Қазақстан Республикасының Президенті Қасым-Жомарт Тоқаевтың Қазақстан жыл сайынғы маңызды қадамдарды көрсетіп, ел дамуына негізделген жұмыстарды жүктейтін Жолдауын зор ықыласпен тыңдағандардың қатарында болдым. Мемлекет басшысының осы жолғы «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауы цифрлы трансформация мен әлеуметтік жаңғыруды үйлестіре отырып, еліміздің болашағын айқындайтыны сөзсіз. Цифрландыру халыққа қызметті қолжетімді ету үшін керек болса, жасанды интеллект өмірді жеңілдету үшін қажет.
Елді үш жыл ішінде толық цифрлы мемлекетке айналдыру міндеті қойылуының уақыт талабынан туындап отырғаны анық. Бұл еліміздің ұлттық қауіпсіздігі мен экономикалық тұрақтылығын қамтамасыз етудегі маңызды қадам болмақ. Қасым-Жомарт Кемелұлының жасанды интеллект саласына арнайы министрлік құру туралы бастамасы елдің технологиялық тәуелсіздігін нығайтып, инновациялық дамуға серпін беретіні сөзсіз. Сондай-ақ Цифрлық кодекс қабылданатыны – технологиялық дамудың бағытын анықтайтын стратегиялық қадам. Жасанды интеллект қазірдің өзінде медицинадан бастап білім, ауыл шаруашылығы салаларында да қолданыла бастады.
Мемлекет басшысы Жолдауда жастарға қатысты көтерген маңызды мәселенің бірі – оқу гранттарының тиімділігі. Жыл сайын жоғары оқу орындарын бітірген жастардың көпшілігі мамандығы бойынша жұмыс істемейді. Осы бір олқылықты жою мақсатында Президент еңбек нарығына қажет мамандықтарға ғана грант бөлуді, техникалық және жұмысшы мамандықтар мәртебесін көтеруді, түлектердің нақты жұмысқа орналасуын қадағалауды тапсырды.
Рубрика: Жаңалықтар
-
Базарбай Оралбаев, Қонаев қалалық ардагерлер кеңесінің төрағасы
-
Биыл Қонаевта кардиологиялық орталық ашылады
Қонаев қаласында халықтың тұрмыс-тіршілігіне тікелей әсер ететін, денсаулық сақтау саласында көрсетілетін қызмет сапасын арттыратын бірегей нысан – кардиологиялық орталықтың құрылысы жүріп жатыр.
Нысан инвесткомпанияның қаржысына салынуда. Тартылатын инвестиция көлемі — 1,5 млрд.теңгеден астам. Орталықта үш ота залы, 21 диагностикалық және емдеу, 20 науқас кабинеті, 48 төсек-орындық стационар бөлімі болады. Медициналық мекемені заманауи аппараттармен жабдықтау көзделуде. Жылына орталықта 15000 адам ем қабылдайды, жаңадан 100 жұмыс орны құрылады.
Қалада қолға алынған тағы бір ірі жоба – 4 немесе 5 жұлдызды қонақ үй кешенінің құрылысы. Шаһарда бұрын-соңды мұндай нысан болмаған. Кешен Аладдин ойынханасының аумағында тұрғызылуда. Аумағы 3 гектарды құрайды. Мұнда тек қонақ үй емес, отбасылық демалыс аймағы тұрғызылады.
Нысан құрылысына 50 млн. АҚШ доллары көлемінде инвестиция тартылмақ. Ашылатын жұмыс орындарының саны – 500-ден астам. Қонақ үй кешені 2027 жылы ашылады деп жоспарлануда.
«Қонаев қаласында жалпы сомасы 2,4 трлн.теңге болатын 39 инвестжоба жүзеге аспақ. 2025 жылдың басынан негізгі капиталға 58,0 млрд. теңге инвестиция тартылды. Қазіргі таңда шетелдік компаниялармен жаңа жобалар бойынша келіссөздер жүргізілуде», – деп жазды әкімдіктің кәсіпкерлік бөлімі.
Алдағы уақытта Қонаев қаласында түрлі серіктестіктермен бірлесе отырып, өңдеу өнеркәсібін дамыту жоспарлануда. Бүгінде шаһар аумағында 12 өндіріс ошағы жұмыс істеп тұр.
