Солтүстік Қазақстан облысында бес көлік соқтығысқан ірі жол апатынан үш әйел қаза тапты. Олардың бірі балабақша меңгерушісі, қалған екеуі Жамбыл ауданындағы мектепке дейінгі білім беру ұйымдарының тәрбиешілері болған. Тағы екі адам ауыр жарақат алды.
Қайғылы оқиға 15 қазанда сағат 08:00 шамасында Астана — Петропавл республикалық тасжолының Кременчуг ауылы маңындағы бөлігінде болған.
Солтүстік Қазақстан облыстық полиция департаментінің мәліметінше, жол апатына үш жеңіл автокөлік пен екі КамАЗ жүк көлігі қатысқан.
Жеңіл көлік екі жүк көлігінің арасында қалған
Алдын ала мәлімет бойынша, ішінде бес адам отырған Audi автокөлігі екі жүк көлігінің арасында қысылып қалған.
Қатты соқтығыс салдарынан жеңіл көліктегі үш жолаушы әйел оқиға орнында көз жұмды.
20 жастағы жүргізуші мен 57 жастағы жолаушы ауыр жарақат алып, шұғыл түрде ауруханаға жеткізілген. Дәрігерлер оларға операция жасап жатыр.
Апатқа қатысқан өзге көліктердің жүргізушілері зардап шекпеген.
Қаза тапқандар білім беру саласында жұмыс істеген
Солтүстік Қазақстан облысының білім басқармасы жол апатында Жамбыл ауданындағы мектепке дейінгі білім беру ұйымдарының үш қызметкері қаза тапқанын растады.
Ведомство марқұмдардың отбасылары мен жақындарына көңіл айтты.
Білім басқармасының түсіндіруінше, әйелдер жеке шаруаларымен жолға шыққан. Сапар олардың қызметтік міндеттерін орындаумен байланысты болмаған.
Қылмыстық іс қозғалды
Полиция екі немесе одан да көп адамның өліміне әкеп соққан жол қозғалысы ережелерін бұзу дерегі бойынша сотқа дейінгі тергеуді бастады.
Құқық қорғау органдары апаттың нақты себептері мен мән-жайларын анықтап жатыр.
