FlyArystan әуе компаниясы 12 жастағы қыз баланы не себепті ұшаққа отырғызбағанын түсіндірді.
«Бұған дейін әуе кемесі жолаушылар сыйымдылығы аз ұшаққа ауыстырылғандықтан, әуекомпания Зере Галиеваға ұшақ бортынан орын бере алмады. Әуекомпания агенттері борттағы жолаушыларға Зереге орын беру туралы өтініш білдіріп, өтемақы ұсынды. Өкінішке орай, жолаушылар арасында ерікті табылған жоқ», — делінген FlyArystan әуе компаниясының хабарласында.
Яғни, жолаушының билеті бар бірақ, орны жетпей қалған.
«Әуекомпания бұл жағдайдағы өз кінәсін толық мойындайды. Біз болған оқиғаға шынайы өкініш білдіреміз және бұл жағдай біздің қызмет көрсету стандарттарымызға мүлдем сай келмейтініне сендіргіміз келеді. Шынайы кешірім сұрай отырып, Мусина ханым мен отбасына келтірілген моральдық зиян үшін өтемақы ұсынуға дайынбыз», -деп толықтырды FlyArystan әуе компаниясы.
Ал, зардап шегушінің сөзінше FlyArystan компаниясы оған 4 млн теңге өтемақы ұсынған. Бірақ, Жазира Мусина әуе компнаниямен тек сотта кездесуге бекініп отыр. Тіпті, бұл оқиғаның болғанына 20 күнге жуықтаған. Сөзінше, компания бүгін ғана кешірім сұрап, хат жіберіпті.
Естеріңізге сала кетейік, 12 жастағы қызды рейке жібермей қойғанын бұған дейін хабарлаған болатынбыз. Айта кетейік, FlyArystan әуе компаниясына қатысты бұл алғашқы дау емес. Жақында ғана Алматы-Астана бағыты бойынша рейсті кешіктіргені үшін оларға 4 млн теңгеге жуық айыппұл салынған болатын. Себебі, FlyArystan рейсті кешіктіргені үшін жолаушыларды қонақүйге орналастыруы тиіс болған. Бірақ, бұл міндеттерін орындамаған. Енді осы әрекеттері үшін 3 млн 700 мың теңге айыппұл төлейді.