-
Қонаевтағы туризм: 1 млрд теңгеден астам сомаға қызмет көрсетілді
Мәліметке сәйкес, биыл Қапшағай су қоймасының жағалауына 1,8 млн демалушы келді. Қаладағы 140-тан астам туристік нысан жыл басынан 1 млрд 200 млн. теңгеден астам сомаға қызмет көрсетті. Бұл өткен жылдың есептік кезеңімен салыстырғанда 100 млн теңгеге артық.
«2025 жылы былтырдан қарағанда демалушылардың саны 300 мыңға өсті. Мұның себебі «АСП арена» аумағында түрлі концерттер, іс-шаралардың ұйымдастырылуы, ашық суда жүзуден жарыстың өтуі, апта сайын «Aspan fest» фестивалінің ұйымдастырылуы болды. Бұдан бөлек, №5 жағажайдың жаңғыртылып, абаттандырылуы да демалушылар санының артуына айтарлықтай әсер етті. Бұл жағажайға демалыс күндері 5000-ға жуық адам келді», — деді бөлім басшысының м.а. Айдын Әбілқасым.
Сондай-ақ ол қауіпсіздік шараларына да ерекше көңіл бөлінгенін атап өтті. ТЖД-ның 73 маманы судағы қауіпсіздікті, полицияның 12 қызметкері қоғамдық тәртіпті қадағалап отырды, күнделікті рейдтік шаралар жүргізілді.
«Баршаңызға мәлім, қалада 8 коммуналдық жағажай болса, оның ішінде №5,6,7-ші жағажайларға келушілер көп. Әрқайсында медпункттер, санитарлық аймақтар, құтқарушылардың жұмысы ұйымдастырылды», — деді маман.
Жағажайдан басқа, Қонаев қаласының аумағында «Көшпенділер қалашығы», тарихтан сыр шертетін «Таңбалы тас» шатқалы орналасқан. Бұл нысандардың да халық арасында танымалдылығы жоғары болып отыр. Мысалы, алғашқы туристік аймақ айына 300-500 адамды қабылдауда. Ал «Таңбалы тасты» көруге 4000-ға жуық турист келген.
«Көшпенділер қалашығы» шығармашылық топтары үшін де танымал нысан. Биыл мұнда екі түрлі жанрда кино, «Жібек жолы» арнасында көрсетілетін бірегей бағдарлама түсірілді», — деді Айдын Әбілқасым.
Алдағы жоспар
Биыл №6 жағажайды абаттандыру жұмыстары басталады деп көзделуде. Қаладағы жалпы ұзындығы 6,1 шақырым (1 км астамы қолданыста) болатын жағажай жаңғыртылады.
«Көшпенділер» қалашығын туристік бағытта заманауи үлгіде дамыту үшін жобалар қарастырылуда.
Сонымен қатар шаһарда 11 инвестжоба жүзеге асады деп жоспарлануда. Тартылатын инвестиция көлемі – 306,4 млрд.теңге. -
Маңғыстаудағы жол апатынан қаза болғандардың денесін жеткізу үшін арнайы әуе рейсі жіберілді
Маңғыстау облысына жол-көлік апатынан қаза тапқандардың туыстарын жеткізу үшін Ұлттық ұланның арнайы борты жіберілді, деп хабарлайды Sona.kz Ішкі істер министрлігіне сілтеме жасап.
Ведомствоның ресми Telegram-арнасының мәліметінше, туыстары қаза тапқандарды тану және қажетті рәсімдерден өту үшін ұшып келді. Осыдан кейін әуе кемесі марқұмдардың денесін өз өңірлеріне жеткізетін болады.
Қайтыс болғандардың арасында Қарағанды облысының бес тұрғыны және Астанадан бір әйел бар.
«Бұл іс-шара қаза болғандардың отбасыларына көмек көрсету үшін, соның ішінде денелерін тану, тасымалдау және жерлеу рәсімін ұйымдастыру мақсатында қолға алынды», — деді ІІМ ресми өкілі, департамент басшысы Шыңғыс Әлекешев.
