Sona.kz

Метка: Жолдау

  • Т. Дүйсенова: Қазақстанда шетелдік жоғары оқу орындарына талап қойылады

    Т. Дүйсенова: Қазақстанда шетелдік жоғары оқу орындарына талап қойылады

    Қазақстанда шетелдік жоғары оқу орындарының жұмысына қойылатын бірыңғай талаптар жыл соңына дейін қабылданады. Бұл жөнінде  Үкімет отырысында Премьер-Министрдің орынбасары Тамара Дүйсенова мәлім еттті.

    Вице-премьердің ақпараты бойынша, шетелдік жоғары оқу орындарымен жұмыс инженерлік-техникалық кадрларды даярлауға бағытталатын болады. Ол үшін жыл соңына дейін Ғылым және жоғары білім министрлігі білім беру бағдарламаларын, оқыту технологияларын трансферттеу және оларда оқитын студенттердің білім деңгейін, құзыреттері мен дағдыларын бағалау бөлігінде олардың жұмысына Бірыңғай талаптар қабылдауға ниетті.

    Сондай-ақ отандық жоғары оқу орындарының жұмысын қайта қарау жоспарлануда. Олардың бәсекеге қабілеттілігін арттыру үшін 2025 жылғы 1 сәуірге дейін білім беру сапасын тәуелсіз бағалау ұйымдастырылады. Негізгі критерийлер ретінде ЭЫДҰ елдерінің көрсеткіштері қолданылатын болады. Талдау қорытындысы бойынша ЖОО-лар жоғары, орта және мақсатты лигаларға бөлінеді.

    Айта кетейік, Премьер-Министр Олжас Бектеновтің төрағалығымен өткен Қазақстан Республикасы Үкіметінің отырысында Мемлекет басшысының «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауын іске асыру жөніндегі шаралар қаралды. Атап айтқанда, ел экономикасын білікті мамандармен қамтамасыз ету мәселесі зерделенді. Премьер-Министрдің орынбасары Тамара Дүйсенова баяндама жасады.

     

     

  • Субсидиядан арзан несиеге көшу 2028 жылдың соңына дейін жүргізіледі

    Субсидиядан арзан несиеге көшу 2028 жылдың соңына дейін жүргізіледі

    Мемлекет басшысы өз Жолдауында атап өткендей, агроөнеркәсіп кешенін тікелей субсидиялау тәсілінен арзан несие беру тәсіліне біртіндеп көшу – аса маңызды міндет. Ол үшін нақты іс-шаралар мен мерзімдері бар Жол картасы бекітілді.

    «Жалпы алғанда, тауарлық-спецификалық субсидиялардан (ет, сүт, жабық топырақтағы көкөністерге арналған субсидиялар) жеңілдікті несие беруге толық көшу “Экономиканы ырықтандыру туралы» Жарлықта қарастырылған және 2028 жылдың соңына дейін қамтамасыз етілетін болады», — деді Премьер-Министрдің орынбасары Серік Жұманғарин Үкімет отырысында.
  • Президент салықтықта есеп-шотты бұғаттамауға шақырды

    Президент салықтықта есеп-шотты бұғаттамауға шақырды

    Президент Қасым-Жомарт Тоқаев салық саласында оңды-солды жазалаудан бас тартуға шақырды.

    «Салықтық әкімшілендіру ісінде жазалау тәсілінен де бас тартқан абзал. Мәжбүрлеу шараларын қолданбай-ақ, хабарлама жіберу арқылы өндірілетін салық берешегінің жоғарғы шегін көтеруге болады деп ойлаймын. Ал салық берешегі осы шектен асып кетсе, қарыз сомасы аясында ғана шектеу қойылуға тиіс. Яғни, борышкердің банктегі есеп-шоты толық бұғатталмайды. Берешек сомасы тым көп болған жағдайда, кепілге мүлік қоюды талап етпей, қарызды бөліп төлеуге мүмкіндік берген жөн. Жоспарға сай тексеру тәсілінен біржола бас тартуға тырысу керек. Ол үшін қатерлердің алдын алу жүйесін жетілдіру қажет», -деді Қасым-Жомарт Тоқаев.

