Семейде полиция 13 жастағы екі сыныптастың арасындағы жанжалдың мән-жайын анықтап жатыр. Оқиғадан кейін оқушылардың бірі 15-ке жуық пышақ жарақатын алған.
Зардап шеккен баланың туыстарының айтуынша, екі жасөспірім сабақтан кейін бірге серуендеуге шыққан.
Одан кейін олардың арасында нақты не болғаны әзірге толық анықталған жоқ.
Балалардың бірі денесі мен аяқ-қолынан көптеген жарақат алған.
Ауыр жағдайына қарамастан, ол өздігінен жақын маңдағы үйге дейін жетіп, үлкендерден көмек сұрай алған.
Жасөспірім шұғыл түрде ауруханаға жеткізілді.
Дәрігерлер оның құрсақ қуысына өткен пышақ жарақатын, оң жақ бүйрек пен үлкен шарбының зақымдануын, ішкі қан кетуді, денесі мен аяқ-қолындағы көптеген жараны және бірінші дәрежелі геморрагиялық шокты анықтаған.
Операция шамамен төрт сағатқа созылды.
Отадан кейін бала үш тәулік жансақтау бөлімінде жатқан.
Қазір оның жағдайы тұрақталған. Жасөспірім балалар хирургиясы бөліміне ауыстырылды. Дәрігерлердің мәліметінше, өміріне қауіп жоқ.
Оқиғаның екінші қатысушысы да жарақат алған.
Жарияланған мәліметтер бойынша, оның мойын, кеуде және қол тұсынан бірнеше жеңіл жарақат анықталған. Медициналық көмек көрсетілгеннен кейін ол амбулаториялық емге жіберілген.
Мектеп өкілдерінің айтуынша, екі жасөспірім де бір сыныпта оқиды, бұған дейін профилактикалық есепте тұрмаған және бір-бірімен дос болған.
Жанжалдың нақты себебі мұғалімдерге де белгісіз.
Әлеуметтік желілер мен БАҚ-та оқиғаның қалай басталғаны және пышақтың қайдан шыққаны туралы түрлі нұсқа тарады. Алайда бұл мәліметтер әзірге ресми түрде расталған жоқ.
Абай облысының Полиция департаменті сотқа дейінгі тергеу жүргізіп, оқиғаның барлық мән-жайын анықтап жатыр.
Тергеу қорытындысы бойынша жасөспірімдерді профилактикалық есепке қою мәселесі қаралады. Сондай-ақ олардың заңды өкілдерінің бала тәрбиесіне қатысты міндеттерін орындауына құқықтық баға берілуі мүмкін.
Оқиғаға қатысушылар кәмелетке толмағандықтан, қылмыстық істің егжей-тегжейі жарияланбайды.