Еске сала кетейік, қайғылы жағдай 11 қыркүйекте Қарақия ауданының Сенек ауылынан 90 шақырым жерде болды. Апат салдарынан сегіз адам оқиға орнында, тағы екеуі ауруханаға жеткізу кезінде қаза тапты. Жүргізуші мен тағы екі жолаушы түрлі жарақаттармен ауруханаға түсті.
Кейін белгілі болғандай, жолаушылар Бекет-Ата әулие жеріне зияратқа бара жатқан.
Қылмыстық істің тергеу барысы Ішкі істер министрінің жеке бақылауына алынды. Тергеу жүргізушінің әрекетін, көліктің техникалық жағдайын және жолаушыларды тасымалдау талаптарын тексеріп жатыр.
Өңірлік денсаулық сақтау басқармасының дерегінше, зардап шеккен ер адам (1964 ж.т.) мен әйел (1967 ж.т.) жансақтау бөлімінде ауыр халде жатыр. Тағы бір әйел (1960 ж.т.) травматология бөліміне жатқызылған, жағдайы тұрақты ауыр деп бағалануда.
-
Таразда әйел 22 жастағы ұлын зорлады деп айыптады
Тараз қаласының 41 жастағы тұрғыны полицияға арыз түсіріп, өз ұлын зорлық жасады деп мәлімдеді. Айтуынша, 22 жастағы азамат оған жыныстық зорлық көрсеткен, деп хабарлайды Sona.kz Жамбыл облыстық полиция департаментіне сілтеме жасап.
Ведомство өкілдері арыздың тіркелгенін растады. Күдікті ұсталып, уақытша ұстау изоляторына қамалды.
«Тараз қалалық полиция басқармасымен ҚР ҚК 120-бабының 1-бөлігі (“Зорлау”) бойынша сотқа дейінгі тергеу басталды. Жедел-іздестіру іс-шаралары барысында 22 жастағы күдікті анықталып, ұсталды», — делінген полиция мәліметінде.
-
Маңғыстау облысындағы жол апатынан зардап шеккендердің жағдайы туралы мәлімет жарияланды
Маңғыстау облысындағы жол-көлік оқиғасынан жарақат алған үш жолаушы Жаңаөзен көпсалалы қалалық ауруханасына жеткізілді, деп хабарлайды Sona.kz Kazinform-ға сілтеме жасап.
Облыстық денсаулық сақтау басқармасының мәліметінше, 1964 жылы туған ер адам мен 1967 жылғы әйел жансақтау бөлімінде жатыр. Дәрігерлер олардың жағдайын ауыр деп бағалады. Сонымен қатар, 1960 жылы туған әйел травматология бөліміне орналастырылды. Оның жағдайы тұрақты, бірақ ауыр.
Қазіргі уақытта науқастардың жағдайы дәрігерлердің бақылауында.
Еске салайық, 11 қыркүйекте Қарақия ауданына қарасты Сенек ауылынан 90 шақырым жерде жол апаты болды. Алдын ала мәлімет бойынша, Toyota Hiace автокөлігінің жүргізушісі рөлге ие бола алмай, жол жиегіне аударылып кеткен. Салонда жолаушылар болған. Апат салдарынан 10 адам қаза тапты.
-
Түркістан облысында әкесін өлімші етіп ұрған ер адамның жұбайына да қылмыстық іс қозғалды
Түркістан облысында қоғамды дүр сілкіндірген оқиға жаңа қырынан жалғасты. Қарт әкесін соққыға жығып, өліміне себепкер болған ер адамнан бөлек, оның жұбайы да күдікке ілінді, деп хабарлайды Sona.kz.
Полицияның мәліметінше, әйелге қатысты «Кінәліге дәрменсіз күйде немесе тәуелді жағдайда екені белгілі адамға қол жұмсау» бабымен қылмыстық іс қозғалды.
Ал оның күйеуі уақытша ұстау изоляторына қамалған. Ол «Қасақана ауыр дене жарақатын салу, жәбірленушінің өліміне әкеліп соғу» бабымен жауапқа тартылуда.
Айта кетейік, бұл жағдай жұртқа куәгерлер түсірген бейнежазба арқылы белгілі болды.
