Sona.kz

Метка: Ұлттық банк

  • Ұлттық банк қолма-қол ақша алуға бақылау жүргізіледі деген қауесетті жоққа шығарды

    Ұлттық банк қолма-қол ақша алуға бақылау жүргізіледі деген қауесетті жоққа шығарды

    Қазақстанда әлеуметтік желілер мен мессенджерлерде банкоматтан қолма-қол ақша алған азаматтар бойынша арнайы есеп жүргізіледі деген ақпарат тарады. Ұлттық банк бұл мәліметтердің шындыққа жанаспайтынын ресми түрде мәлімдеді.

    Ұлттық банк жанындағы Дезинформациямен күрес орталығының хабарлауынша, қолма-қол ақша алу операцияларына қатысты ешқандай деректер базасы қалыптастырылмайды. Банкоматтарда орнатылған бейнекамералар тек клиенттердің қауіпсіздігін қамтамасыз ету және алаяқтықтың алдын алу мақсатында қолданылады.

    Ведомствоның атап өтуінше, мұндай камералар көп жылдан бері жұмыс істеп келеді және бұл – жаңа талап емес. 2026 жылдан бастап енгізілетін өзгеріс тек бейнежазбаларды сақтау мерзіміне қатысты: олар 180 күнге дейін сақталатын болады.

    Ұлттық банк азаматтарды сабыр сақтауға және тек ресми ақпарат көздеріне сенуге шақырды.

  • Ұлттық банк: Балаларға төлем тоқтатылмайды

    Ұлттық банк: Балаларға төлем тоқтатылмайды

    2026 жылы қазақстандық балалар Ұлттық қордан төлем алуды жалғастырады. Бұл туралы Астанада өткен брифингте Ұлттық банк төрағасы Тимур Сүлейменов мәлімдеді, деп хабарлайды Sona.kz Kazinform агенттігіне сілтеме жасап.

    «Қай сарапшылар мұны жоққа шығарып отырғанын білмеймін. Жоқ, жеті айдың қорытындысы бойынша Ұлттық банк Ұлттық қорды басқара отырып, 4,6 млрд доллар пайда тапты. Доходтылық доллармен 8 пайызды құрады. Инвестициялық табыстан шығын жоқ», — деді ол.

    Сүлейменовтің айтуынша, соңғы үш жыл қатарынан қор активтерін арттыруға мүмкіндік беретін тұрақты инвестициялық табыс тіркеліп отыр.

    Алайда төраға 2026 жылғы нақты төлем мөлшері әзірге белгісіз екенін айтты. Бұл көрсеткіш туу деңгейіне, 18 жасқа толатын балалар санына және өзге де факторларға байланысты болады. Дәл жауап 2026 жылдың қаңтарында белгілі болмақ.

    Айта кетейік, бүгін ҚР Ұлттық банкі базалық мөлшерлемені 16,5% деңгейінде сақтап қалды.

  • Ұлттық банк алаяқтар жалған несиелік шоттарды рәсімдейтінін ескертеді

    Ұлттық банк алаяқтар жалған несиелік шоттарды рәсімдейтінін ескертеді

    Қазақстан Ұлттық банкі алаяқтардың ҚҰБ-тың ресми бланкісін қолданып, жалған құжат ұсынған жағдайлар жиілеп кеткенін ескертеді.

    Алаяқтар жалған несиелік шоттарды пайдаланып схемалар жасаған. Алаяқтар ҚҰБ-тың ресми бланкісін қолданып, азаматтарға «несиелік шоты бар» немесе «қарызын өтеу керек» деп хабарлап, жалған құжаттар жіберуде.

    Олар сенімге кіру үшін бұл құжаттарға Ұлттық Банктің уәкілетті тұлғасының қолын, аты-жөнін және мөрін қойып көрсетеді. Бұл әрекеттер арқылы алаяқтар адамдарды ақша аударуға мәжбүрлеп, қаражатын ұрлауға тырысады.

    Сондай-ақ, алаяқтар жасанды интеллект технологияларын пайдаланып, Ұлттық Банк қызметкерінің бейнесін қолдана отырып жалған бейнероликтер жасайды және әлеуметтік желілерде жалған инвестициялық компаниялар туралы жарнамалар орналастырады. Олар тіпті ұрланған ақшаны қайтару үшін «тегін заңгерлік көмек» ұсынатындарын жариялайды.

    Ұлттық Банк азаматтарды қырағылық танытуға, күмәнді шоттарға ақша жібермеуге және тексерілмеген құжаттарға сенбеуге шақырады. Банк жеке шоттарға қызмет көрсетпейтінін, кредит берумен айналыспайтынын және халықпен ақшалай есеп айырыспайтынын еске салады. Сондай-ақ, белгісіз адамдардан телефон қоңырауы түссе, әңгімені тоқтатып, мемлекеттік органның ресми нөміріне хабарласуға кеңес береді.

