Алматы полициясы 14 жастағы Максим Кубаревтің өлімінен кейін қылмыстық іс қозғады. Анасының айтуынша, баланың жағдайы қалалық № 37 емханада антибиотик енгізілгеннен кейін күрт нашарлаған. Дәрігерлер оны жеті күн бойы құтқаруға тырысқан, деп хабарлайды SONA.KZ BES.media басылымына сілтеме жасап.
Емханада не болды?
Ата-анасының айтуынша, тамыздың басында Максимнің лимфа түйіндері ұлғайған. Отбасы бірнеше медициналық мекемеге жүгінген. Жасөспірім екі рет ем қабылдағанымен, лимфа түйіндері қалпына келмеген.
21 қазанда ата-анасы ұлын инфекционистің қабылдауына апарған. Анасының сөзінше, дәрігер антибиотик тағайындап, препаратты енгізер алдында сынама жасау керегін ескерткен. Инъекциядан кейін баланың жағдайы күрт нашарлап, денесі құрысып, есінен танып қалған.
Жасөспірімді Балаларға шұғыл медициналық көмек көрсету орталығына жеткізіп, өкпені жасанды желдету аппаратына қосқан. Максим жеті күннен кейін қайтыс болды.
Ата-анасы нені тексеруді сұрайды?
Отбасы баланың ауыр аллергиялық реакцияға ұшыраған болуы мүмкін деп санайды. Ата-анасы дәрінің қандай мөлшерде енгізілгенін, процедураның дұрыс жүргізілгенін және шұғыл көмектің уақытында көрсетілгенін анықтауды сұрайды. Әкесінің айтуынша, емханадан алынған медициналық құжаттарда бір-біріне сәйкес келмейтін мәліметтер бар.
Полиция қылмыстық іс бойынша сараптамалар тағайындалғанын хабарлады. Алматының денсаулық сақтау басқармасы отбасыға көңіл айтып, тексеруден кейін қосымша ақпарат беретінін мәлімдеді. Өлімнің ресми себебі әзірге жарияланған жоқ.