-
Ақтаулық прокурор Ерболат Әбдіров әкімшілік құқықбұзушылық жасамаған деп танылды
Ақтау прокуроры Ерболат Әбдіровқа қатысты тараған ақпаратқа байланысты сот оның әрекеттерінде әкімшілік құқықбұзушылық құрамы жоқ екенін анықтады, деп хабарлайды Sona.kz Tengrinews.kz пен «Ақ Жайық» басылымдарына сілтеме жасап.
Ақтау қаласының әкімшілік құқықбұзушылықтар жөніндегі мамандандырылған сотының қаулысында Абдировтың қоғамдық орында былапыт сөз айтпағаны, өзгелерге тиіспегені және қоғамдық тәртіп пен азаматтардың тыныштығын бұзатын әрекеттер жасамағаны көрсетілген.
Оқиға 27 тамызда болған. Сол күні прокурор Алматы әуежайында екі ағайындымен танысып, олар оның жерлестері болып шыққан. БАҚ мәліметінше, ұшаққа апаратын автобустың ішінде белгілі бір жанжал туындағаны айтылған.
Алайда сот ресми түрде Ерболат Әбдіровтың заңға қайшы әрекеттер жасағанына дәлелдер жоқ екенін мәлімдеді.
-
ҚР ІІМ: Елімізде электрсамокат қолдану заңмен реттелмек
Қазақстанда электрсамокаттарды пайдалануды заңнамалық деңгейде реттеу қажет. Бұл туралы Ішкі істер вице-министрі Игорь Лепеха Мәжіліс кулуарында мәлімдеді, деп хабарлайды Sona.kz NUR.KZ-ке сілтеме жасап.
Оның айтуынша, қазіргі қолданыстағы заңнамада кемшіліктер бар, сондықтан полиция әрқашан тиісті шара қолдана алмайды.
«Осы маусым аясында депутаттық түзетулер енгізіледі. Бұл түзетулер заңнамадағы олқылықтарды жойып, жүргізушілерге де, полицейлерге де, басқа қатысушыларға да түсінікті ережелер қалыптастырады», — деді Лепеха.
Сонымен қатар, электрсамокаттарға арнайы нөмір беру мәселесі қарастырылып жатыр.
«Бұл мемлекеттік тіркеу емес, бірақ идентификациялау үшін белгі енгізу талқылануда. Бұған дейін каршеринг компаниялары саябақтар мен тротуарларда жылдамдықты өздері шектейміз деп уәде еткен еді. Өкінішке қарай, ол жүзеге аспады. Сондықтан, енді мұның бәрін заңнамалық деңгейде шектеуге тура келеді», — деп қосты вице-министр.
Еске салсақ, Қазақстан Президенті Қасым-Жомарт Тоқаев халыққа Жолдауында электрсамокаттардың қауіптілігіне арнайы тоқталған болатын.
-
Ақтөбеде белгілі дәрігердің өліміне қатысты сот басталды
Ақтөбеде 69 жастағы дәрігер-нефролог Абай Айсағалиевтің өліміне қатысты қылмыстық іс қаралуда. Күдікті ретінде 31 жастағы әріптесі өтіп жатыр. Ол өз кінәсін мойындады, деп хабарлайды Sona.kz Orda.kz-ке сілтеме жасап.
Тергеу мәліметінше, медбике қылмысты алдын ала жоспарлаған. Ол дәрігердің жалғыз тұратынын және банк шотында қаржысы барын білген. Күдікті Айсағалиевтің телефонына банк қосымшасын орнатып, құпиясөзді есте сақтаған.
25 мамыр түні дәрігер астаналық іссапардан оралған соң әріптесін үйіне кіргізген. Сол жерде оған пышақ және балтамен соққы жасалған. Кейін мәйіт тоңазытқышқа жасырылып, басқа жерге әкетілген. Банкоматтар арқылы дәрігердің есепшоттарынан 7 миллион теңгеден астам қаржы алынған.
Күдікті өкініш білдіріп, істі алқабилердің қатысуымен қарауды сұрады. Негізгі сот процесі 25 қыркүйекте басталады.
Абай Айсағалиев ұзақ жылдар медицина саласында еңбек етіп, Ақтөбеде кәсіби маман әрі құрметті дәрігер ретінде танылған.