Sona.kz

Рубрика: Қазақстан жаңалықтары

  • Ұлытау облысында жүк пойыздары соқтығысып, 4 адам зардап шекті

    Ұлытау облысында жүк пойыздары соқтығысып, 4 адам зардап шекті

    Ұлытау облысында жүк пойыздары соқтығысып, 4 адам зардап шекті. Жұмысшылар жедел ауруханаға жеткізілген. Жағдайлары орташа. Апат Жезқазған қаласынан 65 шақырым жерде болған.

    Барлығы 6 вагон зақымданған. Тіпті кейбірі релістен шығып, аударылып қалған. Қазір темір жол бойы тазартылып, қалпына келтіріліп жатыр. «Ешқандай пойыз қатынасына кедергі келтірмейді»,- дейді мамандар. Естеріңізге сала кетейік, 1 апта бұрын Ақмола облысында да жүк пойызы релістен шығып кеткен еді. Апат себебі әлі анықталуда.

  • Қазақстандықтар шенеуніктердің жалақысын қысқарта алады

    Қазақстандықтар шенеуніктердің жалақысын қысқарта алады

    Енді қазақстандықтар шенеуніктердің жалақысын қысқарта алады. Мұндай мүмкіндік келер жылдан бастап қолданысқа енеді. Яғни, қазақстандықтар мемлекеттік қызметкерлердің жұмысын онлайн бағалап, олардың жалақысына тікелей әсер ететін болады. Бұл туралы Жоғары аудиторлық палатасы жанындағы зерттеулер, талдау және тиімділікті бағалау орталығы мәлім етті. Ведомсвтоның ақпаратына сәйкес, 2029 жылға қарай еліміздегі барлық мемлекеттік органдардың жұмысы толықтай цифрландырылады. Рейтингі төмен шенеуніктердің жалақысы қысқарады. Мемлекеттік қызметкерлердің жұмыс сапасын арттыру, халықпен байланысын нығайту — жаңашылдықтың басты мақсаты.

  • Кей өңірде жаңбыр мен қар жауып, көктайғақ болады

    Кей өңірде жаңбыр мен қар жауып, көктайғақ болады

    Қызылорда облысының солтүстігінде, орталығында тұман, түнде облыстың шығысында көктайғақ күтіледі. Облыстың орталығында, солтүстігінде, батысында жоғары өрт қауіпі сақталады.

    Қарағанды облысының оңтүстік бөлігінде көктайғақ күтіледі. Түнде және таңертең облыстың солтүстігінде, шығысында тұман.

    Ұлытау облысының оңтүстігінде, орталығында көктайғақ күтіледі. Түнде және таңертең облыстың солтүстігінде, орталығында тұман.

    Атырау облысының батысында, оңтүстігінде тұман күтіледі. Облыстың батысында, солтүстігінде жоғары өрт қауіпі күтіледі.

    Солтүстік Қазақстан облысының батысында, солтүстігінде тұман күтіледі.

    Түркістан облысының таулы аудандарында көктайғақ күтіледі. Түнде және таңертең облыстың батысында, таулы және тау бөктерлі аудандарында тұман. Солтүстік-шығыстан жел соғады, облыстың тау асуларында күші 15-20 м/с.

    Шымкентте түнде және таңертең тұман күтіледі.

    Жамбыл облысының таулы аудандарында қатты жауын-шашын (жаңбыр, қар) күтіледі. Облыстың таулы аудандарында тұман, көктайғақ күтіледі. Солтүстік-батыстан жел соғады, облыстың оңтүстік-батысында, солтүстік-шығысында, таулы аудандарында 15-20 м/с, түнде екпіні 23 м/с күтіледі.

  • Қазақстандық футболдағы бас бапкердің басы дауға қалды

    Қазақстандық футболдағы бас бапкердің басы дауға қалды

    Футболдан Қазақстан ұлттық құрамасының бас бапкері Станислав Черчесовтің басы тағы да дауға қалды. Ол қазақ тілінде сұрақ қойған журналистке келемеждеп жауап берген. «Французша сұрап тұрсың ба», деп орынсыз қалжыңдаған. Осы жайттан кейін туризм және спорт министрлгі Қазақстан футбол федерациясынан түсініктеме беруді талап етті. Спорт министрлігі мұндай жағдайдың қайталанбауын ескертті.