    Егер алаяқтық әрекетке тап болсаңыз, Қазақстан Республикасының құқық қорғау органдарына хабарласыңыз. Қосымша кеңес алу үшін Ұлттық Банктің Байланыс орталығына 1477 нөміріне қоңырау шалуға болады

  • Ұлттық банк базалық мөлшерлемені өзгеріссіз қалдырды

    Ұлттық банк базалық мөлшерлемені өзгеріссіз қалдырды

    Бұл шешімге инфляция қарқыны, сыртқы жағдайлардағы тұрақсыздық және экономикалық белгісіздік себеп болған. Келесі жоспарлы шешім 5 маусымда жарияланады.

    Базалық мөлшерлеме – банк секторы мен несие нарығына бағыт беретін негізгі құрал. Ол экономиканың ақшалай айналымына, инфляция деңгейіне тікелей әсер етеді.

  • Ерұлан Жамаубаев Ұлттық банк төрағасының бірінші орынбасары болып тағайындалды

    Ерұлан Жамаубаев Ұлттық банк төрағасының бірінші орынбасары болып тағайындалды

    Ерұлан Жамаубаев Ұлттық банк төрағасының бірінші орынбасары қызметіне тағайындалды, – деп хабарлады Ақорданың баспасөз қызметі. 

    – Мемлекет басшысының өкімімен Ерұлан Кенжебекұлы Жамаубаев Қазақстан Республикасының Ұлттық банкі төрағасының бірінші орынбасары болып тағайындалды. Ол бұрынғы атқарған лауазымынан босатылды, – делінген ресми ақпаратта.

    Ерұлан Кенжебекұлы Жамаубаев 1974 жылғы 25 наурызда Алматы облысында дүниеге келген.

    1995 жылы Қазақ мемлекеттік басқару академиясын «Қаржы және кредит» мамандығы бойынша , 2009 жылы Қазақ экономикалық университетін «Іскерлік әкімшілендіру магистрі» мамандығы бойынша тәмамдаған.

    1996-1998 жылдары – Қазақ мемлекеттік басқару академиясының оқытушысы.

    1998-2006 жылдары – Қазақстан Республикасы Ұлттық банкі Зерттеулер және статистика департаменті жетекші сарапшысы, бас сарапшысы, бас маман-сарапшысы, басқарма бастығы, директор орынбасары.

    2006-2014 жылдары – Қазақстан Республикасы Ұлттық банкінің Үйлестіру департаментінің директоры.

    2014-2015 жылдары – «Қазақстанның тұрғын үй құрылыс банкі» АҚ-ның басқарушы директоры.

    2015 жылғы шілде мен қараша аралығында – Қазақстан Республикасының Президенті Әкімшілігінің Әлеуметтік-экономикалық мониторинг бөлімі меңгерушісінің орынбасары.

    2015 жылғы қараша мен 2018 жылғы қараша аралығында — Қазақстан Республикасының Президенті Әкімшілігінің Әлеуметтік-экономикалық мониторинг бөлімінің меңгерушісі.

    2018 жылғы қараша мен 2019 жылғы наурыз аралығында Қазақстан Республикасы Президентінің Көмекшісі.

    2019 жылдың 22 наурызында Қазақстан Республикасы Қаржы министрлігінің Жауапты хатшысы болып тағайындалған.

    2020 жылдың 18 мамырында Қазақстан Республикасының Қаржы министрі болып тағайындалды.

    2024 жылғы 6 ақпанда бұл лауазымынан босатылды.

    2024 жылы 20 мамырдан бастап қазіргі дейін Президент кеңесшісі қызметін атқарып келді.

  • «Ұлттық қор – балаларға»: Ертең әр балаға 129 доллар аударылады

    «Ұлттық қор – балаларға»: Ертең әр балаға 129 доллар аударылады

    Бірыңғай жинақтаушы зейнетақы қоры «Ұлттық қор – балаларға» жобасы аясында биыл әр балаға неше теңге аударылатынын есептеп болды. Бұл туралы Ұлттық банк төрағасы Тимур Сүлейменов мәлім етті.

    «Былтыр 6 млн 918 мың бала «Ұлттық қор – балаларға» жобасының қатысушысы болды. Оның әрқайсысына 100 доллардан сәл асатын ақша аударылды. Биылғы инвестициялық табыс жаман емес. Орташа (кейінгі 18 жылдың орташа табыстылығы – ред.) инвестициялық табыстың тең жартысы балалардың шотына аударылады. Бұл жаңалықты қуана отырып бөлісемін. Өйткені, менің де бағдарламаға қатысатын балаларым бар. Биыл 6 млн 921 мың 35 бала қатысады. БЖЗҚ енді ғана есептеп болды. Әр балаға 129 доллар 32 центтен аударылады, – деді Тимур Сүлейменов.

