Алматыда Төле би даңғылындағы айырбастау пунктінің маңында ер адамды тонап, 13 миллион теңгесін алып кеткен, деп хабарлайды Sona.kz қалалық полиция департаментіне сілтеме жасап.
Полицияның мәліметінше, бейтаныс азамат қала тұрғынына шабуыл жасап, ақшасын ашық түрде иемденген. Жедел-іздестіру шаралары барысында Алмалы аудандық полиция қызметкерлері күдіктіні — Алматы қаласының 39 жастағы тұрғынын ұстады.
«Күдіктінің тұрғылықты жерінен ақшалай қаражат, қылмыс кезінде бейнежазбаларға түскен киімдер және өзге де заттай айғақтар алынды», — деді Алмалы аудандық полиция басқармасының бастығы Мақсат Пшан.
Күдікті уақытша ұстау изоляторына қамалды. Тергеу амалдары жүріп жатыр, оның өзге де ұқсас қылмыстарға қатысы бар-жоғы тексерілуде.
Айта кетейік, бұған дейін Алматыда түнгі уақытта көшеде адамдарға бұрыш бүріккішпен шабуыл жасап, телефон, ақша және бағалы заттарын тартып алған топ ұсталған болатын.
