Спортшы тақтайша өндіретін зауытта еңбек еткен. Қайғылы жағдай жұмыс ауысымы кезінде болған.
Марқұмның досының айтуынша, сол кеште Тілектес биікте жұмыс істеген. Оның маңында электр сымы болған.
Алдын ала мәлімет бойынша, ол абайсызда электр сымына тиіп кетіп, ток соққаннан кейін биіктен құлаған.
Оған медициналық көмек көрсетуге тырысқанымен, өмірін сақтап қалу мүмкін болмады.
Оқиғаның нақты мән-жайын құзырлы органдар анықтауы тиіс.
Қазақстан чемпионы болған
Тілектес Әділ грек-рим күресімен айналысып, есту қабілеті бұзылған спортшылар арасындағы жарыстарға қатысқан.
2018 жылы Ақтөбеде өткен Қазақстан спартакиадасында өнер көрсетті.
Ал 2019 жылы мансабындағы маңызды жетістіктерінің біріне қол жеткізіп, 60 келіге дейінгі салмақта грек-рим күресінен Қазақстан чемпионы атанды.
Спорттағы жетістіктеріне қарамастан, Тілектес күнделікті жұмысын да қатар алып жүрген.
Жақындарының айтуынша, ол еңбек еткен кәсіпорындағы есту қабілеті бұзылған алғашқы қызметкер болған.
Туыстары мен достары жұмысқа орналасқан кезде кәсіпорын басшылығы өндірістегі еңбек есту қабілеті бұзылған адам үшін қиын болуы мүмкін екенін ескерткенін айтады.
Соған қарамастан Тілектес жұмысын жалғастырып, спорт пен еңбекті қатар алып жүрген.
Бұл мәліметтер әзірге спортшының жақындарының сөзіне негізделген. Кәсіпорындағы еңбек жағдайы мен қауіпсіздік талаптарының сақталуына қатысты ресми қорытынды жарияланған жоқ.
Спорттан кетуді жоспарламаған
Жақындарының айтуынша, Тілектес күресті жалғастыруды көздеген.
Ол жаттығуын тоқтатпай, алдағы жарыстарға қатысып, жаңа жеңістерге жетуді жоспарлаған.
Марқұмның артында жары мен екі баласы қалды.
Өндірістегі қайғылы жағдайдың нақты себебі, сондай-ақ еңбек қауіпсіздігі талаптарының қаншалықты сақталғаны ресми тексеру барысында анықталуы тиіс.