    Ұлттық банк мәліметі бойынша балаларға тиесілі ақша ертең аударыла бастайды.

  • Елімізде бір шоттан екінші шотқа ақша аудару қымбаттауы мүмкін

    Елімізде бір шоттан екінші шотқа ақша аудару қымбаттауы мүмкін

    Қазақстанда бір шоттан екінші шотқа ақша аудару қызметі шамамен 12%-ға қымбаттауы мүмкін. Бұл туралы Мәжіліс депутаты Асхат Аймағамбетов айтты. Оның айтуынша, бүгінде картадан басқа картаға ақша аудару қызметі 150 теңге тұрады.

    Алайда жаңа Салық кодексі жобасында ұсынылған норма қабылданса, мұндай аударымдар шамамен 12%-ға қымбаттауы мүмкін.  Бұл – Экономика министрлігінің төлем операциясын ҚҚС-қа (НДС) салуға қатысты жоспары. Пластикалық карталарды пайдалану, картадан картаға аударымдар, шоттан шотқа аударымдар, төлемдер мен банк қызметтері айтарлықтай қымбаттауы ықтимал, – деп жазды Асхат Аймағамбетов Telegram-дағы арнасында.

    Ол Экономика министрлігі бұл шығындарды банктер өздері жабады деп мәлімдегенін жеткізді.

    Бірақ ашығын айтсақ, бұл шындыққа жанаспайды. Банктер ешқашан шығындарды өз есебінен жауып қалмайды. Олар міндетті түрде бұл шығындарды клиенттердің мойнына артады. Өйткені банктер – қайырымдылық ұйымдары емес, — деді депутат.

    Бұл нормаға Ұлттық банк, Қаржыгерлер қауымдастығы, «Атамекен» ҰҚК мен сарапшылар қарсы шыққан. Осыған қарамастан министрлік бұл норманы жаңа Салық кодексі жобасына енгізген.

  • Ұлттық банк: Биыл тоғыз айда жалпы ішкі өнім 4 пайызға артты

    Ұлттық банк: Биыл тоғыз айда жалпы ішкі өнім 4 пайызға артты

    Инфляция біртіндеп төмендеп келеді, ал елімізге келсек, қазір экономикалық жағдай – тұрақты, динамика – оң. Бұл туралы Ұлттық банктің төрағасы Тимур Сүлейменов мәлім етті.

    «Биыл жаһандық экономиканың дамуына геосаяси тұрақсыздық ықпал етіп жатыр. Бұл бірқатар әскери қақтығыстарға, әлемдегі сауда-саттық пен инвестициялардың төмендеуіне байланысты. Халықаралық валюта қорының жаңартылған болжамы бойынша, әлемдік экономиканың өсуі 2024 және 2025 жылдары 3,2% болады. Орталық банктер өзінің қатаң монетарлық саясатын сақтағандықтан, жаһандық инфляциялық процестер баяу қалыптасып отыр. Дегенмен, қазір дамыған елдерде инфляция орталық банктердің нысаналы көрсеткішіне жақын. Бұл жетекші елдердегі орталық банктердің ақша-кредит саясатын біртіндеп жеңілдетуге жағдай жасайды», — деді Тимур Сүлейменов Мәжілістің жалпы отырысында.

    Ұлттық банк төрағасының айтуынша, инфляция біртіндеп төмендеп келеді.

    «Қазақстанды алсақ, қазіргі экономикалық жағдай – тұрақты, динамика – оң. Биыл қаңтар-қыркүйек айларында жалпы ішкі өнім 4,0%-ке артты. Экономиканың барлық секторында өнім шығаруда өсім бар. Ең жоғары өсім ауыл шаруашылығында, құрылыс пен көлік саласында байқалып отыр. Инфляция біртіндеп төмендеп келеді. Қыркүйектің қорытындысы бойынша инфляция деңгейі 8,3% болды. Бұл 2023 жылғы ең жоғары көрсеткішпен салыстырғанда 2,5 есе төмен. Алайда, бұл көрсеткіш Ұлттық Банктің 5%-тік таргетінен әлі де алыс», — дейді ол.

  • JOSHY ULYSY. 800 JYL: коллекциялық монеталар шығарылады

    JOSHY ULYSY. 800 JYL: коллекциялық монеталар шығарылады

    Ұлттық банк JOSHY ULYSY. 800 JYL коллекциялық монеталарын айналымға шығарады

    Монеталардың дизайнында Жошы хан ескерткішінің бейнесі пайдаланылған. Оның авторы –Қазақстанның белгілі мүсіншісі, монументалист-суретші Ғазиз Ешкенов. Сырт жағында Алтын Орда дәуіріндегі монеталардан коллаж орналасқан.

    Монеталардың қай күні сатуға шығарылатыны туралы ақпарат ҚҰБ-тың ресми сайтында қосымша жарияланады.