21 қазаннан бастап Қонаев – Талдықорған тасжолында көліктердің орташа жылдамдығын бақылау жүйесі іске қосылады. Бұл туралы Sona.kz «ҚазАвтоЖол» ұлттық компаниясына сілтеме жасап хабарлады.
Алматы және Жетісу облыстарын байланыстыратын бағыт қосылғаннан кейін орташа жылдамдық бақыланатын республикалық жол учаскелерінің саны 16-ға жетеді.
Жүйе көліктің бақылау нүктелерінен өткен уақытын тіркеп, жүріп өткен қашықтығына қарай орташа жылдамдығын есептейді.
Компания мәліметінше, 2026 жылдың басынан бері республикалық тасжолдарда орташа жылдамдықты асырудың 550 мың дерегі тіркелген. Тағы 163,5 мың заңбұзушылық жылдамдықты нақты бір нүктеде өлшеу кезінде анықталған. Жалпы көрсеткіш 713 мыңнан асқан.
13 қазаннан бастап орташа жылдамдықты бақылау Орал – Ресей шекарасы (Самара), Ақтөбе – Ресей шекарасы (Орынбор), Қостанай – Денисовка және Қандыағаш – Мақат бағыттарында да енгізілген.