    Президент салық жеңілдіктерінің тиімділігін арттыру өзекті мәселе екенін жеткіізді.

    «Кәсіпкерлер өздері пайдаланатын салық жеңілдіктері бойынша есеп беруге тиіс. Бизнесті дамытуға нақты септігі тиетін жеңілдіктерді ғана қалдырған абзал. Мысалы, өндірісті өркендетеміз деген инвесторларға артықшылық беруге болады. Яғни, құрылыс салуға, активтерді сатып алуға, жаңғыртуға және қайта құруға бір реттік салық жеңілдігін берген жөн. Терең өңделген өнімді экспортқа шығаратын кәсіпкерлерге жеңілдіктер беру маңызды. Олар өзге бизнеске қарағанда көбірек қолдауға ие болуы керек»,- деп толықтырды Президент халыққа жолдауында.

    Осы тұрғыда Мемлекет басшысы Үкімет пен Парламентке жаңа Салық кодексінің жобасына қатысты жан-жақты талқылау жүргізуді тапсырды.

    «Қиын болса да, дұрыс шешім қабылдау қажет. Бұл жерде асығыстыққа жол беруге болмайды. Жаңа Салық кодексін сапалы әзірлеу үшін оны қабылдау мерзімін келесі жылға ауыстыруға болады деп санаймын.Көлеңкелі экономика үлесінің жоғары деңгейде қалуы қаржы саласындағы ахуалды ушықтырып тұр. Оны айтарлықтай төмендету үшін мұқият ойластырылған жан-жақты шаралар қабылдаған жөн. Атап айтқанда, шекарадағы кеден бекеттеріне қатысты барлық жұмысты тез арада аяқтау қажет. Сондай-ақ сыртқы сауда операцияларынан түсетін кірістің басқа елдерге заңсыз өтіп кетуіне жол бермеу керек», — деді Мемлекет басшысы.

  • Жайлы мектеп: 2025 жылы 217 мектеп пайдалануға беріледі

    Жайлы мектеп: 2025 жылы 217 мектеп пайдалануға беріледі

    «Жайлы мектеп» жобасы аясында 217 мектеп пайдалануға беріледі. Бұл жоспар 2025 жылдың соңына дейін жүзеге асыуы тиіс. Бұл жөнінде Президент Қасым-Жомарт Тоқаев Қазақстан халқына жолдауынада айтты.

    «Еліміздің кадрлық әлеуетін арттыру ісінде орта білім беру жүйесі өте маңызды рөл атқарады. Менің тапсырмаммен «Жайлы мектеп» ұлттық жобасы жүзеге асырылып жатыр. 2025 жылдың соңына дейін заманауи үлгідегі 217 мектеп пайдалануға беріледі деп жоспарланған. Осы өте маңызды жұмысты «Самұрық-Қазына» қоры қадағалап отыр. Үкімет пен әкімдер бұл шаруаға белсене атсалысуға тиіс. Депутаттар да ортақ істен шет қалмайды деп ойлаймын», — деді Қасым-Жомарт Тоқаев.

    Президент Үкімет жайлы мектептерді арнайы басқару жүйесін енгізуді ойластыруы керек екенін жеткізді.

    «Сонымен бірге, еліміздегі 1300 мектепке күрделі жөндеу жүргізу қажет. Үкімет әкімдермен бірге оны қаржыландыру көздерін анықтап, соның ішінде демеушілерден де қаражат тартып, 3 жыл ішінде бұл мектептерді толық жаңартуы керек.Мемлекет кепілді төлемдер үшін қыруар қаражат бөледі. Оның ішінде жекеменшік мектептерге берілетін қаржы да бар. Мысалы, 250 мыңнан астам бала оқитын жекеменшік мектептерге биылдың өзінде бюджеттен 134 миллиард теңге бөлінді. Ата-аналар мемлекеттің жеке меншік мектептерге нақты көмек беріп жатқанын білуге тиіс. Осыған орай әр балаға норматив бойынша бөлінген қаражат көрсетіліп тұруы қажет. Сонда азаматтарымыз әлеуметтік бағдарламаларға бөлініп жатқан қаржы туралы шынайы ақпараттан хабардар болады», — деп толықтырды Мемлекет басшысы.