    ҚР Туризм және спорт министрлігі Қазақстан футбол федерациясынан түсініктеме беруді талап етіп отыр.

    Ведомствоның мәлімдеуінше, әлеуметтік желіде футболдан Қазақстан ұлттық құрамасының бас бапкері Станислав Черчесовтің қазақ тілін кемсітуге тырысқаны туралы бейнематериал таралып, қоғам тарапынан наразылық туған.

    «Федерациядан осы оқиғаға түсініктеме беру және С.Черчесовпен мемлекеттік тілге құрмет көрсету туралы түсіндіру жұмыстарын жүргізу талап етілді. Біз мұндай жағдайлардың қайталанбауын қамтамасыз ету үшін федерация тарапынан тиісті шаралар қолданылуы керек деп санаймыз», делінген хабарламада.

     

    Ал, еліміздің футбол федерациясы Станислав Черчесовтің қазақ тілі мен еліміздің мәдениетіне үлкен құрметпен қарайтынын айтып ақталды.

    «Әлеуметтік желілерде жарияланған футболдан Қазақстан ұлттық құрамасының бас бапкері Станислав Черчесовтің қазақ тіліне құрмет көрсетпеуіне қатысты видеоға байланысты Қазақстан футбол федерациясы жағдайды түсіндірі өту қажет деп санайды. Жазбада видеоның үзіндісі көрсетілген. Негізі бұл сұрақты Францияның ПСЖ клубының формасын киіп жүрген қазақстандық журналист Бегасыл Сейітқанов баспасөз мәслихатында қойғаннан кейін бас бапкер әзілдеп жауап қайтарған болатын. Станислав Черчесов қазақ тілі мен еліміздің мәдениетіне үлкен құрметпен қарайды, сонымен қатар қазақ тілін белсенді түрде оқып жатқанын мәлімдейміз», — деп түсініктеме берді Футбол федерациясының баспасөз қызметі.

    Еске салайық, бас бапкердің басы дауға қалған бұл бірінші жағдай емес. Бірер ай бұрын Черчесов баспасөз мәслихаптында қазақ тілінде сұрақ қойған журналистке шүйліккен болатын. Желіде бұл жағдай көпшіліктің наразылығын тудырғаннан кейін бас бапкер қазақ тілін оқып жатырмын деп құтылған болатын. Спорт министрлігі еліміздегі өзге де федерацияларды мемлекеттік рәміздерге, ұлттық құндылықтарға құрметпен қарауғ шақырады. Орынсыз қалжыңға жол жоқ екенін қатаң ескертеді.

     

     

  • Көпбалалы аналар автобуста тегін жүреді

    Көпбалалы аналар автобуста тегін жүреді

    2025 жылдан бастап олар облысішілік автобустармен тегін жүретін болады.

    Қазір өңір бойынша аз қамтылған отбасылардан шыққан балалар облысішілік автобустарға тегін отырады. Бұл мақсатта 178 млн теңгеден астам қаржы бөлініп, 5312 бала қамтылған. Бұл туралы ШҚО Өңірлік коммуникациялар қызметінде өткен баспасөз конференциясында айтылды.

    «Келер жылдан бастап «Алтын алқа», «Күміс алқа», «Батыр ана», I және II дәрежелі «Ана даңқы» ордендерімен марапатталған көпбалалы аналар үшін қалааралық және ауданаралық қоғамдық көліктер тегін болады. Оған қажетті қаражат жергілікті бюджеттен бөлінеді», – деді Шығыс Қазақстан облыстық Жолаушы көлігі және автомобиль жолдары басқармасы басшысы орынбасарының міндетін атқарушы Қуаныш Акрамов.

