Ақтөбедегі № 48 мектептің бұрынғы бас бухгалтері бюджеттен 57,9 млн теңге жымқырғаны үшін алты жылға бас бостандығынан айырылды. Ол шартты жаза тағайындауды сұрағанымен, апелляциялық алқа үкімді өзгеріссіз қалдырды, деп хабарлайды Sona.kz Halyqstan-ға сілтеме жасап.
Бюджет ақшасын қалай аударған?
Ер адам мектепке 2015 жылы жұмысқа кіріп, бір айдан кейін бюджет қаражатын өз шотына негізсіз аудара бастаған. Алғашында айына бір рет 6,8 мың теңге аударған. Кейін аударымдар жиілеп, бір аударымның сомасы 565 мың теңгеге дейін жеткен.
Сот оның 2015 жылғы сәуірден 2018 жылғы желтоқсанға дейін өз шотына заңсыз 57,9 млн теңге аударғанын анықтады. Бұл сома Ақтөбе қалалық білім бөліміне келтірілген залал деп танылды. Сот бұрынғы бухгалтерді залалды толық өтеуге міндеттеді.
Апелляциялық алқа қандай шешім қабылдады?
Сотта ер адам кінәсін толық мойындап, бұл әрекетке құмар ойынға әуестігінен барғанын айтты. Апелляциялық шағымында ол өкінетінін, іс бойынша дәлелдерге дау айтпайтынын және асырауында үш қызы барын көрсеткен.
Сот алқасы жазаны жеңілдетуге негіз таппады. Бұрынғы бухгалтер жазасын қауіпсіздігі орташа мекемеде өтейді. Үкім заңды күшіне енді.
