Қазақстанның жол саласында анықталған 33 заңбұзушылық бойынша сотқа дейінгі тергеу басталды. Алдын ала есеп бойынша келтірілген залал шамамен 8 млрд теңгеге бағаланып отыр, деп хабарлайды SONA.KZ Премьер-министрдің баспасөз қызметіне сілтеме жасап.
Тексерудің алдын ала нәтижелері туралы Бас прокурордың бірінші орынбасары Жандос Өміралиев жол саласын реформалауға арналған кеңесте баяндады. Отырысқа Премьер-министр Олжас Бектенов төрағалық етті.
Бас прокуратура өкілінің мәліметінше, жүйелі заңбұзушылықтар жолдарды жоспарлау мен салудан бастап оларды пайдалану кезеңіне дейін анықталған. Тергеулер жалғасып жатыр.
Тексеру барысында бұрын жөнделген жолдарды қайта жөндеуге тендер жариялау деректері де белгілі болды. Олардың арасында мердігерлердің кепілдік міндеттемелері әлі қолданыста болған жолдар бар.
Үкімет мәліметінше, негізсіз шарттар мен мемлекеттік сатып алу жоспарларының күшін жою арқылы 36 млрд теңге шығынның алды алынған.
Кеңесте жолдардың сапасын арттыру үшін құрылыс нормативтерін қайта қарау, материалдардың сапасын жақсарту және жаңа технологияларды енгізу мәселелері талқыланды. Сондай-ақ жолдардың мерзімінен бұрын бұзылу себептерін жою және мердігерлердің жауапкершілігін күшейту қажеттігі айтылды.
Олжас Бектенов жол саласын реформалау жөніндегі жұмыс тобына қараша айының соңына дейін ұсыныстар пакетін дайындауды тапсырды