  • Алматыда тұрғын үй сертификатын алуға өтінім қабылдау басталды

    Алматыда тұрғын үй сертификатын алуға өтінім қабылдау басталды

    Алматыда мемлекет басшысының тапсырмасымен іске асырылған «Наурыз» жаңа тұрғын үй бағдарламасы аясында тұрғын үй сертификатын алуға өтініш қабылдау басталды. Бұл бастама тұрғын үй алуда көмекке мұқтаж халықтың неғұрлым осал санатын қолдауға бағытталған.

    Алматы қаласы әкімінің тапсырмасымен бастапқы жарнаның бір бөлігін жабу үшін тұрғын үй сертификатын беруге қаражат бөлінді. Сертификат мөлшері 1,5 млн теңгеге дейін, ол өтеусіз әрі қайтарымсыз беріледі. Сертификат алушыларға ЖАО кезекте тұрғандардың ішіндегі мынадай санаттар жатады:
    1. 1 және 2 топтағы мүгедектер;
    2. Мүгедек балалары бар немесе оларды тәрбиелеп отырған отбасылар;
    3. Жетім балалар мен ата-анасының қамқорлығынсыз қалған балалар;
    4. Көпбалалы отбасылар.

    Жаңа ережеге сәйкес, сертификат алу үшін отбасының орташа табысын растау қажет, ол отбасының әрбір мүшесіне осы қаржы жылына белгіленген ең төменгі күнкөріс деңгейінің 3,1 еселенген көрсеткішінен (134 561,7 теңге) аспауға тиіс.

    Отбасы банкінде төлем қабілеттілігін растаған және тұрғын үй тапқан азаматтар «Kezekte.kz» сайтындағы («Amanat» сервисі арқылы) тұрғын үй сертификатына өтінім бере алады. Қажетті құжаттар:

    1.  Жұмыс орнынан анықтаманың электрондық көшірмесі (әлеуметтік осал топтарға талап қолданылмайды);
    2. Ипотекалық тұрғын үй несиесін беру туралы банктің мақұлдау хатының электрондық көшірмесі, онда несие сомасы мен ай сайынғы төлем мөлшері көрсетілуі керек.

    Өтініштер 3 жұмыс күні ішінде қаралады, бұл тұрғын үй көмегін алуды жылдам әрі қолжетімді қылады.

    Бұған дейін тұрғын үй сертификаты тек «Бақытты отбасы» және «Шаңырақ» бағдарламалары аясында берілетін, ал жаңа өзгеріс тұрғын үйге мұқтаж азаматтарды қолдау мүмкіндігін кеңейтеді.

  • Есіл өзенімен өтетін LRT аспалы көпірінің құрылысы аяқталды

    Есіл өзенімен өтетін LRT аспалы көпірінің құрылысы аяқталды

    LRT құрылысы аясында жүзеге асырылған Есіл өзені арқылы өтетін аспалы көпірдің құрылысы аяқталды. Бұл туралы City Transportation Systems компаниясынан мәлім етті.

    Компания мәліметінше, көпірдің ұзындығы – 155 метр, ені – 14 метр, биіктігі – 28 метр.

    Құрылымның төменгі жағында LRT көлігі өтетін жолағы бар арка түрінде жасалған. Ал аралық доғасы байлау шыбықтарымен жабдықталған.

    «Жол төсемі темірбетон тақтасы бар арқалық тор түрінде жасалған. Көпір Есіл өзені үстіндегі қолданыстағы автокөпірдің жанында орналасқан. Бұл жаңа нысанды қала инфрақұрылымына кедергісіз салуға мүмкіндік береді. Құрылым су деңгейінің және аймақтың климаттық жағдайындағы ықтимал өзгерістерге төтеп беру үшін өзеннің ерекшеліктерін ескере отырып жобаланған», – делінген таратылған ақпаратта.

  • Шерзат Болаттың өлімі: ІІМ-ге күдіктілер туралы не белгілі?

    Шерзат Болаттың өлімі: ІІМ-ге күдіктілер туралы не белгілі?

    Ішкі істер министрінің бірінші орынбасары Бауыржан Аленов 16 жастағы Шерзат Болаттың өліміне қатысы бар күдіктілер туралы мәліметтерді айтты.

