Қызылорда облысында ер адам өзге азаматтың суретін пайдаланып, WhatsApp арқылы әйелді алдап кеткен. Ол азаматтың әпкесіне өзін туған інісі ретінде таныстырып, қарызға ақша сұраған. Нәтижесінде әйел 1 млн теңгені аударып, алаяқтың құрбаны болды, деп хабарлайды Sona.kz Қызылорда облыстық сотына сілтеме жасап.
Сот мәліметінше, айыпталушы уақытша нөмір тіркеп, жалған аккаунт ашып, бөтен адамның суретін қойған. Кейіннен жәбірленушіге хабарлама жіберіп, “қарызға” ақша сұраған.
Әйел көрсетілген есепшотқа қаражат аударған. Сот бұл әрекетті ақпараттық жүйе пайдаланушысына алдау арқылы жасалған алаяқтық деп таныды.
Айыпталушы кінәсін мойындап, жасаған ісіне өкініш білдірді. Жәбірленуші де оны кешірген. Бұрын сотталмағаны да жазаны жеңілдететін мән-жай ретінде ескерілді.
Арал аудандық сотының үкімімен оған 2 жыл мерзімге бас бостандығын шектеу жазасы тағайындалды. Сонымен қатар жыл сайын 100 сағат мәжбүрлі еңбекке тарту белгіленді. Конституцияның 30 жылдығына байланысты амнистияға сәйкес жаза екі есе қысқартылды. Залал толықтай жәбірленушінің пайдасына өндірілді.
