Мәскеуден Алматыға ұшқан SCAT әуе компаниясының ұшағы 9 қарашаға қараған түні Астанаға қонуға мәжбүр болды. Әуе компаниясының мәліметінше, ұшу кезінде борт жүйесі белгі бергеннен кейін экипаж Астана әуежайына қону туралы шешім қабылдаған. Ұшақ қалыпты жағдайда қонды, деп хабарлайды SONA.KZ SCAT компаниясының Zakon.kz басылымына берген түсініктемесіне сүйеніп.
Жолаушылар не айтты?
Жолаушылардың бірі Threads желісінде ұшақ қонғаннан кейін әуежайда ұзақ уақыт су мен тамақ берілмегенін, Алматыға қашан ұшатыны да айтылмағанын жазды. Оның сөзінше, жолаушылар наразылық білдіргеннен кейін ғана су әкелінген.
SCAT не деп жауап берді?
Әуе компаниясы ауызсуды әуежайға бөлек жеткізуге тура келгенін, жолаушылардың сол себепті күткенін түсіндірді. SCAT қолайсыздық үшін кешірім сұрап, жолаушыларды Алматыға жеткізу үшін қосалқы ұшақ бөлгенін хабарлады. Компания борт жүйесінің не себепті белгі бергенін нақтыламады және қозғалтқыш істен шықты деген ақпаратты растаған жоқ