  • ПРЕЗИДЕНТ: бұрынғы жүйеден, саяси тұлғалардан кінә іздей беруге болмайды

    ПРЕЗИДЕНТ: бұрынғы жүйеден, саяси тұлғалардан кінә іздей беруге болмайды

    «Ылғи да кейін қайырылып, өткенмен өмір сүруге, бұрынғы жүйеден немесе саяси тұлғалардан кінә іздей беруге болмайды. Өз халқыңның тарихын білу керек, бірақ одан тек еңсеңді түсіріп, өзгеге өкпе артуға себеп іздемеу қажет. Қандай қасіретті болса да, өткен оқиғалардан, ең алдымен, тағылым ала білген жөн. Біз келешекке сеніммен көз тігіп, еліміздің өсіп-өркендеуі мен дамуын ойлауымыз қажет. Мен бұл туралы үнемі айтып келемін»,- деді Президент Қасым-ЖомартТоқаев халыққа жолдауында.

    Мемлекет басшысы заң барлығына ортақ екенін еске салды.

    «Тағы да қайталап айтамын: біздің қоғамымызда заң мен тәртіп үстемдік құруға тиіс. Бұл – бүкіл қоғамның және әр адамның қауіпсіздігін қамтамасыз етуге қатысты ең басты талап. Біз сонда ғана Әділетті, Таза және Қауіпсіз Қазақстанды құра аламыз. Осы стратегиялық мақсатымызға жету үшін еліміздің бейбіт өмір сүруіне және тұрақты дамуына қолайлы сыртқы жағдай қалыптастыруымыз қажет. Бұл – қазіргі аса күрделі геосаяси ахуал кезінде өте жоғары кәсібилікті талап ететін дипломатияның міндеті», -деді Мемлекет басшысы.

  • Қасым-Жомарт Тоқаев: әскерде темірдей тәртіп болуы тиіс

    Қасым-Жомарт Тоқаев: әскерде темірдей тәртіп болуы тиіс

    Қасым-Жомарт Тоқаев  әскерде темірдей тәртіп болуы тиіс екенін қадап айтты. Яғни, әр ата-ана баласын отан алдындағы міндетін атқаруға кеткенде алаңсыз отыруы керек деді.

    «Әскер қатарында заң мен тәртіптің сақталуы – айрықша маңызды міндет. Жастар әскерге Отан алдындағы борышын өтеуге барады. Жас сарбаздарымыз өз міндетін алаңсыз орындауы үшін әскер қатарында, ең алдымен, темірдей тәртіп болуға тиіс. Қарулы күштер мен басқа да күштік құрылымдар осы талапты мүлтіксіз орындауы қажет»,- деді Президент.

    Мемлекет басшысы әр ата-ана әскерге кеткен баласын мемлекетке сеніп тапсыратын жеткізді.

    «Сондықтан сарбаздардың денсаулығы мен қауіпсіздігіне, ең алдымен, армия басшылығы және құқық қорғау мекемелерінің басшылары жауапты», — деді Қасым-Жомарт Тоқаев.

  • ПРЕЗИДЕНТ: орман-тоғайлар жеріміздің 5 пайызын ғана алып жатыр

    ПРЕЗИДЕНТ: орман-тоғайлар жеріміздің 5 пайызын ғана алып жатыр

    Президент елімізде орман-тоғайлар өте аз екенін жеткізді. Сондықтан, көгалдандыру жұмысына ерекше мән беруді тапсырды.

