық іс аясында анықталады. Әзірге біздің қызметкерлердің қатысы бар деген күдік жоқ. Барлық әрекеттер прокуратураның бақылауында. Жаңадан ашылған мәліметтерге сәйкес ол жауапкершілікке тартылады», – деп қорытындылады Лепёха.
    Оның айтуынша, қызметкерлердің барлық іс жүргізу әрекеттері прокуратураның бақылауында және әр кезең қадағалауда.

  • Хасан Қасымбаев екі айға қамалды

    Хасан Қасымбаев екі айға қамалды

    Алматы облысының полиция департаментінің хабарлауынша, 4 қарашада Алматы облысы Қонаев қаласының мамандандырылған тергеу соты Хасан Қасымбаевқа қатысты бұлтартпау шарасын таңдау туралы арызды қарады.

    Сот қаулысы бойынша Хасан Қасымбаев екі айға қамауға алынды.

    2024 жылдың 2 қарашасында Хасан Қасымбаевтың уақытша ұстау изоляторына қамалғаны белгілі болған еді.

    Белгілі болғандай, ол Шерзат Болаттың өліміне қатысты ұсталмаған. 2021 жылы ережесіз жекпе-жектен жаттықтырушы Арман Әлімовтің денсаулығына қасақана ауыр зиян келтірді және ұрлады деген күдікке ілінген.

  • Полиция департаментіне барған Хасан Қасымбаевтың туыстары қандай жауап алды?

    Полиция департаментіне барған Хасан Қасымбаевтың туыстары қандай жауап алды?

    Алматы облысының полиция департаменті 2 қараша күні Хасан Қасымбаевтың уақытша ұстау изоляторына қамалғанын растады. Белгілі болғандай, 2021 жылы ережесіз жекпе-жектен жаттықтырушы Арман Әлімовтің денсаулығына қасақана ауыр зиян келтірді және ұрлады деген күдікке ілінген. Қылмыс 2021 жылдың 17 маусымында жасалған.

    Анасы мен әйелі әділетті шешім сұрап, президентке үндеу жолдады

    Бүгін Хасан Қасымбаевтың анасы Гүлнәр Нұракимова және жары Зүлфия Қасымбаева мен ауылдастары Алматы облысының полиция департаментіне келді. Анасы баласының қамауда жазықсыз отырғанын жеткізді.

     «Менің баламды екі күннен бері кінәсіз қамап отыр. Не үшін? Соның анық-қанығын білуге келдім. Айтсын соның бәрін. Екі айдан бері тергеді. Ешқандай кінә таппады. Шерзат Болаттың өліміне қатысы бар деп, неше мәрте сұрау алды. Енді, міне 2021 жылы болған оқиғаға баламды қатыстырып отыр. Оған дәлелі болса, дәлелдеп берсін. Заңсыз жазықсыз қамап қойды. Ол жеке кәсіппен айналысады. Үш баласы бар. Ана баласы үшін күйеді. Өз баламды білемін. Мен ондай бала тәрбиелеген жоқпын. Ол ауырып, ота жасауға дайындалып жүрген. Система алып жатқан жерінен шақырған соң кеткен еді. Бүгін баламды алмай бұл жерден кетпеймін», – деді анасы. Сондай-ақ, Хасан Қасымбаевтың анасы президент Қ.Тоқаевтың атына үндеу жолдап, баласының ісін әділетті шешуді сұрады.

    Ал Хасан Қасымбаевтың жары Зүлфия Қасымбаева: «Талғарда қайтыс болған жасөспірімнің ата-анасына көңіл айтамын. Бірақ оның әкесі неге бұл өлімге менің күйеуімнің қатысы бар деп мәлімдейді? Оған дәлелі бар ма?

    Сол бала қайтыс болғалы біздің отбасымызға тыныштық жоқ. Оны ұстаған жоқ. Өз аяғымен барды. Ол ешқайда қашқан жоқ. Қандай негізге сүйеніп қамауға алды? Оған қалай қара күйе жақты, солай ақтап берсін. 2021 жылғы іске қатысы болса, неге сол кезде ұстамады? Бұл іс бойынша адамдар сотталды ғой», – деді.

