Екібастұзда Mercedes жүргізушісі полицияның тоқтау туралы талабына бағынбай, қашуға әрекет жасаған. Қуғын оның ұсталуымен аяқталып, ер адамға бес әкімшілік хаттама толтырылды.
Оқиға 16 қыркүйекте болған. Жүргізуші тәртіп сақшыларының тоқтау туралы талабын елемей, қозғалысын жалғастырған. Осыдан кейін полиция оның соңынан қуып, көп ұзамай ұстаған.
Қуғын кезінде жүргізуші жол қозғалысы ережелерін бірнеше рет бұзып, басқа көлік жүргізушілеріне қауіп төндірген.
Оған полицияның көлікті тоқтату туралы талабына бағынбау, жол-көлік оқиғасы кезінде орындауға тиіс міндеттерді орындамау, жол ережесін бұзып материалдық шығын келтіру, қиылыстан өту тәртібін бұзу және басқа көліктерге жол бермеу, сондай-ақ авариялық жағдай туғызу фактілері бойынша бес әкімшілік хаттама толтырылды.
Полиция мәліметінше, жүргізушінің маневрлері басқа жол қозғалысына қатысушыларды жылдамдығын күрт төмендетуге немесе қозғалыс бағытын өзгертуге мәжбүрлеген.
Медициналық куәландыру оның алкогольдік немесе есірткілік масаң күйде болмағанын көрсетті.
Іс материалдары сотқа жолданды. Mercedes арнайы айып тұрағына қойылды.
