«Ұлттық қор – балаларға» бағдарламасы іске қосылған 2024 жылдың 1 ақпанынан бері 18 жасқа толған жастардың шотына 8 миллионнан аса доллар аударылған, деп хабарлайды БЖЗҚ баспасөз қызметі.
Жалпы, Қазақстан бойынша ұлттық қордан түскен қаражатын алу үшін 75 329 адамнан өтініш түскен екен.
«Оның ішінде тұрғын үй жағдайларын жақсарту мақсатында 43 781 адамның шотына 4,65 млн доллар, білім алу ақысын төлеу үшін 31 548 балаға 3,35 млн доллар аударылды», – деп хабарлайды БЖЗҚ.
Бірыңғай жинақтаушы зейнетақы қоры «Ұлттық қор – балаларға» жобасы аясында биыл әр балаға неше теңге аударылатынын есептеп болды. Бұл туралы Ұлттық банк төрағасы Тимур Сүлейменов мәлім етті.
«Былтыр 6 млн 918 мың бала «Ұлттық қор – балаларға» жобасының қатысушысы болды. Оның әрқайсысына 100 доллардан сәл асатын ақша аударылды. Биылғы инвестициялық табыс жаман емес. Орташа (кейінгі 18 жылдың орташа табыстылығы – ред.) инвестициялық табыстың тең жартысы балалардың шотына аударылады. Бұл жаңалықты қуана отырып бөлісемін. Өйткені, менің де бағдарламаға қатысатын балаларым бар. Биыл 6 млн 921 мың 35 бала қатысады. БЖЗҚ енді ғана есептеп болды. Әр балаға 129 доллар 32 центтен аударылады, – деді Тимур Сүлейменов.
Ұлттық банк мәліметі бойынша балаларға тиесілі ақша ертең аударыла бастайды.