    Рысқұлов ауылының тұрғындары:  «Хасан жетім-жесірге көмектесетін»

    Рысқұлов ауылы тұрғындарының жігіттер төрағасы Қайрат Айтжанов Хасан Қасымбаевтың қандай жігіт екенін айта келе: «Біздің ауылды бәрі жамандап бітті. Рысқұлов ауылында 8 мыңдай халық тұрады. Тіпті, ауылдың кемпір-шалдары автобус жалдап келейін деген. Ауылдың атынан өзім келіп тұрмын.

    Хасан үш-төрт жігітпен бірігіп, цемент зауытын ашқан. Кішігірім мал шаруашалығы бар. Бәрі ұйымдасып мектепке керек-жарақты әперіп, жетім-жесірге көмектеседі. Енді «Түймедейді түйедей» етіп шығарды. Істің ақ-қарасын ашып, айтсын. «ОПГ-шник» керек болды ма? Бұлар бәрін кино жасап жіберді ғой. Хасан ешқайда қашып жүрген жоқ. Шақырған кезде барды. Кінәлі адам болса, солай ете ме? Үйінде отырып «Хасан бәрін ақшамен сатып алады» дейтіндер бар.

    Сатып алғыш болса, інісі істі болғанда неге шығарып алмады? Өз еңбегімен күн көріп жүрген таза жігіт. 4 жыл бұрынғы іс бойынша сот өтіп, төрт-бес адам сотталып кетті. Сол кезде сот не қараған?», – деді өз пікірінде.

    «Бір отбасына бағып отырған азаматты қалай қамап тастайды? Бала кезден білеміз. Осы күнге дейін біреуге көмектескеннен басқа бір жаман әрекетін көрген емеспіз.  Кінәлі болса, өз аяғымен келмейді ғой. Хасанды  танитындар жақсы біледі, ал танымайтындар аузына келгенді айта береді. Ауылдан 500 адам жиналып, «жолды жабамыз» деп еді, бәрін тоқтаттық. Керек емес дедік. Енді құқық қорғау өкілдері қамалған балаларға «Хасанға қарсы түсініктеме берсеңдер, жазаларыңды жеңілдетеміз деп айтып жатыр екен», – дейді Рысқұлов ауылынан келген тұрғындар.

    Қабдуалиевтің жауабында не айтылды? 

    Бұдан кейін ішке енген Хасан Қасымбаевтың туыстары мен ауылдастарына Алматы облысы Полиция департаментінің тергеу ісі бойынша орынбасары Мәлік Қабдуалиевтің қылмыстық іс бойынша түсініктеме беретіні айтылды. Алайда, туыстары «Осында келіп, бәрінің көзінше айтсын» деген талап қойған соң, Мәлік Қабдуалиевтің өзі шыққан. Бірақ жиналғандар оған сөз бермей, жан-жақтан пікір қысымына алды. Дегенмен, Қабдуалиевтің де жауабында нақтылық болмады.

    «Әзірге уақытша қамау изоляторында болады. Бүгін шығара алмаймыз.  Іс материалы Қонаев қаласындағы тергеу сотына жіберілді. Кінәсі бар ма, жоқ па, оны сот шешеді» деп қысқа қайырды Қабдуалиев. Оған журналистер «Егер Хасан Қасымбаев 2021 жылғы іс бойынша қамауға алынса, неге сол кезде қамалмады?» деген сауал қойғанда бұл туралы ақпаратты айта алмайтынын, себебі тергеу құпиясы сақталатынын жеткізді. 

