Петропавлда төртінші қабаттан секірген 67 жастағы әйел қайтыс болды, деп хабарлайды Sona.kz Halyqstan — ға сілтеме жасап.
Оқиға 13 қазан күні қаладағы көпсалалы ауруханалардың бірінде болған. Алдын ала мәліметтерге сәйкес, әйел ұзақ уақыт бойы ем алып жүрген және созылмалы дертінен зардап шеккен. Дәрігерлердің барлық әрекетіне қарамастан, ол алған жарақаттарынан түнде көз жұмған.
Полиция департаментінің хабарлауынша, қазіргі уақытта оқиғаның себебі мен мән-жайын анықтау мақсатында тексеріс басталды. Куәгерлер мен медициналық қызметкерлерден түсініктемелер алынуда, сот-медициналық сараптама тағайындалған.
Бейресми ақпаратқа сүйенсек, әйел бұған дейін де өз-өзіне қол жұмсауға әрекет жасаған. Қала тұрғындары қайғылы оқиғаға алаңдаушылық білдіріп, қоғамда психологиялық көмек көрсетудің маңыздылығын атап өтуде.
Мамандардың айтуынша, мұндай жағдайлардың алдын алу үшін азаматтарға эмоционалды күйзеліс кезінде кәсіби көмекке жүгінуден тартынбау қажет.