    Аленов бұған дейін БАҚ-та жазылған «Хуторские» ҰҚТ ішкі істер органдарында есепте жоқ екенін мәлімдеді.

    «Хуторские» ҰҚТ делінген, бізде ондай есепте жоқ. Осы істің аясында ұсталғандардың портретін қысқаша, тіпті ауызша таныстыра аламын. Екеуі ипподромда тұрақты жұмыс істейді, бірі Шымбұлақта жұмысшы, екіншісі «Ақбұлақта» күзетші, екеуі сұлулық салонында жұмыс істейді», — деді министрдің орынбасары.

    Сондай-ақ, олардың бәрі кәмілет жасқа толғаны айтылды. Олардың әрқайсының бір-бірімен байланысы мұқият тексерілетінін қосты.

  • Денсаулық сақтау министрлігі сүт безі обырына скринингтен өтуге шақырады

    Денсаулық сақтау министрлігі сүт безі обырына скринингтен өтуге шақырады

    Денсаулық сақтау министрлігі әйелдерді сүт безі обырына уақтылы скринингтен өтуге шақырады

    Сүт безі обыры бүгінде Қазақстанда ғана емес, бүкіл әлемде онкологиялық аурулардың ең көп таралған түрлерінің бірі болып табылады.
    ?ДДҰ деректері бойынша, бұл обыр қатерлі ісік диагноздарының 21%-ын құрайды. Әлемдік статистикаға сәйкес оны мен жер шарындағы әрбір сегізінші әйел ауырады.

    Әйелдердің осы қауіпті ауру туралы хабардар болуын арттыру үшін жыл сайын 15 қазанда Дүниежүзілік сүт безі обырымен күрес күні атап өтіледі.
    Қазақстанда тек 2023 жылы сүт безі обырының 5,5 мыңнан астам жаңа жағдайы анықталды. Бір жылдың ішінде бұл аурудан болатын өлім 1 мыңнан асты. Сонымен қатар, сүт безі обырын ерте кезеңде уақтылы диагностикалау кезінде әйелдердің толық емделуі 95%-ға жетеді.
    Бұл аурудың профилактикасы және ерте диагностикалау мақсатында 40 пен 70 жас аралығындағы әрбір әйел 2 жылда бір рет сүт безі обырына маммологиялық скринингтен өтуі керек.

    МӘМС шеңберінде тегін онкоскринингті тіркелген жері бойынша емханалардан өтуге болады.

  • Мемлекет қостанайлық шаруаларға 40 млрд теңге қарыз

    Мемлекет қостанайлық шаруаларға 40 млрд теңге қарыз

    Қостанай облысында ауыл шаруашылығы өнімін өндірушілерге мемлекет 40 млрд теңге қарыз. Бұл соманың көлемі күн сайын өсіп жатыр. Шаруарлар 24 пайызбен алған кредиттің үстемақысының 17 пайызын мемлекет субсидиялауы тиіс. Алайда, олар сол 24 пайызбен толық өтеп жатыр. Қиналған фермерлер «ҚазАгроҚаржы» корпорациясынан лизингке алған техникаларын қайтарып беруге мәжбүрміз дейді. Немесе мемлекет субсидияны толық өтеп болғанша банктерден алған кредиттерінің үстемақысын «қатырып» қоюды, яғни тоқтата тұруды сұрайды. Ал, ауыл шаруашылығы саласының шенеуніктері Премьер Министрдің тапсырмасы бойынша барлық қарыздар өтеледі деп уәде беруден жаңылар емес.

    «Уәде беріп жатыр. Алайда, әзірге не министрлік, не ауыл шаруашылығы басқармасы қашан төленетіні туралы нақты айта алмайды. Сондай-ақ шаруалар өтінімдерді қараудың мерзімін 10 күнге дейін ұзартуды сұрайды. Біз олардың өтініштерін ұлттық палатамен бірігіп хатқа түсіріп жоғары жаққа жолдадық», — деді Қостанай облыстық кәсіпкерлер палатасының бөлім бастығы Анастасия Кудрина.