    Айта кетейік, Алматы облысы полиция департаментінің таратуынша, 2021 жылғы маусымда А. есімді азаматтың денсаулығына қасақана ауыр зиян келтіріп, сол кісіні ұрлады деген күдікпен бес азамат ұсталған. Олар Алматы облысының қылмыстық істер жөніндегі мамандандырылған ауданаралық сотымен сотталып, қазіргі уақытта жазасын бас бостандығынан айыру орындарында өтеуде. «Жедел-тергеу іс-шараларының нәтижесінде, жоғарыда аталған қылмыстық әрекеттерге қатысы бар деген күдікпен 2024 жылдың 2 қарашасында Қ. есімді азамат ұсталып, уақытша ұстау изоляторына қамалды. Қылмыстардың барлық мән-жайларын жан-жақты, толық және объективті тергеуді қамтамасыз ету үшін тергеу әрекеттерінің кешені жалғасуда. Іс материалдары бұлтартпау шарасын санкциялау үшін сотқа жіберілді. Тергеу барысы облыстық полиция департаменті басшылығының бақылауында. Өзге ақпарат тергеу мүддесіне орай жария етілмейді», – деді полиция департаментінен.

     

     

  • Полиция Хасан Қасымбаевты қамауға алды

    Полиция Хасан Қасымбаевты қамауға алды

    Алматы облысының құқық қорғау органдары күтпеген операция жүргізіп, Талғардағы атышулы Хасанды он жыл бұрын жасалған қылмыс үшін қамауға алды.

    Ол марқұм Шерзаттың өлімінен кейін «Хуторлықтар» деп аталатын қылмыстық топтың серкелерінің бірі деп аталып келді. Алайда оны полиция 2021 жылы біреудің денсаулығына ауыр зақым келтіргені үшін ұстады.

    Қасымбаевты кейбір дереккөздер «Хуторские» қылмыстық тобының жетекшісі ретінде атаса, өзі бұл айыптарды жоққа шығаруда. Ішкі істер министрлігі де мұндай қылмыстық топтың бар екендігін растаған жоқ.

    «Бас прокуратураның мәліметінше, Қасымбаевтың 2021 жылы болған қылмысқа қатысы бар болуы мүмкін. Сол жылы Алматы облысындағы бір ауылда 1984 жылы туған тұрғынды ұрып-соққан соң, оны әлдекімдер тонап кеткен. Аталған қылмысқа байланысты үш ер адам қылмыстық жауапкершілікке тартылып, кейін шартты түрде жаза алған еді», – делінген жазбада.

    Қадағалау органы осы істің барлық мән-жайын қайта қарастырып, Қасымбаевтың аталған қылмысты тапсырыс беруі мүмкін деген қорытындыға келді. Қазіргі уақытта оған қатысты жаңа іс қозғалды. Ол ҚР Қылмыстық кодексінің 106-бабының 1-бөлігі (Денсаулыққа қасақана ауыр зиян келтіру) және 125-бабының 2-бөлігі (Адамды алдын ала сөз байласу арқылы топпен ұрлау) бойынша тергелуде.

  • Алматы облысы идеология жұмысына қаншалықты көңіл бөледі?

    Алматы облысы идеология жұмысына қаншалықты көңіл бөледі?

    Талғардағы оқиға бітеу жараның бетін ашқандай. Бұл жағдай тәрбиелік және идеологиялық жұмыстың ақсап, өз деңгейінде атқарылмай отырғанын айқын көрсетті. Әр өңірде жергілікті мәселелермен айналысуы тиіс мекемелер бар.

    Бірақ олар аудан-ауданды, ауыл-ауылды аралап, тұрғындар мен жастардың басын жиі қосып тұра ма? Әлде, есеп үшін жылына бір-екі жиын өткізіп, «бәрі керемет» деп мәлімдей ме? Шын мәнінде, тұрақты түрде кездесулер ұйымдастырылып, пікір алмасу арқылы жұртты мазалаған түйткілдер айқындалмай ма? Дегенмен, кейбір жауаптылардың тек шулы оқиға болғанда ғана қимылдайтыны әдетке айналған.