    «Қазақстанның табиғаты өте бай және алуан түрлі. Алайда орман-тоғайлар жеріміздің 5 пайызын ғана алып жатыр. Табиғаттың әр алуандығын сақтау үшін біз орман алқаптарын көбейтуіміз қажет. Бұл міндет еліміздің тұрақты әлеуметтік-экономикалық дамуы үшін де өте маңызды. Мен Президент болып сайланған күннен бастап осы мәселеге ерекше мән беріп келемін», — деді Қасым-Жомарт Тоқаев.

    Сондықтан ел ішінде ауқымды ақпараттық-түсіндіру жұмыстарын жүргізіледі.

    «Елімізді көгалдандыру жұмысының қарқыны жаман емес. Тоқтап қалмай, оны жалғастыру қажет. «Семей орманы» аясында орман тұқым бағы бар. Бұл – Орталық Азиядағы халықаралық озық талаптарға сай көшет өсіретін бірден-бір кешен. Осы жобаны басқа да орманды аймақтарда жүзеге асырған абзал. Сондықтан ел ішінде ауқымды ақпараттық-түсіндіру жұмыстарын жүргізген жөн», — деп толықтырды Президент.

  • ПРЕЗИДЕНТ: денсаулық саласына 3,3 триллион теңге бөлінді. Нәтиже жоқ

    ПРЕЗИДЕНТ: денсаулық саласына 3,3 триллион теңге бөлінді. Нәтиже жоқ

    Президент Қасым-Жомарт Тоқаев денсаулық саласына қыруар қаржы бөлініп жатқанын жеткізді. Бірақ, нәтиже жоқ деп сынға алды.

    «Биыл денсаулық сақтау саласына бюджеттен 3,3 триллион теңге қаржы бөлінді. Бірақ, оның нәтижесі әлі көрініп жатқан жоқ. Медициналық сақтандыру жүйесіне қатысушылар арасында міндеттердің дұрыс бөлінбеуі бұрмаланған ақпараттың көбеюіне әкеп соқтырды. Науқастарға мемлекет кепілдік берген қызметтерді ақылы негізде алуды немесе бірнеше ай бойы кезек күтуді ұсыну жайттары аз емес. Бұған жол беруге болмайды», -деді Қасым-Жомарт Тоқаев.

    Президент бюджеттің мүмкіндігі мен міндеттемесін ескере отырып, мемлекет кепілдік беретін медициналық көмектің бірыңғай базалық топтамасын жасау қажет екенін жеткізді.

    «Ал одан асып кеткен шығынның бәрі сақтандыру жүйесі арқылы төленуге тиіс. Цифрландыру болмаса, мұндай ауқымды өзгерістерді сәтті жүзеге асыру мүмкін емес.
    Бір-біріне байланысы жоқ ондаған бағдарлама мен ақпараттар базасының орнына бірыңғай мемлекеттік медициналық ақпарат жүйесін жасау керек. Жаңа жүйе, меншік түріне қарамастан, мемлекеттік тапсырыс алатын медицина мекемелерінің бәріне толық бақылау жасалуын және мәліметтердің шынайы болуын қамтамасыз етуі қажет. Үкімет осы маңызды мәселені шешуге дереу кірісіп, бұл бағыттағы жұмыстың барысы жөнінде маған және депутаттық корпусқа есеп беріп отыруға тиіс», -деп толықтырды Мемлекет басшысы.

  • ПРЕЗИДЕНТ: 2025 жылды Жұмысшы мамандықтары жылы деп жариялаймын

    ПРЕЗИДЕНТ: 2025 жылды Жұмысшы мамандықтары жылы деп жариялаймын

    Келер жыл жұмысшы мамандықтарының жылы деп жарияланды. Бұл жөнінде Президент Қасым-Жомарт Тоқаев өзінің жолдауында мәлім етті.

    «Кәсіптік білім беру саласына реформа жасау – айрықша өзекті мәселе. Бұл – экономиканың өсімін қамтамасыз ету және инвестициялық тартымдылығын арттыру үшін аса қажет қадам. Мен 2025 жылды Жұмысшы мамандықтары жылы деп жариялаймын. Осы уақыт ішінде техникалық және кәсіби білім беру жүйесін реформалау қажет. Сондай-ақ біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз», -деді Президент.

