Астанада қызды аңдып, оған қатысты әдепсіз әрекет жасаған 27 жастағы ер адам ұсталды. Оқиға 12 қазанда болған. Қыз бейнебақылау камераларындағы жазбаларды әлеуметтік желіде жариялағаннан кейін жағдай көпшіліктің назарын аударды.
HALYQSTAN мәліметінше, қыз қоғамдық автобуста келе жатқанда бейтаныс ер адамды байқаған.
Ол қызбен бір аялдамадан түсіп, жұмыс істейтін ғимаратына дейін соңынан ерген.
TikTok-та жарияланған бейнежазбада ер адамның қызды аңдып келе жатқаны көрінеді. Ал қыз ғимаратқа кірген сәтте ол оның бөксесіне қол тигізген.
Қыз полицияға арыз жазған
Зардап шеккен қыз HALYQSTAN тілшісіне құқық қорғау органдарына шағымданғанын растады.
Оның айтуынша, бастапқыда полиция қызметкерлері болған жағдайға жеткілікті мән бермеген. Алайда оқиға әлеуметтік желілерде таралғаннан кейін ер адамды іздеу басталған.
Қыз бұған дейін Қытайда білім алып, жақында Қазақстанға оралғанын айтқан.
Қазір ол өз қауіпсіздігіне алаңдайды. Себебі бейтаныс ер адам оның қай жерде жұмыс істейтінін біледі.
Полиция не дейді?
Астана қаласының Полиция департаменті тұрғыннан арыз түскенін растады.
Ведомствоның мәліметінше, ер адам қызды көшеде аңдып, ғимаратқа кіреберісте оған қатысты әдепсіз әрекет жасаған.
Полиция 27 жастағы ер адамның жеке басын анықтап, оны ұстады.
Ол уақытша ұстау бөлмесіне қамалды. Оған қатысты әкімшілік іс қозғалды.
Іс материалдары шешім қабылдау үшін сотқа жолданды.
Ал қыздың полиция қызметкерлерінің алғашқы әрекетіне қатысты айтқан сөздеріне ресми түсініктеме берілген жоқ.