    Талғар оқиғасының мән-жайы

    Талғардағы жасөспірімнің өліміне қатысты түрлі ақпараттар тарап, арнайы қылмыстық топтардың бар екендігі де айтылды. Бұл туралы еңбектеген баладан еңкейген қарияға дейін білетіні сөз болды. Осыған байланысты Алматы облысы әкімдігі хабардар ма? Мұздай қаруланып жүрген жастардың әрекеті нені білдіреді? Иә, оқиға болғаннан кейін министр де, әкім де барды. Бірақ тікелей осы іске жауапты тиісті мекемелер соңғы рет қашан төбе көрсетті?

    Sona.kz тілшісі осы сұрақ бойынша Алматы облысы Ішкі саясат басқармасының басшысы Ерік Абитов мырзаға хабарласқанымен, ол: «Қазір қолым тимейді. Бұл мәселе бойынша бөлім басшысы хабарласады» деп қысқа қайырды. Ішкі саясат бөлімінің басшысы Сағынай Мұсағитов болса, тек атқарған жұмыстарды баяндап берді.

    Ішкі саясат басқармасының мәлімдемесі

    «Оқиға болғаннан кейін демалыс күндері сол жерде болдық. Жыл соңына дейін Талғар ауданында түсіндіру жұмыстары бойынша төрт шара өткіземіз. Жыл сайын Ішкі саясат тарапынан жоспар бекітіледі. Онда бұқаралық ақпарат құралдармен жұмыс, этносаралық келісім, саяси тұрақтылық, мемлекеттік рәміздерді дәріптеу сияқты мәселелер қамтылады. Биылдан бастап Жастар басқармасы бөлек мекеме ретінде жұмыс істейді. Әр ауданның өз ерекшелігі бар. Талғар ауданында жастармен жұмыс істеуге ерекше көңіл бөлінеді. Себебі бұл аудан Алматыға жақын орналасқан, жастар көп. Биылдыққа осындай қайғылы оқиға алғаш тіркелді, осыған байланысты біраз шенеунік қызметінен босатылды», – деді ол.

    Ардагерлер кеңесінің әрекеті 

    Алматы облыстық ардагерлер кеңесінің төрағасы Ерболат Сапарұлының айтуынша, оқиғадан кейін бірден жергілікті ардагерлерді жинап, кездесу ұйымдастырылды. «Ардагерлер төрағалары халыққа түсінік жұмысын жүргізе бастады. Талғардан бастап, Қарасай, Іле, тағы басқа аудандарды аралап, «Алатау жастары» бірлестігінің көшбасшыларымен кездесу өткізіп, заңға сүйеніп, құқық қорғау органдарының ресми ақпаратына жүгіну қажеттігін айттық», – деді ол.

    Кездесулердің жалғасы

    «Кездесулер тек қайғылы оқиға болғаннан кейін ғана өткізілді ме?» деген сұраққа Ерболат Сапарұлы: «Біз оқиғаның ертесі-ақ ауданға бардық. Былтыр Қарасай ауданында ардагерлер мен жастардың кездесуі болды. Сол жиында жастардың ұсынысымен «Алатау жастары» бірлестігі құрылды. Әр ауданнан 8 адам тәлімгер ретінде бекітілді. «Алатау ардагері» газетінде жастардың тәрбиесіне қатысты ақпараттар жарияланады», – деп жауап берді.

    Қаржыландыру мәселесі

    Ардагерлер кеңесіне мұндай шараларды өткізуге бюджеттен қаражат бөлінбей ме деген сұраққа Ерболат Сапарұлы: «Бізге бюджет тарапынан ақша бөлінбейді. Әртүрлі байқауға қатысып, гранттар ұтып аламыз. Кейбір азаматтар қайырымдылық көмек көрсетеді», – деп мәлімдеді.