    Ммелекет басышысы адал, әрі табанды еңбегімен табысқа жеткен адамдар қашанда құрметті, сыйлы болуы керек екенін жеткізді.

    «Бұл біз ұсынып отырған «Адал азамат – Адал еңбек – Адал табыс» қағидатына толық сай келеді. Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Сондықтан біз еңбек адамының мәртебесін көтеріп жатырмыз. Бұл бағыттағы жұмыс тоқтамайды, жалғаса береді.Жұмыстың жаманы жоқ, кез келген еңбек – қадірлі. Ең бастысы, әркім жауапкершілікті терең сезініп, өз міндетін сапалы атқаруға тиіс. Сонда ғана еліміз дамудың сара жолына түседі. Халқымызда «Жұмыстың көзін тапқан байлықтың өзін табады» деген сөз бар. Кәсібіне адал әрі жауапкершілікпен қараған адам қашанда лайықты бағасын алады. Бұл түсінікті қоғам санасына сіңіру қажет. Азаматтарға құрметті атақ берудегі түпкі мақсатымыз да – осы. Бұған дейін мұғалімдерге, дәрігерлерге және мәдениет қайраткерлеріне осындай атақтар беріле бастады. Бұл – өте жақсы бастама, оның аясын кеңейту керек», -деді Қасым-Жомарт Тоқаев.

     

  • Қасым-Жомарт Тоқаев: субсидия алуда көзбояушылықпен айналысатындарды жауапкершілікке тарту керек

    Қасым-Жомарт Тоқаев: субсидия алуда көзбояушылықпен айналысатындарды жауапкершілікке тарту керек

    Қасым-Жомарт Тоқаев субсидия алуда көзбояушылықпен айналысатындарды   жауапкершілікке тарту керектігін қатаң ескертті.

    «Агроөнеркәсіп кешенін тікелей субсидиялау тәсілінен арзан несие беру тәсіліне біртіндеп көшу – аса маңызды міндет. Бөлінген қаражаттың бәрі тиімді жұмсалуға тиіс. Алайда шындыққа жанаспайтын ақпарат беру, басқаша айтқанда, мәліметтерді бұрмалау ауыл шаруашылығындағы шынайы ахуалды бағалауға кедергі келтіріп отыр»,- деді Мемлекет Басшысы.

    Қасым-Жомарт Тоқаев көзбояушылықпен айналысатындардың нақты дәлелдерін де келтірді.

    «Арнайы комиссия 2 миллион ірі қара және 3 миллионнан астам уақ мал санда бар, санатта жоқ екенін анықтады. Егін шаруашылығы саласында да осындай жайттар бар екені белгілі болды. Шын мәнінде, мұның бәрі – мемлекеттен субсидия алу үшін жасалған көзбояушылық. Ондай қылмыстық әрекеттерге тосқауыл қою қажет. Ал мұндай іспен айналысқан адамдарды жауапкершілікке тарту керек», -деп талап қойды Президент Қасым-Жомарт Тоқаев.  

    Мемлекет басышысы, жер – ауыл шаруашылығы саласына инвестиция тартудың басты кепіл болатынын жеткізді.

    «Жер телімдерін қайтару жөніндегі арнайы комиссия әкімдіктердің ауыл шаруашылығы алқаптарын конкурс өткізбей-ақ беру туралы екі мыңнан астам заңсыз шешім қабылдағанын анықтады. Бұл мәселе қатысты екіұшты ұстаным болмауы қажет. Заңсыз алынып, пайдаланылмай жатқан жер оңтайландырылған рәсім бойынша мемлекетке қайтарылуға тиіс. Ал жерді пайдаланушы оған инвестиция салып, адал еңбек етіп жатса, жұмысқа бөгет жасамау керек. Сондай-ақ оның ауылды көркейтіп, тұрғындарға тұрақты жұмыс беріп отырғанын да ескерген жөн», -деді Қасым-Жомарт Тоқаев.