    Қорытынды

    Алматы облысының Ішкі саясат басқармасы мен Ардагерлер кеңесі «Оқиға орнына бардық» дегенді бірнеше рет тілге тиек еткенмен, бұл іс-шараларды нақты дәлелдейтін мәлімет жетіспейді. Бұл – бір. Екіншіден, шын мәнінде Ардагерлер кеңесіне қаржы бөлінбей ме? Мемлекетті сатып алу порталында Ардагерлер кеңесі 2024 жыл бойы өткізетін шараларына, яғни «Іс-шараларға қатысуды қамтамасыз ету үшін қызметтері» лоты бойынша Ішкі саясат басқармасы арқылы 13 млн 500 мың теңге ұтып алған. Ал бізге «бюджеттен ақша бөлінбейді» деген ақсақал Ерболат Тұрымбетов неге өтірік айтты? Ол ол ма, Ішкі саясат басқармасының басшысы Ерік Абитов мырзаның «уақытым жоқ» деп жауапкершілікті бөлім басшысына сілтеуі бүкіл ел ішінде дүрбелең туғызған мәселеге бейжай қарағанын көрсетпей ме? Осының өзі Алматы облысында идеологиялық жұмыстың әу бастан дұрыс жүргізілмегенін айқындап тұрған жоқ па?

  • Шерзат Болаттың өлімі: Тағы бір күдікті ұсталды

    Шерзат Болаттың өлімі: Тағы бір күдікті ұсталды

    Алматы облысы ПД мәліметінше, 17 қазанда Шерзатты өлтіру дерегі бойынша қылмыстық істі тергеу аясында тағы бір күдікті К. ұсталды.

    «Қазіргі уақытта оқиғаның барлық мән-жайын анықтауға бағытталған жедел-тергеу іс-шараларының кешенін жүргізу жалғасып жатыр», – делінген хабарламада.

    Осылайша, Талғарда Шерзат Болатты өлтіру ісі бойынша 11 адам ұсталды. Бұған дейін 10 күдікті туралы хабарланған болатын.

  • Жанар Айжанова «Немерең бандиттің қолынан өлсін» деген оқырманын сотқа бермек

    Жанар Айжанова «Немерең бандиттің қолынан өлсін» деген оқырманын сотқа бермек

    Бұған дейін блогер Жан Ахмадиев өнер иелерінің аузына микрофон тосып, Талғардағы оқиғаға қатысты көзқарасын сұраған. Сол кезде танымал әнші Жанар Айжанова Шерзат Болаттың өліміне қатысты пікір білдіруден бас тартқан еді.

    «Мен ондайды айтпаймын. Саясатта шаруам жоқ, аулақ жүріңдерші», – деп ашуланып жауап берген әнші. Ал блогер өз сөзінде: «Әнші болсын, блогер болсын халықтың арқасында күн көріп отырғаннан кейін есеп беруі керек деп ойлаймын. Әншілердің бірказы бас тартып, бұл тақырыпты қозғағысы келмейтіндерін айтты», – деген.

    Ал әнші Жанар Айжанованың осы пікірінен кейін әлеуметтік желіде қаншама адам ауыр сөздерді қарша боратыпты. Бұл туралы ол өзінің Инстаграмдағы парақшасында: «Ауыз менікі деп оттай бермеңіздер! Маған бір әйел үйіңде өсіріп отырған немереңді өскен кезде бандиттер келіп, бауыздап өлтірсін. Мен соны тілеймін» депті.

    Сендер қандай анасыңдар?! Қызымды жерден алып, жерге салып жатырсыңдар. Мен ешкімге ештеңе деген жоқпын ғой. Мұндай мәселені жақсы түсінемін. Менің де інімді 12 жыл бұрын өлтіріп кеткен.  Атақты адамдар екен. Істемегені жоқ. Ешкімді шулатпай, өзім шештім. Мені де «тұқымыңмен құртамын» деп қорқытқан сол кезде. Біреудің баласына өлім тілеп отырған қандай анасыңдар?! Он екіде бір гүлі ашылмаған 17-18 жастағы қыздар жазып жатыр. Сендерге не жоқ?! Ешкімнің отбасына араласпаймын. Не істейсіңдер маған?

    Ертең сол әйелдің үстінен арыз жазып,  тауып алып, бетіне тура қарап, қандай адам екенін елге көрсеткім келіп отыр. Жан Ахмадиев әркімді тіміскілеп, өзіне пиар жасап жүрген адам. Оны өзіне де айттым, «маған жолама» деп. Талғардағы мәселеге қатысты ІІМ айналысып жатыр. Мен айтқанда не өзгереді? Өліп жатқан балаға тыныштық берсеңіздерші. Атын жамылып, оқырман жинау үшін өліп жатырсыңдар. Жан Ахмадиевтің өзі не істепті? Басын сүйеп пе, үй салып беріп пе?», – деді ашуға булығып.

     

     

    Посмотреть эту публикацию в Instagram

     

    Публикация от SONA.KZ — НОВОСТИ КАЗАХСТАНА (@sonanews.kz)

  • Шерзат қаза тапқан жерден үш пышақ пен мылтық тәркіленді

    Шерзат қаза тапқан жерден үш пышақ пен мылтық тәркіленді

    Талғардағы қайғылы жағдай болған жерден үш пышақ пен мылтық тәркіленді.

    Бұл туралы Алматы облыстық полиция департаменті бастығының міндетін атқарушы Серік Шалқаров айтты.

    «Қазіргі таңда үш пышақ тәркіленді. Сондай-ақ, бір мылтық бар. Департамент оны сараптамадан өткізіп жатыр. Оның кімге тиесілі екенін әзірге айта алмаймын», — дейді Серік Шалқаров.

  • Шерзат Болаттың өртенген үйі: 600-ден аса адамнан жауап алынды

    Шерзат Болаттың өртенген үйі: 600-ден аса адамнан жауап алынды

    Талғардағы жасөспірім Шерзат Болаттың қазасына байланысты тергеу қарқынды жүріп жатыр. Бұл туралы Алматы облысының прокуроры Берік Адамов айтты.

    Тергеу барысында ешқандай заң бұзушылық анықталған жоқ. Сот процесінің ашықтығы жөніндегі мәселе бойынша прокуратураның сотқа өтініш енгізуі қарастырылады. Сондай-ақ марқұмның отбасы тұрған үйдегі өртті зерттеп жатырмыз. Өрт болған жерден маңызды дәлелдер жиналып, 600-ден астам адамнан жауап алынды. Оқиғаның қалай болғанын анықтау үшін бірнеше сараптама тағайындалды», — деді Берік Адамов.

    Оның сөзінше, мамандар өртті үйдің сыртында басталғанын, оқыс жағдай болмағанын және от қолданылғанын мәлімдеген.

    Оқиға орнынан табылған канистер мен резіңке қолғаптарға зерттеу жүргізіліп жатыр, — деді прокурор.

  • Талғардағы жасөспірім қазасы: ІІМ оқиғаның толық видеосын жариялады

    Талғардағы жасөспірім қазасы: ІІМ оқиғаның толық видеосын жариялады

    Ішкі істер министрінің бірінші орынбасары Бауыржан Аленов Талғар ауданындағы жағдайға байланысты әлеуметтік желіде түрлі ақпарат тарап жатқанын айтып, 4 қазанға қараған түні болған оқиғаның толық видеосын жариялау туралы шешім қабылданғанын жеткізді.

    Тергеу заңға сәйкес жүргізіледі. Оқиға орнында түсірілген видеоны жариялаймыз, — деді Аленов.

    «Қамажай» дүкені ішінде екі камера, сыртында бір камера қойылған.

    Дүкенде болған қыздар туралы әңгіме болып жатыр. Олар бір жігітті төбелеске жібермей ұстап отыр. Қыздар ажыратуға тырысқан, — дейді мамандар.

    Осылайша полиция дүкенде түсірілген толық видео қылмыстық іс материалдарына қосылғанын, ешқандай монтаж жасалмағанын айтты. Сондай-ақ видеода сыра мен темекі сатып алынған сәт, оның ақысын төлегені де көрсетілген. Полиция жанжал сыраның ақысын төлемегеннен туындаған деген болжамды жоққа шығарды.